[真人真事][校園][純愛]《兩個我加一個妳》: 第一百一十六章
好喇去到呢一章呢
終於可以講返第一章嘅事，
我都知隔得比較耐唔撚好意思
中間講咗好多廢話
咁喺度順便提返各位第一章嘅事啦
話說喺上年十月嗰陣，
我同Cyrus都收到以前中學嗰個班會主席嘅whatsapp
事關我地有個班group，
咁多年都算keep到啦
幾個月左右會出嚟食下飯，
唔係話次次去不過一得閒嘅話多數都會出席
出嚟講下當年嗰啲戇鳩野
呢個唔妥嗰個，嗰個唔鋸邊個，
當時呢啲野好緊張架
中學雞係咁架啦，
依家睇返笑下就算
每一次出嚟都算係開心嘅
咁樣有一日主席話十月某個禮拜日，
我地中學會搞乜撚野校慶日
好似話唔知幾多年紀念
絕對歡迎舊生返去
嗰晚我地打機講咗啦，
我同Cyrus都會一齊返去
講真嘅咁多年真係冇返過去，
以前係因為自己好撚懦弱
唔係好鍾意重遊舊地嗰個感覺，
睇開呢個故都知我係吊兒郎當嗰種人
特別對於以前嘅野，
我真係好難先至走出陰霾
所以一直都冇返過去，
去到近幾年心態有啲轉變
反而覺得一個人返去冇乜意思
Cyrus條撚樣唔係成日得閒
我自己返去嘅話咪又係戇鳩鳩咁樣，
嗰陣其實好想回顧一次以前中學我成日去嘅地方
特別係某啲地方，
隔離總係會有芊靈
咁如果我依家一個人返去，
唔知點解會覺得，
成件事唔完整咁樣
所以一路都冇返過，
至於下個禮拜嗰個校慶日
其實我真係收唔到風，
究竟佢會唔會返嚟
你知啦其實我好想問
但係又唔想俾人知我重係放唔低
亦都諗唔到有咩方法可以婉轉啲去問
講真啦直接問嘅話，
呀水都知你係點啦
但我就係唔想俾人知呢個態度
所以真係完全冇渠道去了解
淨係知道我地嗰級好多人都會返去
我心諗到時咪好撚擠擁
咁多舊生都話返
唔知佢會唔會返嚟呢
咁耐以嚟嘅經歷，
已經教識咗我一樣野，
就係所有野都唔好幻想咁多
見步行步就算，
到時諗完之後但結果唔係我諗咁樣的話，
受苦嘅咪又係自己
見過咁多次鬼，
都已經怕黑。
當然跟住落嚟
終於有啲眉目
嗰個校慶係禮拜日搞，
話說喺禮拜六嘅時候，
我好似平時咁樣喺度碌ig
碌碌下見到Michelle影住套校服
上面有個校徽同埋prefect章
學校又咁好嘅冇收到佢嗰章
內容大致係話聽日會返去
跟住我見佢tag咗幾個人，
其中一個就係芊靈
言下之意即係芊靈聽日都會返去
嗰陣好興奮不過唔敢諗咁多
始終我真係撞板多過食飯
試過就知道做人都係保守啲好
直至我見到佢tag嗰啲人喺下面留言，
我就初步估計應該全部都會返
不過都未敢肯定住，
因為重未見到芊靈喺下面留言，
隔咗一陣再睇
就見到有句「好期待好期待好期待」
唔使望個username都知係邊個
當佢有好強烈嘅意願嗰陣，
就會將同一樣野打三次
哈哈真係咁多年都冇變
之後我就知佢會返去喇，
跟住又開始緊張
究竟如果真係見返嘅話講咩好呢，
祈求就祈求咗幾年
終於等到呢一日
唔知會點呢，
會唔會避我定係已經當冇野
唉你條撚樣算得上係乜野
邊個會對你咁上心
所以我諗佢事隔多年，
應該唔會再繼續避開我嘅
我嗰晚就係喺度諗點樣應對
咁難得見返一定要準備得好啲
唔可以再有差池，
最少都講返一句對唔住
當年我落咗去射籠見唔到佢個留言，
最後冇去到送機
我諗又稱唔上係人生遺憾
邊有咁誇張丫屌
不過一直以嚟都喺度等呢個機會
可以嘅話我真係好想親口講
即使佢已經唔再在意都好，
我都想了解自己呢個心願
講咗出嚟正式落幕，
其他野已經唔會去諗，
當然我都有同Cyrus講呢件事
Cyrus:「係咪真係會返嚟架
你知你幾撚好命水
」我:「屌你真係難聽過粗口
」Cyrus:「講笑啫咁樣講得應該會掛
」我:「希望啦真係好耐冇見過
」Cyrus:「如果見返佢係單身你會點
」我:「我冇諗過喎
因為我唔認為佢會單身
」Cyrus:「可能人地等你呢
雖然我不嬲烏鴉口
」我:「屌
唔敢諗咁長遠，
見返面傾到計都好夠
」Cyrus:「我真係未聽過你禮拜日會出街
起碼識咗你十幾年都未約過你禮拜日出嚟
」我:「點會一次都冇呀
」Cyrus:「肯撚定呀
我不嬲約你都唔會揀禮拜日
」我:「講真真係唔記得咗
」Cyrus:「知你籠野啦
」我:「唔講咁多喇打機啦屌
橫傳俾你
」Cyrus:「好
正到暈呀
」我:「屌你又飛機
」Cyrus:「垃圾手掣輕輕撳就咁撚大力
」打完機之後上床，
原來我都好耐冇試過快啲到聽日嘅感覺
特別係呢幾年，
永遠都係做
返到屋企就休息，
每星期生活模式都冇乜點變
冇咗後生嗰種幹勁，熱血，
係唯獨今晚終於出現返一種好想到聽日嘅諗法
原來咁多年都冇變
主導緊我心情嘅，
始終都係佢。