[真人真事][校園][純愛]《兩個我加一個妳》: 第一百一十三章

大學其他冇乜特別就唔多講

有冇溝女

梗係冇啦

我好明顯就係一條毒撚

同埋隨住年紀愈嚟愈大，



要諗嘅野開始真係好多

唔再係以前咁樣鍾意就一齊啦

我又冇條件做一個player喎

我都想屌完閪就算

或者問有邊個唔想丫



鬼叫唔靚仔又冇錢咩

唔係話認唔認命

而係出到嚟做野嗰陣先發覺，

太多野真係不能兼顧

咁啱我呢條毒撚好重視私人時間嘅



有返工嘅巴打就明，

禮拜六日難得放假真係好撚爽

同埋從來都唔覺得單身係好辛苦

食乜野做乜野全部自己話事

唔需要同人交代，

人始終都係要自私啲

我唔會話係劣根性，

的確係人之常情



睇下你因為自私而做乜野啦，

犯法嗰啲就梗係唔撚得

你話好似我咁樣一條友自由自在我又唔覺得好差啫

同埋唔知係咪真係開始變咗呀叔

開始覺得識人真係好煩，

變到唔想諗話題

返工已經要戴面具，



工作以外嘅時間我都想抖一抖

除咗個面具佢

反正我唔認為一定要兩個人先可以生存到

係呀冇睇錯呀我係講生存唔係講生活呀

生活太高層次好明顯我就係唔識享受

走唔出自己comfort zone

所以我真係好佩服嗰啲有勇氣走出舒適區嘅人

因為我覺得真係好難



我從來都唔敢去試，

因為我好怕試完之後會失去依家擁有嘅野

即係我係嗰種死都唔會all in嘅人

心態一直都係咁樣，

所以同同學同事相處都係有限度交流

傾計一定會傾嘅

不過唔會話傾得好深入囉



大家點到即止

當然啦身邊好多女仔都係豬閪

稍為叫做好樣啲嘅已經有仔

咁就唔做咁多野喇

安份守己做一個港奴算。

幾年前有單野好特別

真係好巧合，

信又好唔信又好冇所謂啦

咪當聽下趣聞

嗰日係2011年9月17日

一陣我會講點解會咁記得個日子

當時重係讀緊u，

話說嗰陣我就同一個男仔friend去旺角睇啲野

睇乜撚唔記得咗

之後佢問不如去朗豪坊行一陣先搭車好冇

咁我心諗你咁問得唔通話唔好咩屌

於是就一齊去咗朗豪坊喇

原本一直都冇乜特別，

點知跟住發生咗啲野

話說朗豪坊咪有兩條好長嘅電梯嘅

先係一條長嘅電梯

跟住要行多四五步就有另一條長電梯

一直上到去最頂

咁樣我地就搭兩條長電梯上到去最頂

跟住慢慢落返嚟，

因為嗰陣傾緊野都算幾好傾

所以就決定不如慢慢行啦傾完先返去

一上到去最頂就逐層逐層落返嚟，

各位都知朗豪坊上層嘅設計係橢圓形

我地逐層逐層落呢一定係環繞全層嘅

咁樣好正常啦冇乜特別

跟住行下落啲行下落啲，

就去返第一條長電梯到達嗰個位

即係要行多幾步先可以搭第二條長電梯嗰層呀

跟住隔離嗰個問我，

繼續咁樣慢慢落去定係一次過搭長電梯落返去

咁我就話唔趕時間繼續兜啦

於是我地再慢慢咁樣落返去

去到有一層(即係依家uniqlo嗰層)

咪有條好短嘅電梯落返去food court嗰邊嘅

咁我地就行過去搭呢條咁短嘅電梯落返去喇

我同佢一路行嗰陣就一路講野嘅，

嗰陣我應該屌緊唔知邊條撚樣

所以就冇特別留意側邊又或者迎面嘅人

突然間行行下我眼尾有一個好熟嘅面孔掠過

嗰陣真係好近，

因為我對住我個friend屌人嗰陣呢我係望住佢嗰邊嘅

佢就係企我右手邊，

咁我眼尾自不然會見到我右手邊迎面而嚟嘅人啦

不過因為嗰陣我個重點唔係放喺呢度

所以冇話好專心咁樣留意，

係去到好近嗰陣先至見到一個好熟悉嘅面孔

跟住即刻停低

擰轉面望嗰個人嘅背影，

第一眼望返過去就見唔到

因為真係好撚多人，

喺過咗幾秒之後啲人開始散開，

終於見返疑似係嗰個人嘅背影

不過嗰陣佢已經行得好遠，

隔離有男仔有女仔三四個咁樣

其實我唔肯定佢係邊個，

淨係覺得有啲似啫

唔通返咗嚟香港

跟住我個friend見我停低咗就問我有咩事

我話冇野呀繼續行啦咁樣

一路行嗰陣我一路諗，

究竟好唔好行返去

試下搵呢個人出嚟

其實我好想咁樣做

不過依家突然走咗去，

又好似唔係好尊重我個friend咁樣

無啦啦話走就走

呢個時候我個腦係好亂，

腦入面有好多諗法不過唔知點樣做

可能嗰刻嘅衝擊實在係太大，

直至我行到去臨落地下嗰條電梯嗰度

我知道唔可以再拖一定要迫自己做決定，

唉，

衰就衰啦反正都係一次

我同我個friend講，

我:「唔好意思見到有個舊同學

我返去搵佢先拜拜 」

我未等佢答就已經擰轉面

急步返去頭先經過嗰啲位

嗰陣我個腦同幾年前都係一樣，

就係希望唔好太遲

即使最後證實唔係我預想當中，

我都希望有呢個機會確認，

唔想再一次錯過

調返轉講即係冇進步過，

幾時都係要同佢玩伏匿匿。