[真人真事][校園][純愛]《兩個我加一個妳》: 第一百零六章

望住佢走，

我都要落返去上堂架

一路上堂嗰陣，

腦入面一路諗呢件事

其實我重有一絲希望佢只係鳩吹



雖然我知好唔真實

睇佢反應都知唔係講大話，

不過成日講嘅，

其實人從來都係唔願意接受自己預期以外嘅野

總係會諗好多所謂嘅藉口出嚟，



從而去滿足自己

唔係話唔知道真相，

只係唔想去接受

倒不如自欺欺人嚟填補自己心靈，

好明顯我就係呢啲戇鳩仔啦



當日我一路冇將呢件事同任何人講過

我諗過同Cyrus講，

不過嗰陣好多人同埋點都係上緊堂

咁就費事搞咁多野啦

跟住好快就放學，

呢一堂老師成日都遲放

當佢一話放學之後，

我就即刻望出面睇下見唔見到芊靈



因為平時佢一定係出面等我

我出到去佢第一句就同我講

「帶齊啲野未，

手冊功課筆袋銀包水樽 」

不過今日就唔見咗佢

唔知點解嗰陣有個預感，

我同佢可能以後都返唔到好似尋日咁樣



你冇睇錯真係尋日

短短一日已經咁大變化，

有邊個諗得到，

嗰陣我好想sms佢，

不過諗諗下頭先佢搵我嗰陣個氣氛咁尷尬

佢依家亦都冇過嚟搵我，

如果再去煩住佢好似唔多好

同埋佢都話好快就走，



可能真係唔得閒做咁多野呢

結果最後我就冇sms佢

自己返去屋企。

跟住嗰幾日，

可能大家都估到，

我同佢真係好少見面

真係可以忽然之間冇聯絡



明明大家同一級，

班房係同一層，

講緊只係一個禮拜之間嘅事，

唔係完全冇見嘅

朝早集會見到啦，

不過都係見佢背面

平時小息食飯上堂去揸水嗰陣，

經過佢嗰班門口都特登望佢啦

我又唔想刻意咁去望，

嗰陣我要扮灑脫丫嘛屌

我都講過啦，

反正佢終歸都要走，

我寧願一早接受以後冇佢嘅日子

好過到佢真係走嗰日，

大家好似奔喪咁樣喊到成地眼淚鼻涕

同埋我覺得佢有意無意咁想避開我

之前有提過，

我同佢平時係喺學校嗰個乜撚野園林休憩區食飯嘅

不過自從嗰日之後，

我就再冇見過佢喺嗰度

我都喺度諗，

其實都真係唔知點樣面對佢

可能佢同我同一樣諗法啦，

所以特登唔見我避開我

講明先呀嗰陣我係唔知真相係點架

只係我自己推斷(ff)出嚟啫

最衰嘅係我地嗰班啲老師成日都遲放

每次放學嗰陣我都想過去搵佢，

不過每次都係嚟遲一步

去到佢班房嗰陣，

永遠都係人去樓空

我可以做嘅，

只係最卑微咁樣喺走廊出面望入去見到佢

不過講真都唔係成日見到佢，

有時小息得閒過去廁所揸水經過佢班房，

佢個位周不時都唔見人

哈哈唔通真係咁了解我

知道我想趁去廁所嗰陣望佢，

所以小息就特登唔喺度

係咪我諗多咗

唔知啦，

不過可以肯定嘅係，

依家個處境，

就好似當初想識佢嗰陣咁樣

搵嚟搵去都真係搵唔到佢

唔同嘅係，

當年我係好熱衷於去起佢底，

不惜行十幾層樓梯，

穿過幾多個班房嘅情況之下，

都要搵到佢

依家反而係有心無力，

成日都會諗既然佢都就嚟走，

自己個心態係咪應該咁堅持呢。