[真人真事][校園][純愛]《兩個我加一個妳》: 第九十六章

之前咪講過踢學界嘅

好唔好彩第二場已經輸咗

跟住第三場又輸埋

正式宣佈因為得失球唔夠高出唔到線

老實講又唔係真係好唔開心嘅



始終實力真係有差距

成班人都知道自己嘅能力去到邊度

如果真係出到線咪又係俾人屠

大家都有心理準備所以冇話崩潰

Cyrus:「唔係講笑頭先真係差啲啲 」



我:「咪就係

黑哨嘅

屌你點會冇12碼 」

Cyrus:「痴線嗰球我笑撚到肚痛

睇撚住佢冇掂到你



跟住你成個仆街

嗰條友目定口呆好撚好笑 」

我:「戇鳩上次你夠手球

我冇道德你都唔係好我好多 」

Cyrus:「點會根本就係頭 」

我:「屌你嗰度都係頭

咁唔怪得龜頭都係頭 」

Cyrus:「不過算係咁啦依家都係輸得失球



本身真係諗住一場都贏唔到 」

我:「唔係個第一場搏到12碼

一場都贏唔到呀 」

Cyrus:「仆街你又要準備講十年

肯撚定你講到你個孫出世都重講緊 」

我:「屌 」

Cyrus:「無啦啦做乜屌 」



我:「咁都俾你發現咗 」

Cyrus:「屌識咗你幾耐 」

跟住執好晒野出到去就見到芊靈喺度

一行到去佢就拎咗個金牌出嚟

唔撚係講笑真係金牌

圓形嘅又唔係好大塊

拎上手望一望，

上面見到有個no.1字樣



芊靈:「你贏咗喇

雖然得一個參賽者 」

我:「呢個乜撚嚟架 」

芊靈:「你係咪盲

呢個好明顯係金牌啦 」

我:「幾過癮喎屌

邊度買架 」



芊靈:「你理得我丫

要就要唔要慳返 」

我:「要

多多都要 」

芊靈:「係咪好靚呢 」

我:「老實講就真係麻麻

騎騎呢呢都唔知似乜撚 」

芊靈:「搞錯呀講啲咁嘅野

死人頭就算真係唔靚都唔使咁講下話 」

我:「不過係你俾我就加好多分囉

咁就變到好撚靚 」

芊靈:「痴線我係唔會信你架 」

我:「真係你買架 」

芊靈:「梗係唔係啦

自己整架 」

我:「你自己整 」

今次到我變咗「唔撚係掛.jpg」

芊靈:「係呀

你以前冇學過DT咩 」

我:「咸豐年代嘅野邊度記得

就算有我都冇乜印象

我應該係搵其他人幫我整

極唔鍾意手工藝

你地女仔唔係上家政嘅咩以前 」

芊靈:「係呀

不過又有咩關係呢 」

我:「咁點解你會識整 」

芊靈:「屋企有親戚做呢啲

佢教我做呢塊牌架

不過九成都係自己做架

淨係嗰啲字樣我搵咗佢幫手因為我唔識

嗰日我得閒又知道你條友一定贏唔到冠軍

咁咪自己整順便可以安慰下你個傻仔囉

點知你條友竟然冇喊重好似冇所謂咁樣

早知慳返算數

依家重要俾人嫌棄呀

騎騎呢呢唔知似乜喎 」

我:「唔係喎

依家我覺得好靚喎

學界嗰塊有咩好拎

阿豬阿狗都拎得嘅

呢塊就唔同呀

知唔知我係特登唔入波搞到輸波

就係為咗拎你呢塊牌 」

芊靈:「係咪真係難為你喎 」

我:「唔係好難為嘅

有人重辛苦喇啱唔啱先 」

芊靈:「邊個呀邊個好辛苦呀 」

我:「唔知呀

好靚嗰個囉 」

芊靈:「哦 」

我:「唔好咁孤寒啦

大方啲俾我見到你個笑容好唔好 」

芊靈:「唔制 」

跟住佢就係咁擰去前面喺度偷笑

到我望前佢就望向另一邊

佢條友真係好唔誠實

我唔係講佢偷笑嗰度，

而係講佢塊牌

依家塊牌都重保持得好好，

我知你地會問，

乜塊牌個外型冇被侵食咩

咁我當然定期有用嗰啲油去清潔喇

特登為咗呢塊野去買嗰啲清潔物品

喺我第一年抹嗰陣，

我擰佢後面睇

見到有好多點點

初頭我以為係污糟

我就係咁喺度捽

但係捽捽下先至發現唔係污糟

啲點好似兩個英文字母，

我喺度打出嚟啦睇下你地覺得似唔似

定其實只係我ff



真係好似上面嗰幅圖咁樣

當然啲點冇咁大粒啦因為塊牌都唔係大

佢嗰陣冇講過，

我亦都好戇居冇真係好細心咁樣睇過

淨係見到前面嘅no.1就冇睇後面

咁多年嚟直至到依家，

我都好想問清楚佢究竟我有冇估錯，

定其實只係亂咁點

我好想親口聽佢講真正答案，

就算佢講一句係我諗多咗根本冇特別意思，

我都好想聽

不過諗一諗，

瞇埋眼吸一吸氣，

都係算數啦

因為根本問唔出口，

當然啦如果淨係得呢樣，

我都唔會話佢唔誠實嘅

後來先發現原來唔止咁少，

重有啲野都係諗到頭都大

難過當初我問佢嗰啲無聊iq題好多好多好多倍。