[穿越] 執房嗰時搵返部Sony Ericsson推蓋手機: 98.

「唔該，想book羽毛球場，今個禮拜六2-4。」

「學生？」

櫃台裡的職員面無表情，有點不耐煩。

「係。」

「學生證身分證。」





職員惜字如金，全程不發一聲，默默地處理好我們的預訂，不過是花了兩分鐘時間吧。體育館內總是充斥着莫名安靜的氣氛，只有進入內場的門口被打開了，才聽到人聲。

「陪你行咗幾個字，兩分鐘就走得。」

「你都有份打㗎嘛，我都陪你唔少啦。」

「係係係，大條道理。」

「係㗎喇，行啦，去食樓下車仔麵。」





我總覺得世界只剩下我們，又或者是，我眼中只有他。兩分鐘也好，十五分鐘也好，身旁有他的話，都可以成為最長的時間。然後，我們原路走回家，那間車仔麵店，屬於我們的記憶中吃過一遍。

「老闆，照舊！」

這次換了卓行主動點餐，我很好奇，這些年來我們一起吃過多少遍。生菜魚肉加上麻油的香氣依舊，他在我的左邊，上昇的熱氣形成了無形的牆，我看不清他的臉，但已經沒關係了。

「你副眼鏡又矇晒喇。」

「次次都係咁，我慣㗎喇。」





「但我仲未望慣，你個樣都係咁蠢。」

「點啊，想比我打啊嘛？」

「你除咗眼鏡食咪得。」

「唔制，一陣又比你整蠱。」

「幾時啊？有啲咁嘅事？」

他壞壞一笑，明顯地知道我在說甚麼吧。

「扮唔記得？我唔會中第二次伏㗎。」

「明明你先係無記憶嗰個...







我意思係...無記性...」

他好像自覺自己說錯話，先是愣一愣，又慌張地更正，偷瞄我的反應。

「其實，你知道我嘅秘密，係咪？」

嘴巴比腦袋更快作出反應，問了一條我不知道是否恰當的問題。

「咩秘密啊？你咁多秘密我聽你講唔少...」

「你條頸巾，其實係我送嘅。」





「...比你發現咗添，哈哈。」

卓行的瞳孔裡一片漆黑，我讀不出任何感情或思想。

「點解...要扮唔知？你估到我唔係呢個年代嘅人，係咪？」

「咁你無去講，我都無謂問，而且我都唔肯定...」

「你係咪傻㗎？正常人一定好好奇問到底啦，做咩唔問喎你...」

「或者我真係傻嘅呢？我好怕我問咗，你又會走咗...」

「怕咩話？」

「無...我怕你尷尬嘛...」





「你知唔知，我其實好想記得，記得由我中一走咗之後到而家嘅所有野。原來完全空白咗，好難受...」

白矇矇的熱氣早已散去，淚水卻弄花了鏡片，我抓住卓行這根救命稻草，自顧自說着他大概不會懂的話。穿越的時日已經過了三個月，我由起初的小心翼翼，到後來人和事都不由我控制，心早已累透了，情緒忍不住泛濫。想起和我有過交集的人，縱然慶幸一切相遇，我還是不清楚穿越帶來的是祝福還是傷害。

「我會慢慢聽你講，都會慢慢講你知。」

他拿開我的眼鏡，替我擦掉淚水。

「真係？」

「我從來都唔會呃你。」

我低下頭，不想他看到我哭得很醜的樣子，他只是輕摸着我的頭，溫暖的掌心有種魔法能讓我平靜下來。