「短篇」「小小傻瓜，大大幸福」: 愛意

唔知邊個屎忽鬼話過，人會因為環境改變而自動去改變自己去配合，等自己可以適應到新既環境。

我諗呢個講法應該係真，因為我發現呢個現象發生左係我身上。

當我知道左佢有BB之後，自己要做爸爸之後，我就不停同自己講要大個啦，要上進D，要養妻活兒。

但係，呢種心態帶黎既效果似乎黎得太快，甚至可以話操之過急。

做左好多自以為係成熟，改變自己既事，其實都只係自我滿足。

當自己發現到事實既時候，自然就崩潰左。

我諗當時美星講既「處事要成熟D」，就係睇穿左我所做既野啦。

如果唔係有個好老婆，或者我仲困係個死局入面啦。

我真係好愛佢，好想一生一世守護佢。

自從返學校之後已經過左一星期，呢星期我都返左公司，同D同事商量之前係學校接返黎個個job。

雖然係開始忙左，但我都係堅持每日都趕返屋企煮飯比佢食。

兩個人…呀唔係，而家係三個人先係，晚晚一齊食飯，講下每日發生左咩得意事，真係開心。

美星：「我返黎啦！~」

就係我同Cherry享受緊呢片少少既幸福既時候，美星就打開大門，興奮咁走左入黎。

亦令我記返起，而家呢個屋企係有四個人。

不過講開又講，我私底下拜託左美星，同佢講話呢排我做野可能會忙左D，如果Cherry要睇醫生之類，就麻煩佢陪Cherry去啦之類。

佢一口答應，仲笑我過分擔心，Cherry只係懷孕初期，唔洗咁緊張既。

但初為人父，唔擔心緊張就假啦。

Cherry：「今日咁遲既，café有野忙咩？」

美星：「唔係呀，我去左接阿爸阿媽機咋嘛，岩岩送左佢地去佢地屋企。」

我：「返左黎嗱？死喇但我呢排要處理中學個job，未必有時間同佢地食飯添。」

美星：「我都有咁同佢地講，佢地話唔緊要，今次佢地會留耐D，遲下先約都未遲喎。」

咁就得喇，先做好正經野先，再同佢地講啦。

就係咁，我第日又照樣返工，繼續傾個project應該點做先好。

但過左差唔多一個上晝，居然有幾位不速之客走左上門。

我全家。全家走哂上黎公司，真係嚇左我一跳。

雖然話我算係老細啫，但間公司唔係我一個人架嘛，你地咁樣走上黎…

係老母旁邊既Cherry一臉尷尬，仲對我雙手合十表示歉意，睇黎佢都係被逼。

但兩老似乎對此不以為然，仲叫美星分發由café帶黎既cake比同事，十足十D電視劇情節咁。

同事個個望住我，似係等我俾指示，我都唯有無奈咁叫佢地隨便食，遲D再傾。

而我，就不斷搖搖頭咁走向我既屋企人。

我老豆佢就笑得好開心，我一行到埋去佢就大大力咁拍我膊頭，係咁乖仔乖仔咁叫我，真係人都癲。

不過我都唔想係外人面前落佢面，只係輕輕掃開佢隻手，淡淡咁講左句出去再傾就拖住Cherry，全家人離開左公司。

離開左公司，我地去左附近一間餐廳坐低，係呢個時候我至發現，全家人只係得老豆一個由始至終都笑容滿面。

就連平時天不怕地不怕既美星既臉上都略顯尷尬，咁即係話黎公司呢個主意唔係美星，而係老豆既主意啦。

唉，都幾廿歲人仲係唔識分輕重…

不過算啦，都唔係咩大事，由佢啦。

我：「點呀咁急黎搵我有咩事？仲要專程走黎我公司。」

老豆：「無呀，想見下我個又乖又叻既仔咋嘛~~哈哈哈~

」

唉…佢真係…

我忍唔住係大家面前嘆左一口氣，老豆見到我咁既反應笑得更開心。

Cherry：「對唔住呀lulu…但Daddy佢係都要黎…話想俾個驚喜你…

」

我：「傻啦邊關你事，而且又唔係咩大問題，唔好擺係心，算啦叫野食啦反正都黎左。

」

之後我地一家人就係餐廳度共進午餐並閒話家常，言談之間我得知原來Cherry有左既消息已經傳到老豆老母耳中。

但同Cherry父母既反應好唔同，老豆老母並無顯得特別開心，eh…至少我覺得老豆其實係平時一樣囉。

佢地只係叫我要生生性性，除此以外就無多講D乜了。

直至午餐既尾段，我咁岩去左洗手間，當我洗完手準備出返去搵佢地既時候，老豆就雙手抱胸咁挨係門口望住我。

而家既佢臉上再無頭先既笑容，非常嚴肅。

我見過佢呢個樣幾次，每次都令我印象好深刻。

老豆：「魯路修，你知道你而家身上又多左一份責任？照顧好太太同細路既責任。」

我：「啊，知道。我都好努力去面對呢份責任。」

老豆：「問題就係呢度啦。」

問題？