[真人真事][校園][純愛]《兩個我加一個妳》: 第一百二十二章

卒之睇晒佢啲相

比起之前叫做了解多咗啲啲，

真係少少咋唔係好多

如果我話睇啲相就可以了解得好深入嘅話，

你都唔信啦



夜晚冷靜落嚟喺度諗

咁耐冇見，

見返就話結婚

其實帶俾我嘅衝擊真係好大

好多人同我講過，



話女人著婚紗嗰陣係最靚

自己都去過幾次婚禮

題外話目的梗係黐飲黐食

不過喺黐飲黐食期間

見到新娘嗰種幸福自信真係由心而發，



唔需要好強烈嘅表達已經有氣場

平心而論我同意呢番說話嘅

但係我更加清楚自己係咩性格

其實我都好自私，

一直以嚟我覺得自己唔係，

不嬲我都以為自己係嗰種睇住人地開心自己就會好開心嘅人

係直至知道呢個消息之後，

我先知連自己都誤解咗自己



叫我親眼睇住咁多年都放唔低嘅女仔同第二個男人結婚，

我肯定會亂諗野

我唔能夠擔保可以控制情緒，

到時搞亂個party我就真係對唔住芊靈

所以大家唔使諗阿牛嘅情節

依家都可以話俾你聽一定冇

對比起參與婚禮，



唔去嘅話反而先至係一種尊重

況且我都唔係啲乜野重要人物

倒不如忍痛放棄呢個機會，

對自己都係自私啲好

起碼受傷程度高極都有個譜

當然啦為免佢亂諗野，

我都會將成件事包裝得好啲嘅

其實可能佢唔在乎亦都唔會去理會



不過只係我保守啲，

做埋手尾咁解

既然我同佢講話要去旅行，

門面功夫當然要做足啦

跟住落嚟我唯一一樣野可以做嘅

就係應該諗送咩結婚禮物

其實一直以嚟我都覺得送禮物呢啲野求其咪得囉



不過對住佢，

始終都係會唔覺意諗多好多野

點樣得過且過嘅人，

都總會有一絲不苟嘅時刻

任何人都會有，

冇人可以避免

我特登瞇埋眼諗咗一陣，

因為我覺得喺咁樣嘅環境，

思緒係最旺盛

一路喺度諗佢鍾意啲乜

腦入面自己時光倒流，

佢講過啲乜做過啲乜，

一定要逼自己諗到

然之後再特登拎本日記出嚟睇

睇下有冇線索，

望住一張張發黃嘅紙

睇了又睇，

終於都搵到我想搵嘅野

慶幸以前手多有寫低啫

亦都好好彩當日嘅我冇發夢，

有聽佢講野

佢講過話好鍾意一個狗仔嘅音樂盒

每一次同佢行商場見到音樂盒，

都會停低喺度望

跟住就係咁講有幾靚乜乜柒柒

又話如果有一個狗仔形嘅音樂盒就好喇

透過回憶，

我應該知自己要送乜

不過要知道香港好撚難搵

喺嗰排每一個禮拜日我都有出去，

九龍港島甚至新界都有去

都係搵唔到自己心目中想要嘅音樂盒，

好多我都覺得好靚但係唔符合條件

講真錢真係唔係問題

唔係話有唔有錢，

而係多錢極咪又係一次，

之前都講，

每個人都總會有一個人，

係會特別去對待

我都解釋唔到自己點解會咁樣，

可能就係想心理上覺得佢係與別不同掛

係呀其實真係好幼稚，

所以一直都冇同佢講呢啲諗法

講出嚟佢未必信，

信嘅話都係當我傻撚咗

既然係咁自己知咪算又唔需要人地認同嘅，

況且可能佢已經唔鍾意

但係我又唔想依家走去問佢喎，

諗下都知你想送乜俾人啦，

同埋我記憶中我真係好少製造驚喜俾佢

反而佢就真係成日俾我，

唔奢求我送返一次係叫做回禮，

只係好想體驗下製造驚喜嘅感覺

反正對我嚟講唔係好多人令到我有呢啲諗法，

曾經有不過後來走咗，

咁難得依家出現返，

為自己為佢為乜都好

都好想真真正正咁樣經歷一次。

之後我有叫Cyrus幫手，

事關佢條友成日網上買野(唔係淘寶)

我就真係從來未買過

乜撚都唔識

既然坊間見唔到咪試下上網囉

果然依家真係資訊發達嘅年代

佢好快就搵到幾個關於狗仔嘅音樂盒出嚟

跟住我就喺從中選擇，

睇下邊個好，

其中有一隻我覺得好似呀bi

唔知大家記唔記得啦，

呀bi係啡黃色長毛臘腸嚟

其中一個音樂盒就係有啲似

同埋聽佢口氣應該都放低咗，

即係話見到呢啲野，

都應該唔會諗返起佢唔喺度嘅事實

所以就即刻叫Cyrus買呢個

平就肯定唔平，

不過唔緊要啦邊計較得咁多

我真係好耐都未試過令佢開心

讀書年代自問都應該有呢份榮幸

不過跟住就有個長達八年幾嘅真空期，

我都幾懷念單純想令一位女仔開心嘅感覺，

所求嘅回報只係佢喺自己面前嫣然一笑

就係咁簡單冇其他，

除咗呢個音樂盒之外我重買多咗另一樣野，

價錢相對地平

不過一樣嘅係，

我相信佢都係咁鍾意

假如佢嘅喜好冇變的話

係咩就唔講住喺度賣一賣關子先，

我唔期望亦都唔可能修補所有遺憾，

只不過呢幾年我學到嘅係，

既然有機會有能力的話就應該珍惜

修補一個得一個。
咁樣喺佢結婚前嗰個禮拜

我就特登whatsapp佢

同佢講點樣俾禮物佢，

所有野重新經歷嘅時候，

唔知點解都係會比以前拘謹

明明以前睇落去一樣好平常嘅事

我:「我就買咗喇

幾時得閒出嚟俾你呀

地鐵站好冇 」

芊靈:「唔使咁下話

依家搞到好似同唔識嘅人交收咁樣

假假地都識咗你咁多年丫 」

我:「大佬呀你就嚟做人老婆

唔係咁樣你想點 」

芊靈:「咁又點啫

都可以一齊出嚟食飯順便收禮物架 」

我:「我冇所謂呀我唔知你得唔得呀 」

芊靈:「有咩唔得

你放心佢嗰邊我會直接同佢講

兩個人出嚟食飯有咩問題呀，

又唔係做乜 」

我:「你講到咁就得喇

一陣有咩冬瓜豆腐我唔負責 」

芊靈:「我同佢一向都好有溝通

約咗邊個一早會同大家講，

亦都唔會阻止見邊個邊個 」

我:「係喇係喇你啱喇

想食咩呀 」

芊靈:「打邊爐好唔好

好耐冇打過

依家重要咁凍 」

我:「好有得話唔好咩 」

芊靈:「唔係呀你唔想打可以食第二樣呀 」

我:「冇野喇講下笑咋

禮拜五好唔好

我估你呢排幾忙架喇

禮拜六日我諗都唔得閒 」

芊靈:「禮拜五冇問題呀。

我:「咁我卜咗位就打俾你啦 」

芊靈:「嗯 」

其實我真係好矛盾，

原本我諗住逼自己快啲move on，

盡量都唔想見佢

原本諗住送完禮物即刻走，

不過俾佢講講下，

喚醒咗內心嘅私慾，

最後都係忍唔住同佢食一餐飯

我喺度不斷咁樣提自己，

真係最後一次，

同埋唔好睇得咁重，

只係普通朋友約食飯，

係咁多喇。