「短篇」「小小傻瓜，大大幸福」: 衝擊

我久久都未能講出一句說話，因為大腦仍然忙於整理思緖。

不過我無錯失良機，我知道呢D事如果遲左比反應又或者比錯反應既話一定會好大件事。

我選擇左即刻攬實佢先。

但係，佢好細力咁推開左我，令我非常錯愕。

亦因為佢推開左我，我先望到佢既樣，佢非常唔開心，仲好似想喊咁。





我見到咁即刻摸佢塊臉，問佢做咩事咁既面口，唔係應該開心先係咩？

Cherry：「你係咪唔想要個BB…？ 」

我：「痴線！！ 點解你會咁講？ 」

我忍唔住激動，係梳化上彈左起身望住佢。

但係，亦因為咁樣我睇唔到佢而家既樣。





佢無抬頭望我，反而係dup低左頭。

Cherry：「我見你聽完之後呆左…好似唔係好開心咁… 」

唉！始終都係慢左一拍！ 

我諗住即刻坐返低同佢解釋啦，點知唔小心踩到個cushion，一下撻左係地下，個頭仲要撞到張梳化，幾鬼死痛。 

Cherry：「唉呀你做咩野呀傻佬…點呀痛唔痛？ 」





佢都從梳化度落黎，兩個人就咁坐左係地下相互望住對方。

佢伸出佢個隻纖細白滑既手撫摸我撞到個位，表情仍然好唔開心。

睇到佢咁唔開心，我都唔開心。

明明係一件開心事，就因為我俾遲左反應搞衰左，唉最衰都係我。 

一定要諗辦法氹返佢。

我：「我地終於要做人父母啦。 」

我一邊講，一邊摸佢個肚，摸落去個下我好明顯feel到震左一下，唔知係Cherry佢自己既反應定係個BB既反應。

九成係Cherry佢自己既反應啦，BB邊會咁快識有呢D反應，我真係on9。





我：「唔知會係仔定女呢？ 」

Cherry開始捉住我呢隻手，同我一齊感受肚入面既BB。

Cherry：「lulu… 」

我：「唔好喊啦再喊眼仔會腫架，同埋開心事黎架嘛做乜要喊啫。 」

我咁講一講更加刺激到佢既情緒，喊得更大聲，仲撲上黎攬住我攬到實一實。

Cherry：「其實我真係好驚…好怕話左俾佢知之後你既反應…我唔知你會唔會想而家就做爸爸…頭先見到你呆左我個心真係離一離… 」

我：「哎…傻豬黎既！你次次都用呢D咁衝擊力既說話，梗係會嚇親，呆一呆都係正常架啦，我開頭仲以為你係想同我離婚添呀！ 」





Cherry：「因為我真係唔知應該點同你講好…早幾日都同家姐商量過，佢話包係佢身上，但係… 」

啊，咁既話就可以解釋哂所有野啦，美星應該係想今晚宣布呢個消息既，但個八婆就飲醉左。 

唔緊要，最後係Cherry把口得知呢個消息咪仲好，更有意義啦。 

你又俾多樣寶物我喇。

我：「唔怪得我硬係覺得你呢排肥左喇，我仲以為你食… 」

Cherry：「喂！ 」

女人一聽到個肥字既反應會係點，我相信大家都好清楚。 

佢即刻離開左我既懷內，好嬲咁望住我，眼角仲殘留住一絲淚痕。





我：「講下笑咋，你係我眼入面幾時都有最完美最靚既。」

我一邊講一邊幫佢抹走D淚痕。

Cherry：「都唔知你邊句真…」

我無等佢講完就一啖錫左落去，嚇到佢眼都突埋。

不過佢無推開我，大家都係度享受緊呢個kiss，唔知過左大家先分返開。

Cherry：「衰人，大肚婆唔嚇得架… 」

我：「哈哈，對唔住對唔住，一時情不自禁~ 」





「我地要努力做個好父母呀知唔知？」

Cherry：「呢句說話你留黎同自己講啦，我一定會係一個好媽咪~ 」

我：「係係~ 」

無錯，大個啦，要努力做個好爸爸。