[真人真事][校園][純愛]《兩個我加一個妳》: 第九十五章

可能你地未必知啦

我個年代係facebook啱啱喺香港興起嗰陣(其實都唔記得係咪)

唔撚係講笑真係好誇張

特別隔離係同班同學嗰陣

第一句就係問你有冇facebook



當然啦依家已經變咗係廢老廢中先至會用

後生嗰代都唔會再點樣玩

想玩遊戲就可以玩手機game

要分享近況就可以去instagram

不過的而且確十年前facebook真係好流行



我好記得我係點樣拎芊靈個facebook

唔係嚴格嚟講係佢問我先

話說有一日放學嗰陣搭巴士

上到去上層坐低佢就即刻問我

芊靈:「喂喂喂你有冇facebook呀 」



我:「喂喂餵冇名你叫 」

芊靈:「唔好意思囉

咁你有冇呀 」

我:「有呀做咩 」

芊靈:「搞錯呀開咗唔加我做friend 」

我:「我擺明係跟潮流開啦屌

我唔玩架喎 」

芊靈:「唔玩都可以加做friend啫 」



我:「你返到去加我啦

xxxxx。」

芊靈:「好呀 」

返到去冇幾耐我就收到邀請

佢條友真係加咗我

一去佢profile睇，

頂一張相都冇



唔使搵梁國雄議員都已經睇唔到

我:「冇相嘅 」

芊靈:「點解要有相 」

我:「唔係點樣認你 」

芊靈:「有名架嘛 」

我:「講堅你擺相上去一定釣到好多傻仔做friend 」

芊靈:「你好想咁咩

到時大把男仔我就唔得閒搵你呢個閒人架喇 」



我:「咁你擺相上去我都有份受益

同埋我唔撚信你會理嗰啲戇鳩仔 」

芊靈:「下

我平時放學搭巴士隔離咪有個囉 」

我:「嗰個點同

我就唔信有第二個人會咁戇鳩日日戴住啲糖喺身 」

芊靈:「咁又係呀哈哈 」



我:「警告你唔好將嗰啲乜野遊戲邀請send俾我呀

唔會玩同埋極煩 」

芊靈:「得喇唔使咁驚喎

我都好少玩嗰啲game 」

我:「係先好唔好得個講字 」

芊靈:「你估我係你咩成日講大話 」

我:「痴線每一句都係真心 」

芊靈:「成日鬧人痴線

根本你先係 」

我:「係咩乜我成日講咩

真係唔知喎 」

芊靈:「唔使唔認呀肯定係

同你每次傾計一定會講幾次 」

都唔知佢係咪鳩吹

因為我自己都唔知

但係我假設佢冇的話，

佢條友啲觀察力真係幾勁

基本上唔止一次，

佢真係觀人入微嗰種

真係不得不佩服

之後有一日我同佢一齊帶呀bi去散步

行行下佢無啦啦拎咗部相機出嚟

我:「嘩點解你今日帶咗部相機出嚟 」

芊靈:「又係你話影相丫嘛

咁咪帶相機囉 」

我:「喺屋企影唔得咩 」

芊靈:「出嚟影靚啲 」

我:「痴線你屋企點會唔靚過呢度呀

順便可以炫富 」

芊靈:「冇你諗得咁衰囉

真係覺得出嚟影靚啲 」

我:「都唔知你個腦裝乜 」

芊靈:「唔好講咁多喇快啲幫我影啦 」

我:「我幫你呀 」

芊靈:「唔係你重有邊個呀

我同呀bi影呀

你就負責揸機

完美 」

我:「講明先唔識影相

影得唔好屌細力啲 」

芊靈:「係喇死人頭 」

跟住就幫佢影

咔嚓一聲之後，

我:「你睇下點 」

芊靈:「嘩真係好似麻麻地喎 」

我:「屌一早講咗 」

芊靈:「唔緊要有時間慢慢再影過 」

結果跟住影咗好多張

我:「夠皮啦下話 」

芊靈:「睇緊呀等陣先啦

喂喂喂呢兩張幾靚喎 」

我:「睇過 」

一張就係佢坐咗喺張櫈度

摸住呀bi同埋視線係向住佢

另一張就係抱住呀bi望住鏡頭

芊靈:「你話邊張靚呀 」

我:「張張都咁靚喎 」

芊靈:「認真呀死人頭 」

我:「搵唔到一張係唔靚 」

芊靈:「痴線口花花 」

我:「口花花唔係重點

重點你又暗爽

嗱嗱嗱嗱嗱

又笑喇 」

芊靈:「邊張靚呀快啲講啦

真心徵求你意見 」

我:「不如問你鍾意邊張多啲 」

芊靈:「兩張都靚喎 」

我:「兩張都靚

但係我見你成日停留喺呢一張度喎 」

亦即係視線向下望住呀bi嗰張

芊靈:「哈哈係咩我自己都唔知喎

咁好啦就呢張啦

唔該晒 」

我:「明明就有答案喺度扮野 」

芊靈:「咁我都係信你先問你啫，

係咪先 」

我:「係呀係呀係呀 」

芊靈:「不如我地三個影一張丫

自拍我揸機 」

我:「好你話點就點啦 」

跟住就係呀bi擺喺中間

我同芊靈就好似左右門神咁樣喺佢隔離

唔係講笑我都覺得呢張相幾靚

返到去一早叫芊靈send返俾我

收到之後上facebook

真係見到芊靈用晏晝坐喺凳影嗰張相做icon

樓下班狗公係咁喺度擦鞋

真係非常可恥

我心諗梗係影得靚啦

我影架嘛屌你