[真人真事][校園][純愛]《兩個我加一個妳》: 第一百一十七章

嗰晚上到床瞇埋眼嗰陣，

出現返好多好耐都冇見過嘅畫面

開心嘅唔開心嘅都有，

再慢慢諗起當時嘅我，

成日話大個咗一定要點樣點樣點樣



哈哈到咗依家

冇一樣實現到

無論係對佢定係對自己都好，

全部都係鳩噏

對自己講過啲乜就唔講啦



反正都唔係重點，

不過我好記得嗰陣我有個好撚戇鳩嘅諗法

就係將來要學識整糖

因為我知佢好撚鐘意食糖

特別係二寶同埋能得利，



有一刻諗過將來走去學

當然去到最後都係冇

佢亦都唔係好似以前咁樣，

成日都喺我側邊

面目全非，

好彩呢一樣野當年冇同佢講過

如果唔係我都唔知點樣交代

雖然，



佢唔會在乎都好，

但係講咗出嚟就係一個口頭承諾

我做唔到嘅話只會有多一項罪名，

重有好多嘅不過唔喺度一次過講喇

我唔會話中學係最好呢一類說話

始終真係個個都唔同

唔可以一概而論，



不過間唔中都會諗起以前嗰種生活

跟住臨瞓前係咁提自己，

發夢嘅時候一定要返去中學年代

就算係好無聊咁樣坐喺課室嗰度，

一個咁悶嘅情景都好，

當然啦瞓著咗覺係控制唔到啦

咁我都係想試下得唔得啫

記得嗰晚就係呢個心態



好想再經歷多一次以前嘅環境，

當然啦去到第二朝，

都係唔撚記得咗發咩夢

記得嗰日我地班人約咗兩點半喺學校等

因為開放俾舊生進入嘅時間晏晝十二點半先開始

不過大家都係諗住有排傾，

始終咁耐冇見起碼傾返幾個鐘



所以就諗住食完晏晝先入去

費事一陣傾傾下肚餓走出走入

講起上嚟其實我唔知芊靈幾點入去，

事實上我都冇渠道去知

所以一切真係聽天由命，

撞到就撞，

撞唔到都冇辦法

係睇下到時Michelle會唔會post IG story

我估佢地都一齊去啦

係咁嘅話就有方法知

大約一點我就出去搵Cyrus食晏

食完就一齊去學校，

一出門嗰陣真係feel到自己緊張

估唔到以前最熟悉嘅一個地方，

熟悉到喺嗰度嘅時間分分鐘多過喺屋企

竟然會有一刻因為去呢度而緊張

嗰種感覺好特別

不過的而且確唔到你唔陌生

事實上畢業之後我都唔係成日關注學校嘅野，

真係唔知依家變成點

人事甚至係地方都好，

的確係幾有新鮮感

跟住再望一望電話

見到已經過咗十二點半，

即刻拎部電話出嚟上instagram

睇下見唔見到我想見嘅野，

一睇暫時見唔到Michelle有出story

咁都放心啲，

冇幾耐就同佢去食飯

我好記得芊靈走咗之後，

我同Cyrus日日都去同一間餐廳食飯

真係風雨不改每日都去

除非嗰日唔使返學又或者放早，

不過嗰間餐廳幾年前執咗笠

我都唔知依家同佢去邊度食好，

最後就求撚其其去咗大快活

利申絕對唔係阿活打手

跟住都好正常冇乜特別

係食完之後出返去商場，

諗緊好唔好入去七仔買糖

不過算啦費事做多左

因為我真係唔想俾佢知道我咁多年都放唔低

特別如果知道咗佢有男朋友的話，

氣氛就真係好撚尷尬

考慮到最差嘅情況再加埋自己嗰啲死人性格，

都係唔好做咁多野

純粹當係見返一個好耐冇見嘅朋友就算

重要未知佢會幾點返，

嗰陣再望一望IG story睇下Michelle有冇update

結果都係唔見，

咁就唔諗咁多入咗去先算

途中見到好多師弟師妹

我估係今日校慶嘅工作人員，

著住校服咁樣周圍走，

特別見到有一對師弟師妹

慶幸重係講緊標準嘅廣東話

大家你一言我一語互不相讓，

個女仔口就硬不過表情都出賣咗佢

又令到我亂諗野

諗返起十年前喺同一個地點，

著住同一套校服嘅一對男女

嗰陣個女仔都係咁嘅樣，

成日喺度偷笑

十年人事幾番新，

明知好多野都已經唔同咗

不過偏偏就係唔小心諗返起呢啲野

Cyrus:「唔係講笑真係好耐冇行過呢條路 」

我:「你冇行幾耐我咪冇行幾耐

除非你條撚樣偷偷地返嚟 」

Cyrus:「戇鳩我使偷偷地 」

我:「點知你呀

對上一次係咪散學禮

定係A-Level放榜 」

Cyrus:「A-Level放榜先嘅 」

我:「又好似係喎屌 」

行下行下終於行到門口，

Cyrus:「終於到 」

其實我好想大聲講一句終於返嚟，

不過好撚多人喺隔離

同埋真係好撚戇鳩，

所以都係暗地裏同自己講就算數

希望今日唔好再一次帶住遺憾咁樣離開

用咗十年時間，

就係為咗呢刻換一個希望。