[真人真事][校園][純愛]《兩個我加一個妳》: 第一百一十二章

係咁咦講下之後發展啦

雖然我都知好多人冇興趣理我呢條柒姑碌

當係俾面我啦屌

我都係講一章到唔會講好撚耐

喺度提一提時間線先



以免大家混淆

芊靈走嗰陣係08年12月嘅事

嗰陣係讀緊中六，

讀緊中六即係話好快就會考A-Level啦

記得嗰排我嘅生活就係溫書操卷



不斷咁樣循環

唔係講笑去到中七嗰陣，

我同Cyrus夜晚真係少咗打機

我地不嬲都係每一晚都打

可能大家都知嚴重性，



所以有啲野唔使講大家都識做

當然我有時都係好唔爭氣喺度諗

利申真係有時唔係成日

假若冇金融風暴的話，

對我嚟講情況有冇變呢

會唔會喺我A-Level路途上面，

出現咗多一個盟友

一齊捱過去



創造更加多回憶呢

不過好快我就會懶係好理智咁樣同自己講

再咁樣諗都係於事無補

辛苦嘅咪又係自己

不過要知道情感嘅野好難每一刻都咁理性

我唔想咁樣，

但唔到我話唔想



所以有時真係自己搞著自己，

好地地硬係要諗咁多野

最後我同Cyrus都係誤打誤撞咁樣入到u

重要係同一間添因為我地個選擇係一樣

大家個分又係差唔多

佢條撚樣高我一分

嗰陣我地都唔係好知咁多架

淨係知一齊讀一齊玩，



就冇理咁多

本身都真係冇乜特別興趣嘅科

既然係咁就不如好似中學咁樣囉

排序一樣就算

好彩最後真係得逞

咁就繼續一齊玩啦

至於係邊間就唔講啦，



費事相認柒到搵窿捐

我只係可以話清水灣嗰邊

其實都已經自爆咗哈哈

好多人都話上到u重唔係周圍溝女扑野

我想講你地冇估錯嘅不過嗰個唔係我囉

有冇理過我呢條毒撚嘅感受

唔係個個都咁好彩架屌

我嘅大學生活唔算好精彩囉

識做識到朋友嘅不過hi-bye friend囉

諗深一層都正常嘅

都已經過咗純粹交心嗰個年紀

有時係咁架喇冇辦法，

問啲咩都話唔知冇呀咁樣

又一日喇

真係見過好多傻仔俾人爆心事

情情塔塔嘅有變態嘅都有

既然前車可鑑又點會撞板呢

咁都撞抵撚死啦啱唔啱先

不過讀緊大學嗰陣，

難免會諗返起中學嘅規則

人真係好撚犯賤

過咗去又懷緬以前嗰啲枷鎖，

從前最反感嘅野，

依家竟然走去感觸

唔知講乜好，

戇鳩仔一個

好記得老母問我留唔留低啲中學校服

佢話唔要嘅話賣出去，

我好快就同佢講要留喺度

又唔係窮到要靠呢啲錢開飯

屋企雖然唔係大不過未至於擺幾件衫都冇位

留低啦咁樣，

跟住佢都冇理我話知道就算

對我嚟講，

著呢啲校服嘅日子應該係我最開心嗰個階段

無憂無慮好舒服

我都講過啦，

未轉校之前真係好唔鍾意轉校，

不過時間唔同答案都會隨之而有變

我好慶幸當日有轉校，

冇呢個舉動我諗我唔會有依家嘅野

開心唔開心嘅回憶都好，

呢套校服就去見證者

亦都係我活過嘅證據

所以即使依家唔著都好，

都唔會拎去賣，

喺我執緊呢套校服嘅時候，

就見到當年有個女仔送俾我嘅嗰件黑色出街衫

好耐冇著過，

一路都唔敢著

可能依家過咗幾年喇，

已經釋懷，

終於再敢重新揸上手

哈哈好彩自己都冇點走樣

就咁望都應該重著到

跟手我就諗住摺返件衫啦

突然之間我就見到件衫背面嘅右下角又係有三個字

好撚細隻嘅白色粗體英文字，

以前冇留意過

「YCL」

驀然間我諗起同一個人送俾我嘅波衫，

都係有呢三個字

再記返起當日嗰個msn內容嘅其中一句


「“Y”stands for your」


我諗我大約都明係點解

諗通之後我唔再好似以前咁樣，

抱怨自己點解咁撚蠢

反而係無可奈何一笑

哈哈

咁多暗示邊夠你玩呀，

至少我一定唔夠

所以大家嘅關係就好似依家咁樣。