[真人真事][校園][純愛]《兩個我加一個妳》: 第一百二十一章

嗰日我地傾咗好耐

講到夜晚佢話佢同Michelle今晚會食飯

芊靈:「一唔一齊 」

我:「唔喇下次先啦

咁走咯 」



芊靈:「嗯

喂 」

我:「做咩呀 」

芊靈:「漏咗支茶呀

重係咁大頭蝦



嗱 」

我:「唔該 」

「下次先啦」，

典型嘅客套說話，

有幾可真係會下次丫



同埋都係時候要抽離

重見得返應該要感到滿足

都唔可以再強求咁多，

特別係佢好快就係人妻

一切都塵埃落定

唔怕老實講，

嚟之前我有呢個心理準備

知但係我發現我啲心理準備全部都係冇撚用



去到嗰刻成日都控制唔到情緒

當然最後有交換埋whatsapp同埋instagram

我:「真係把砲喎有英文名

Yvonne 」

芊靈:「出到嚟做野梗係要多啲名傍身架啦

係咪先 」

我:「唔講真係唔知你叫Yvonne 」



芊靈:「正常丫呢個名係過到嗰邊先諗出嚟

中學嗰陣上英文堂miss都唔係叫我英文名嘅

佢叫全部人都係叫返中文名哈哈 」

我:「唔怪得啦 」

我係唔可以喺佢面前開instagram

因為我搜尋欄嗰度第一個就係佢，

呢啲野費事俾佢知啦

係解散咗之後我先至開instagram



去搜尋嗰度打開一個我最常瀏覽嘅instagram用戶，

鄭重地撳一個follow制

終於可以撳

呢一個制中間個過程都好繁複

前後用咗幾年先至光明正大咁樣撳，

冇幾耐佢就accept咗

咁就決定返屋企慢慢睇啦



冇需要心急亦都提自己唔到我心急，

冇幾耐食完飯就返屋企

之後就咁當然係透過社交網站去了解近幾年嘅佢係點樣

始終我對佢嘅認知重停留緊中學年代

講真嗰句唔係真係好熟

我嗰陣自己講自己唔係想做乜，

只係純粹想了解佢近幾年嘅情況啫

好似朋友咁樣，

絕無半點非分之想

一睇原來都有80幾90張相

幾年嚟講又真係唔算多

咁就不如慢慢睇

一碌就碌落去最抵，

原來嗰陣呀bi重喺度

哈哈我都好耐冇見過佢

睇相同以前好似差唔多咁樣

好似重肥咗少少

再睇多幾張，

發現有唔少都係Michelle重有幾個姊妹

點解唔見佢男朋友嘅

一路睇落去，

睇到有一幅相係黑白底

再睇埋啲內容應該係講呀bi走咗

自問我以前都養過狗

走嗰一刻真係好殘酷

絕對絕對絕對唔會想經歷多一次

亦都係因為咁所以之後都冇再養過狗，

唔知嗰陣佢係點克服呢

不過好諷刺嘅係，

幾年之後嘅今日我先知

就連關心嘅資格都冇

乜野都要講時間，

我都想喺佢失意嗰陣借個膊頭俾佢喊

又或者單純咁樣陪佢，

甚至只係一句好簡單嘅問好，

全部都好想做

不過全部都冇得做，

就係因為唔啱時間

咁樣跟住再睇，

就見到佢有去張敬軒2014嗰個演唱會

重要係尾場，

隔離重有Michelle同埋幾個姊妹

其實嗰個演唱會我都有去

但係我就唔記得邊日，

好彩依家呢個時代有Iphone，

就算真係唔記得，

都可以睇返啲相、片個日期

於是我就拎部電話出嚟睇

就見到係26號

一於就上網睇下係26號邊場

之後搵到原來正正就係尾場，

不得不認命

呢個世界真係好大，

大家喺同一個空間都可以見唔到

諗諗下又唔應該怪呢個世界

結論同當年一樣，

都係冇緣兩個字講完

如果唔係點解成日喺同一個地方都可以見唔到

重要咁多年都係不斷咁循環，

根本就冇一個更加貼切嘅解釋

或者好彩啲嘅話，

早幾年已經可以見得返，

係咁嘅話會有咩發展

我唔去諗喇，

事過境遷再去回想返其實需要好大勇氣

好明顯我冇啦

睇下睇下終於見到佢男朋友

呀唔係，

應該係未婚夫先啱

正正常常啦冇乜特別，

係咪好靚仔唔係囉

講真我真係冇個人情緒

純粹就咁睇去講啫

咁樣起碼唔衰先

我唔識睇人就唔去評啦，

總之佢揀得就可以放心啦

唔信佢自己唔通信我呢位咁多年冇見嘅朋友咩

睇睇下發現佢好少會post歌詞，

你知啦好多港女都好鍾意咁樣

但係佢又唔多見

直至再睇咗幾十張之後，

終於見佢有post歌詞

一直都唔多見唯獨係呢個post，

咁就睇下係咩歌

我有一秒ff過，

嗰首歌係咪我以前喺佢面前求其鳩唱嗰啲陳奕迅嘅歌

跟住先發現好明顯係我諗多咗

首歌我就識不過就唔係陳奕迅嘅

你地應該未必識因為都係十幾年前，

我地呢啲中佬就識，

楊千樺唱嘅



曾經　發生過感情

發生過不能推翻的許多事情

叫天不應　留著記憶裡風景

為我去指証　發生過感情

發生過不能假裝的一些反應

無法經營　原來你在不確定時候　已盡興



睇完之後我喺度咀嚼份歌詞

不過因為頭先我ff衰咗，

依家我真係唔敢亂咁諗

究竟佢聽緊呢首歌嘅時候係諗緊邊個，

反正都冇得證實

繼續喺度諗都係冇用，

即使我見到佢出post個日期係國慶日

我都唔敢諗咁多，

咁多年以嚟我學識嘅就係安分守己

同埋唔好尋根究底，

因為真相未必係你諗咁樣

倒不如留白，

等件事有朦朧美，

疑幻疑真或者係更加好

跟住醒起佢話嗰張生日咭要一直右下咁樣睇，

差啲唔記得呢件事，

跟住就二話不說打開櫃桶拎返出嚟睇啦，

明知冇用但都重係唔捨得扔

不過我好感激當日咁留戀嘅自己

起碼依家都可以拎嚟睇下究竟佢講乜

搵到之後見到第一個字係我，

跟住就依照佢講嘅方法去睇，

睇完之後，

大大啖咁吸氣

或者真係以前從來冇細心咁樣看待，

係自己太過無心裝載

睇咗咁多次都係諗唔到，

冇架喇我只有呢個反應

依家都過咗衝動嘅年紀，

日漸釋懷，

唔到我唔咁樣諗。


「我寫咗呢張卡好耐呀，
你唔好唔睇晒佢呀，我嬲架!!!
記得你鍾意毛毛質地嘅野，係咪好勁呢嘻嘻，
你話你介意啲人送啲唔知乜野你，
有啲野明明你自己就唔鍾意但又夾硬要收，
我堅有聽你講呀嘻嘻，
希望你會啱用啦壹仔，原諒我要出去買因為唔識自己整，
17歲生日快樂呀傻仔。」