[真人真事][校園][純愛]《兩個我加一個妳》: 第一百一十章
收線之後我就打返俾呀宏
即係頭先我未接來電嗰個電話
唔知係咪真係咁撚唔好彩
佢電話通呀不過就冇人聽
直覺話俾我聽，
佢搵我應該係關於芊靈
純粹直覺唔好問點解
跟住再打多兩三次都係冇人聽
突然間靈光一閃，
係喎可以試下打俾芊靈
睇下依家會唔會有人聽先
點知同晏晝一樣
都係冇開電話
我真係唔撚知咩事
唉算數啦，
今日都唔知撞咗幾多次板
都係死死氣返屋企
食埋個飯先再算
返到屋企我就冇入去房用電腦
呢個都係我不嬲嘅習慣
從來都唔鍾意身水身汗返入房
覺得咁樣好撚污糟
大佬個個都係我瞓嘅地方嚟架嘛啱唔啱先
由細細個開始習慣都係咁樣
一定係沖完涼先入房嘅
落街買野食唔計啦，
夏天放完學周身汗都要返去沖涼先入去房用電腦
所以嗰日我都唔例外
拿拿聲食完飯就去沖涼，
沖完涼跟住就返去房用電腦
一入到去見到個螢幕
出現咗啲意想不到嘅事
我見到有人msn搵我
咁我梗係打開嚟睇，
跟住原來嗰個係芊靈嚟
打咗段好撚長嘅野出嚟
嗰陣邊容許too long didn't read
梗係即刻碌返上去睇下佢講乜，
我好記得碌上去嗰陣，
我係好緊張
好想睇但又好驚睇到一啲我唔想知嘅事，
所以我特登唔望嗰啲內容住
一拉拉上去先，
跟住逐啲逐啲碌落去
以前msn會顯示日期架嘛
一路碌嗰陣先發現原來我地好耐冇傾過計
原本係幾日一次，
一傾傾成版
內容好撚無聊
不過傾計氣氛好好
好多都係秒覆
係去到12月開始，
出現咗有一段真空期
直至到今日
2008-12-19，
對話框先至有返內容
終於可以慢慢睇下佢講乜野。
「壹仔呀，
你依家睇到嗰陣，
就係我準備出發去機場嘅時候喇，
哈哈好似電視劇咁樣添，
我第一句特登咁樣打架。
其實呢我糾結咗好耐，
究竟臨走前搵唔搵你好，
諗咗好耐……
最後都決定打，
或者你應該估到呢排我避開你，
我亦都覺得你應該知，
所以喺度配合緊我，
大家都冇出現喺大家眼前，
你可能會感到不解，
跟住落嚟我會講架喇，
唔奢求你會諒解我，
亦都唔苛求你會明白我，
我只係好想單純咁樣講，
我點解咁做啫，
我知你從來都唔鍾意睇咁長篇嘅野，
不過我都知你從來都係把口硬，
成日都話唔鍾意好多野，
不過我講兩講你就會肯做，
可唔可以再試一次，
唔理你為咗乜野原因都好，
破例一次試下睇晒佢，
真係一次咋，
之後唔會再有多一次喇，
多謝你。
其實我好想講好耐，
我從來都未見過一個男仔行埋嚟識女仔嗰陣，
係問一啲無聊iq題架！！！
知唔知成件事幾唔浪漫，
我重記得你講咩呀，
邊個區成日水浸丫嘛，
唔使否認我係唔會記錯，
你知我記性好好架啦，
重要根本就唔好笑，
但係你就係咁喺度笑喎，
搞到我都笑埋，
根本就唔係用條題目嚟引我笑嘅，
最初識你嗰陣都係覺得你好得意，
點解成個腦都係呢啲無聊iq題，
喺度講埋俾你知丫，
其實呢平時啲人問我iq題，
我係唔會估架，
唔係因為我冇iq你唔使咁快入我位喇，
而係我估野真係好差，
唯獨係你嗰啲唔合理唔好笑又好無聊嘅iq題，
我係真係會去諗，
未識你嗰陣夜晚我瞓覺嗰陣真係有諗呀！！！
絕對唔係講大話，
同埋重有一樣野，
喺我分手之後，
好多男仔都主動行埋嚟我身邊，
有唔少都好友善咁樣同我示好，
不過感覺其實真係唔多好，
簡單講即係太過拘謹，
可能佢地驚講多錯多啦，
每一個字聽落去都好似係有鋪排咁樣，
我覺得咁樣唔係正常傾計嘅模式，
係唯獨你呢條友，
講野粗俗都死，
從來都唔會收口，
平時又冇記性，
成日唔記得野，
旁人睇落去咁多缺點嘅一個人，
正正係令到我覺得好舒服，
相處得好自然，
每次同你傾計嗰陣都會好開心，
呢幾年都係咁樣，
其實呢好多時我都係為鬥嘴而鬥嘴，
因為好想聽你嗰啲甜言蜜語哈哈，
次次你都會講到天花龍鳳，
不過我又受喎，
明知係假不過我都係好鍾意聽。
你好明白我，
知道我鍾意啲乜唔鍾意啲乜，
不過另一個角度睇，
你都好唔明白我，
因為你睇唔穿我鍾意邊個人，
或者唔可以將個責任推俾你，
其實我都有我嘅問題所在，
一路唔敢同你講，
因為我好驚你唔鍾意我，
當同你講清楚之後你會唔接受，
可能有人講得冇錯，
愈重視一樣野就會愈保守，
所以一路都冇明示俾你知，
只係一直暗示同埋係咁提你，
希望有一日你會知，
“Y”stands for your，
依家諗返起以前應該大膽啲，
不論你係咪鍾意我都好，
我都應該親口同你講，
唔應該用埋啲所謂嘅暗示，
重新嚟多次的話自己就會識做，
不過呢個世界從來冇呢回事，
錯過就只有錯過，
無論你有幾遺憾都感動唔到時間，
佢都唔會理你有咩諗法，
只會低著頭一直向前行，
冇一樣野可以阻止到佢步伐，
至少我同你都唔得啦。
九月十月嘅時候我知屋企有呢個決定，
而且重知道唔知幾時會返嚟香港，
可能幾年可能十年，
我唔可以拖住你成世，
我好想咁樣做但真係唔得，
所以一定要同你分開，
不過嗰陣真係唔知點樣同你講，
中間有兩個月其實有好多時間空間，
不過我真係唔能夠下定決心同你斷絕聯絡，
所以一直擺喺心入面，
繼續同你相處催眠自己，
係直至12月我知道真係好快會走，
既然終須一別，
又唔想無啦啦好似人間蒸發咁樣，
突然唔見咗，
所以下定決心同你講，
長痛不如短痛，
雖然我都拖咗好耐喇……
同你開口嗰一刻重緊張過會考，
明明成件事好簡單，
不過都係會毛管直豎，
我從來都冇諗過「我要走」呢三個字係咁難講出口，
對住任何人講我都唔覺得係一件難事，
我重會安慰返對方添，
唯獨係對住你，
就連望你眼神都唔敢，
因為好驚你會融化我個決心，
到時又講唔出口，
知唔知有一刻我好憎你，
我憎你點解唔敢叫我留喺度，
嗰陣我重有奢望你可以俾勇氣我，
其實係架，
如果你話唔想我走，
我真係會同daddy媽咪講，
唔擔保一定得不過會有膽量同佢自己嘅諗法，
不過諗深一層其實我更加憎我自己，
成日都咁軟弱，
我好想好自私咁樣留低，
不過依家關乎到我一家人，
唔係淨係我一個，
我真係唔可以咁自私，
為咗自己私慾而唔過去外國，
我知以daddy個狀況去外國投靠我姑姐係比較理想，
媽咪都有咁樣同我講，
壹仔唔好意思，
真係好對唔住，
我冇勇氣去自私，
我知道如果我再係咁成日同你一齊，
去到走嗰日對大家都唔係好事，
與其留戀倒不如乾脆決斷一啲，
所以我選擇咗一個好差嘅方法，
就係特登避開你，
其實每一日我都好想行過嚟你班房，
好似平時咁樣一齊返屋企，
不過我知道我遲早都要適應，
既然係咁就不如俾自己一個緩衝期，
對你對我都係，
否則我認為我自己走嗰日更加唔習慣唔開心，
壹仔呀壹仔，
喺度再講一次對唔住。
當然我講就咁樣講，
不過好明顯你講中咗，
我都係一個口不對心嘅人，
我知我要同你斷絕聯絡，
不過真係唔忍心，
我好希望重搵到啲蛛絲馬跡係同你有關係，
所以我特登叫咗我媽咪，
去買你屋企用開嗰隻柔順劑洗衫，
我每一次搭巴士挨住你膊頭嗰陣，
都會聞到呢一陣味，
初時有啲唔習慣架，
不過慢慢就適應咗，
重覺得好好聞，
有時明明唔攰都要挨住你膊頭，
就係咁解，
你係咪講過點解我要成日聞你件衫，
其實就係呢個原因，
我好想記得呢一陣味，
每次聞到呢一陣味就會知道中學嗰陣，
隔離永遠都有一個男仔，
我係咁鍾意同佢一齊，
我係咁鍾意同佢出街，
最重要最重要最重要一點，
就係我一直都咁鍾意佢，
我依家著緊嗰件衫，
同埋我帶過去嘅衫，
都係有用呢一隻柔順劑，
我好想一陣搭飛機嗰陣，
耷低頭嘅時候會聞到你陣味，
去到一個新地方嗰陣，
夜晚瞓唔著嘅時候又可以聞到你陣味，
唔知點解就覺得好安全好舒服，
呢排晚晚瞓覺嗰陣我都係咁樣，
跟住自己隻眼就好唔爭氣咁樣濕咗，
但我真係唔可以拖住你一世，
唔可以對住你講任何承諾，
因為連我自己都唔知自己可唔可以遵守，
壹仔呀壹仔，
你要記住第日搵女朋友嗰陣，
一定要好好記性，
記性唔好嘅話你就會成日唔見野，
例如上到大學嗰陣，
你要叫佢提你拎水樽，
因為你成日拎出嚟飮，
飲完就擺喺地下唔記得擺返落書包，
同埋如果嗰日落雨，
你叫佢一定要提你帶遮，
特別係搭巴士嗰陣，
因為唔提你嘅話一定會唔記得拎，
你冇睇錯呀係一定呀，
重有，
你要講埋俾佢聽你有好多野唔鍾意，
唔鍾意去戲院睇戲，
寧願喺屋企睇，
去海洋公園唔鍾意玩機動遊戲，
因為你好驚離心力，
淨係鍾意玩摩天輪，
就係貪佢夠慢唔刺激，
你唔鍾意食buffet，
因為你對生蠔同埋長腳蟹冇乜好感，
對你嚟講食野最緊要係方便，
淨係鍾意食日本魚生其他魚你都唔鍾意，
又唔食得辣喎，
唔鍾意燒野食淨係鍾意打邊爐，
唔止咁少呀你知你好煩，
你要提你將來個女朋友，
無時無刻都要預備你通街唱歌，
特別係啲少人嘅地方，
因為你一諗到就唱，
你要叫佢一定要識陳奕迅，
因為如果對方唔識嘅話，
你自己就會覺得冇咁過癮，
都唔知咩人嚟成日都逼人聽，
好彩我有聽啫如果唔係真係唔識，
重要提佢你係一個好貪玩嘅人，
無時無刻都想整蠱人，
叫佢唔好咁易嬲，
因為愈嬲就會愈整蠱得多，
你就係一個咁變態嘅人，
最後最後就係一定要叫佢好鍾意你，
因為如果唔鍾意你，
係包容唔到一個咁特別咁奇怪嘅你，
有人就係可以咁鍾意你，
一直都包容咗你幾年，
所以先夠膽咁樣講。
原諒我前言不對後語，
嚟到最後真係就嚟走，
就俾我自私一次，
八點鐘我就會入閘，
理性上我係唔想見到你嚟，
不過情感上我係好想好想好想見到你，
希望你會嚟啦，
再同你講嘅野都唔多，
喺張生日咭同你講晒，
提示係五點鐘，
我好記得我地第一次一齊放學嘅時候係五點鐘，
哈哈我係唔會記錯架，
希望你會明白係點解啦，
估唔到去到最後都要暗示，
我走咗之後其實冇乜特別，
都要繼續奮鬥落去，
你講過話好想入到大學，
你唔係蠢一定得架，
加油加油加油，
同埋你每日放學一定要記得帶齊手冊功課筆袋銀包水樽，
你知你記性幾好架啦，
去到呢度都冇咩好講，
最後一句就送返你曾經唱過俾我聽嘅歌詞俾你啦，
有借有還，
大家冇拖冇欠，
好喇唔講咁多，
再見。
原來這裡沒有你 原來世界沒有那麼美」
睇完佢個訊息嘅時候，
再望望右下角，
顯示為22:00，
遲咗幾個鐘不特止，
重偏偏多咗一分鐘，
乜都冇早過，
就係早咗六十秒。