[真人真事][校園][純愛]《兩個我加一個妳》: 第一百二十三章(終章)

跟住我將時間地點俾晒佢啦

然後就默默等待禮拜五嘅來臨，

話就話當係普通朋友食飯啫

不過一個人靜落嚟嘅時候又點會冇亂諗野

老實講我就唔擔心我同佢會冇野傾搞到氣氛好尷尬



事關呢一樣野喺我地身上好少發生，

咁多年都冇乜點樣試過

我都慶幸咁樣嘅

始終我自己不嬲都係毒撚

我都講過以前會好啲



冇野講嗰陣都會盡量去R水吹

務求令到氣氛唔好咁尷尬

不過大個咗真係唔會

有時放工嗰陣同同事兩個人行真係可以一句野都冇講過

係唯獨有幾個人自己對住佢地真係好舒服，



話題好自然唔需要夾硬諗

芊靈就係其中一個

當然，

其實我有好多野都想問佢

不過有啲真係問唔出口，

同埋佢都重有一個禮拜就會成為人妻

都係唔好理咁多，

好奇心從來都會害死人



有啲野唔知好過知

所以都係決定乖乖地唔好理咁多，

坐低食下野傾下計跟手送埋禮物，

正式畫上句號

以後未必會去到老死不相往來呢個階段，

不過我諗唔會成日見面甚至係聯絡

起碼自己都會避忌先，



對住一個唔會有發展嘅人，

我寧願狠心啲

都好過拖泥帶水，

其實依家見返真係唔可以太過強求

起碼我重知佢生死，

有佢社交網站，

其實比起幾年前好好多

人生在世，



身邊難免會出現唔少嘅過客

佢係其中一個，

雖然大家唔可以開花結果，

不過仍然想講一句老套嘅說話，

感激佢嘅出現

如果當初我冇轉校嘅話，

究竟依家係點我都唔知



我假設過得比依家好啦

天方夜譚講一句，

嚟多次嘅話我諗我都係會選擇轉校

即使結果唔變都好，

中間發生嘅野夠我回味一世

結果係唔如意，

不過過程冇得呃

其實可以嘅話我真係好想咁樣同佢講，

不過你知啦呢啲野點樣講出口

你諗下打緊邊爐嗰陣喺度講啲咁嘅野，

完全唔融洽

所以抱住都係少講少錯唔講唔錯嘅心態去同佢食飯。

好快就去到禮拜五

其實我好想著佢送俾我嗰件衫

唔好笑呀真係重著到

不過拎出嚟望住件衫嗰陣喺度諗

始終唔係咁好，

畢竟身份有別

所以最後都係著第二件

嗰晚六點半放咗工之後就即刻趕去旺角

因為我卜咗七點半

佢話留位十分鐘照計就應該趕到嘅

不過費事咁冒險喇去到先算啦

多咗時間出嚟咪自己去附近行下，

總好過遲到

去到旺角，

果然預鬆咗時間

咁就去附近行下啦

行到咁上下佢whatsapp我

話會準時到

跟住我就自己計時間去返嗰邊

一去到打邊爐嗰度就見到佢喺度

佢都望到我

跟住我離遠示意叫佢入去

入到去有條友就叫我地揀湯底

芊靈:「你想要邊個 」

我:「你話事啦冇乜所謂 」

芊靈:「咁呀

你就唔食辣嘅即係麻辣可以唔要

又唔鍾意藥材味喎即係呢個藥膳都可以唔要

豬骨你又驚淡

番茄好唔好 」

我:「屌你咁撚勁

咁都知我豬骨驚淡 」

芊靈:「哈哈其實係我驚淡啫

不過你夠膽話唔驚辣咩

夠膽話鍾意食藥膳咩 」

我:「真係唔好得罪你

十年之後都記得 」

芊靈:「記性好過你少少咁多啦 」

我:「係喇係喇最叻係你啦

臨結婚前打邊爐唔驚到時唔啱著婚紗咩 」

芊靈:「應該冇問題嘅

我諗 」

我:「梗係冇問題啦

屌你身材邊有走樣

似得我咩肥咗咁多 」

芊靈:「你邊度有肥咁多呀

咪同以前差唔多 」

我:「肥嗰啲位你見唔到啫 」

芊靈:「係咩

睇過 」

我:「唔好呀呢度公眾地方

我把劍一出鞘唔係人咁品 」

芊靈:「又喺度講衰野

係第二個真係唔鬼睬佢 」

我一定要盡量輕鬆啲，

總之要俾一個豁達爽朗嘅形象

唔可以俾佢知重有留戀，

要記住今晚係同朋友食飯

芊靈:「係喎你買咗咩禮物呀 」

我:「使唔使咁心急呀

話咗唔會走你數就唔會啦 」

芊靈:「好奇啫

問下都唔得 」

我:「又扮扁嘴

呢一招對我嚟講冇用

小姐唔係中學生喇 」

芊靈:「搞錯呀使唔使成日提住呀

真係好老咩 」

我:「咁唔係中學生唔代表老嘅

起碼你都叫呃到人

話係fresh grad應該都有人信 」

芊靈:「咁你又誇張咗啲 」

跟住嗰餐飯就係咁樣不停傾計，

講以前又有講依家做野都有

我有講笑咁樣話唔使講佢同佢未婚夫之間嗰啲甜蜜野，

我話我自己係毒撚講呢啲真係想打擊我啫

有咁大講到咁大

好彩佢都有配合真係冇講

跟住反而講咗好多依家做野嘅事

佢話全公司唔係好多人知道佢係老闆個女

因為費事惹來閒言閒語，

所以都想保護自己

同埋佢個姓都唔算好特別，

所以啲人唔會懷疑佢同埋老闆同姓背後係有秘密關係

佢話初頭唔係好慣架，

有幾次真係忍唔住叫咗daddy

好彩佢講得快同埋唔係好大聲所以冇乜人聽到

依家適應咗就好啲啦不過都唔算真係好慣，

講完之後就講以前喺外國嘅野

我有問佢有冇溝鬼仔

點知佢話冇

話如果揀伴侶嘅話都只會揀香港人，

芊靈:「你啲思想真係唔得呀

一聽外國人就話係咪溝人地 」

我:「點知你咁多呀

啲鬼仔冇圍住你轉咩 」

芊靈:「冇喎

都唔係識咗好多個，

有啲成日講埋啲唔好笑笑話

跟住都冇理佢地嚕 」

我:「哦 」

跟住有條友行過嚟叫我地俾錢先

我一手就俾咗一張1000蚊，

我:「唔好同我爭呀準新娘

今餐係我嘅 」

芊靈:「點好意思呀，

唔得梗係要俾返你 」

我:「講明先唔收呀

我唔好意思就真

去唔到你婚禮 」

芊靈:「傻啦唔使

你一早話去旅行咁梗係去啦 」

我:「呢餐同埋啲禮物當係人情呀

費事又話我識咗咁耐唔俾人情 」

芊靈:「我冇咁講喎 」

我:「以防萬一啫 」

芊靈:「咁多謝你啦

又停晒手

拎個碗嚟啦

仲有啲丸同埋雞肉呀 」

我:「唔該唔該 」

八年前請唔到佢打邊爐，

今年終於可以初嚐呢個滋味

哈哈俾錢嗰下真係幾撚型嘅，

八年前大家係朋友，

八年之後一樣冇變

究竟係慶幸抑或係惋惜，

其實真係好睇個人

唔同時期答你都隨之而唔同，

真係冇得一概而論。

傾多陣之後就走咗，

我:「臨走前可以俾你喇

唔好喺面前拆呀 」

芊靈:「得喇

嘩有兩個嘅 」

我:「唔得咩

見係你咋

第二個收皮啦 」

芊靈:「咁我都幾榮幸喎 」

我:「唔係你估 」

芊靈:「呢個咁重嘅

咩嚟架 」

我:「返去睇你咪知囉 」

芊靈:「哈哈唔知點解好期待添 」

我:「一陣你唔滿意咪仆街

所以唔好咁有期待 」

芊靈:「使唔使咁快戴頭盔呀 」

我:「穩陣啲好

你未來老公唔嚟車你咩 」

芊靈:「佢話想呀不過我叫佢唔好

咁多野做費事啦，

一個人搭巴士有一個人搭巴士嘅好 」

我:「咁好啦我行呢邊呀

拜拜 」

芊靈:「咁好啦拜拜 」

我嗰晚冇野做

問心其實我好想好似以前咁樣送佢一次搭巴士，

即使係一次都好因為真係好耐冇試過

不過既然下定決心要放手，

咁就無謂做咁多野喇

送多一程巴士又點，

結果都係唔會扭轉

既然係咁就唔應該多此一舉

做埋啲改變唔到事實嘅野，

否則最後搞著嘅咪又係自己

返到屋企沖涼，

沖完涼就見到佢send嘅whatsapp

芊靈:「好靚呀多謝你呀

呢世人收過最靚嘅就係呢份禮物

另外嗰隻巴庫公仔都好得意呀

thank you 」

我:「新婚快樂 」

事關我都唔知可以再講乜野，

唯有講呢句算

你估我唔想好似當年咁樣，

對住佢講埋啲好唔知醜嘅野

只係想令佢開心就冇問題

不過成熟咗顧慮亦都自然多咗，

大家嘅身分已經唔係十年前咁樣

以前做得唔代表依家都做得，

好多人講成長其實係失多於得

至少喺今日，

我冇咗十年前嗰份厚面皮同勇氣。



跟住打開ig

就見到佢啱啱出咗post

上面影住我送俾佢嗰個音樂盒

後面就有一隻巴庫公仔

亦都係我口中所講嘅另一份禮物

大家應該記得當年我幾撚叻仔送錯禮物

呢件事一直都耿耿於懷

依家有機會補鑊當然唔好浪費啦，

即刻搵下邊度有獨立嘅巴庫，

同埋要符合size

盡量吻合當年嗰個kurumi，

你知啦一大一細好奇怪

最令我意外嘅係，

原來佢一直都冇扔我呢個錯誤嘅禮物

保存到依家，

點解我會知

因為嗰張相入面，

新買嘅巴庫隔離就係當年嘅kurumi

冇估錯應該係擺喺房個床頭度

好感激佢咁重視呢一份錯誤嘅禮物

我諗佢都唔係特登影因為個焦點係喺前面嘅音樂盒，

只係睇個形我覺得係我當年買嗰隻啫

相下面嘅內容大約係，

「這就是我一直把這個位置懸空的原因，

I still remember that promise。」

睇完之後撳一個好簡單嘅like

就係咁多冇其他，

唔會去解讀佢講啲乜

亦都唔會去回想究竟係咩承諾，

起碼我覺得實質嘅like比起我虛無嘅估計，

更加有意義

總之見到佢開心就得，

已經達成目標，

其他野都係次要

做戲當然要做全套，

我問過Cyrus可唔可以配合我

佢第一句就冇問題，

果然係十幾年嘅老友

喺我講做咩戲之前呢，

我要先表達一樣野先

其實Cyrus真係同佢女朋友去旅行

佢地去日本

日期亦都係喺芊靈結婚嗰期，

呢件事係真嘅

話說我首先要查下芊靈同埋michelle重有佢準老公嘅Instagram，

睇下佢地有冇follow Cyrus同埋佢女朋友先

查咗我半個鐘至九個字，

終於見到佢地三個都冇follow

咁樣成件事就安心喇，

起碼唔擔心會穿煲先，

記得當日我有去送機

我:「今次真係唔該晒

記住影多啲唔同嘅角度

廢事同你出嘅post一撚樣 」

Cyrus:「得啦識做喇

講真我唔會質疑你嘅決定，

亦都唔會問你後唔後悔

我覺得你應該諗過度過先至咁樣做 」

我:「識咗咁多年真係識咁多年

冇得呃 」

Cyrus:「屌唔係你估 」

我:「不如依家就影一張先 」

跟住我地三個就喺度影咗一張相，

冇幾耐之後佢兩個就入閘

我就梗係返屋企啦

一上巴士就出post頭先嗰張相，

「出發去日本 」

冇幾耐就見到唔少人like咗

芊靈都係其中一個

咁就冇問題喇起碼佢見到先

如是者跟住嗰幾日

Cyrus不斷影相俾我，

神社呀魚生呀街邊嗰啲動漫呀，

林林總總

咁就梗係二話不說全部upload上去Instagram啦，

估唔到有一日我都要扮港女

無中生有哈哈，

好彩我個instagram一向都好少影自己個樣

咁就易過骨啲，

望落去起碼唔會有違本身風格

唔錯唔錯，

你問我咁樣做好唔好我真係答你唔到，

唯一我覺得我咁做冇咩唔好囉，

你同人講去旅行梗係要俾啲證據人睇啦

就咁睇除咗冇樣之外我都唔覺得好大漏洞，

應該可以嘅

過幾日見到芊靈upload返佢結婚嗰啲相，

老老實實真係幾靚

我知你又話我盲捧，

係咁架喇唔撚得呀

真真正正成為咗幸福人妻(我覺得啦)

可以正式告一段落

今年佢生日嗰陣我有同佢講生日快樂，

其實我好想夾啱時間不過費事搞咁多野啦

始終都係唔想俾佢知我最真實嘅心態

佢回完我一句多謝之後我都冇覆佢

要記住我只係禮貌上同佢講啫，

絕對冇代表任何野

反而我生日嗰陣，

佢就好似當年咁樣

喺朝早嘅六點零五分同我講，

的確有啲意外

唔同嘅係，

我唔可以再扮到我察覺到咁樣

單純咁樣會返一句多謝就算

身份唔同咗講野都有規限，

其餘時間我同佢真係冇講野

要知佢嘅近況只可以等佢喺instagram出post

塵埃落定都無謂做咁多野，

知道佢一切安好就算

兩個我加一個妳，

就係1001，

上開兩登嘅巴打都應該知係點解喇

既然係咁我都唔去重複當中意思，

費事咁長氣啦

或者當初一個玩笑，

已經講咗我地之後嘅命運

完結只係時間嘅問題，

我同佢亦都冇打算繼續發展落去

一到盡頭就冇之後，

我啲預言冇個準，

最唔想成真嘅嘅偏偏就中咗

真係無話可說，

最後想講一首我當年對住佢唱嘅歌，

以前我唱嚟唱去都係頭兩句，

咁多年後終於唱到去最尾嗰兩句

都真係有啲耐哈哈，

年紀唔同心態唔同，

就連唱同一首歌嘅歌詞都唔同

唱埋呢兩句就正式落幕。


假使沒真的相愛

又試問我在那夜至今為何始終不戀愛