[真人真事][校園][純愛]《兩個我加一個妳》: 第五十九章

可能大家都會問

點解我呢條蛋散，

一路都冇約芊靈聖誕節出去呢

先唔好講佢得唔得閒應酬我啦

我淨係講自己先



事關我係唔鍾意喺大時大節出去

毒撚我就梗架啦

我都唔會否認

但係講真大時大節出街真係好煩

條街又迫喎



去親旺區梗係車水馬龍

行幾步又停一停

周圍都係人

講野唔得暢順

所以往年大時大節其實真係唔係好想出去



以前細個就唔敢推人啦

依家開始有自己諗法梗係推啦

幾個月前中秋咋嘛

芊靈諗住約我去海旁嗰度一齊玩

我都少數推咗佢

因為真係唔鍾意身處一啲好迫嘅地方

總係唔夠自然

未去到人群恐懼症嘅我諗



但係唔鍾意就一定

既然唔鍾意就不如喺屋企做自己鍾意做嘅野啦

雖然嚟嚟去去都係嗰幾樣

講出嚟可能大家覺得好悶

有冇搞錯呀嚟嚟去去都係呢幾樣

乜你唔厭嘅咩

事實大把人都有咁同我講過



但係我其實係好鍾意悶

特別係依家出嚟做野之後

禮拜六日可以放假我都係極少出去

個個禮拜都係咁

雖然都係不斷重複咁樣做同一樣野

但係我真係好享受悶嘅感覺

嗰種乜都唔諗放空一切

對我嚟講係好舒服



所以由細到大從來都唔怕悶

當然遇到啱傾嘅朋友，鍾意嘅女仔，

咁就係第二回事啦哈哈

一個人點會完全冇雙重標準

最少我唔會冇啦。

記得當年平安夜前兩晚

芊靈無啦啦搵我



芊靈:「sms搵你唔到

都估你用緊電腦 」

我:「你好醒呀芊靈姐

使唔使頒個獎俾你 」

芊靈:「使唔使一嚟就咁串 」

我:「講笑啫

做咩呀 」

芊靈:「平安夜有冇人約

睇死你都係一支公啦 」

我:「今日你心水幾清喎

估親都中 」

芊靈:「咁平安夜嗰晚不如出街啦

好想睇燈呀 」

我:「大時大節唔使預我

何況出去睇燈一定好撚多人 」

芊靈:「搞錯呀又推我 」

我:「幾時有個又字呀 」

芊靈:「之前中秋先推完

一齊出去啦好冇呀大哥 」

我:「你搵你啲friend啦 」

芊靈:「我地約咗25號呀

24號有幾個都係約咗男朋友 」

我:「咁又係呀你唔好阻住人呀

平安夜晚就梗係積極咁樣埋牙 」

芊靈:「又想講咩呀 」

我:「講得白就唔好笑啦 」

芊靈:「又講衰野

點呀出唔出呀 」

跟住我自己喺度諗

其實平安夜對比中秋節，

點講都係大啲嘅節日丫

加上重要係單獨同佢出

其實諗諗下都唔錯喎

我:「怕撚咗你

得呀得呀 」

芊靈:「好野

咁我卜打邊爐好冇

夜晚一齊再去睇燈 」

我:「你叫得有得話唔好嘅咩 」

芊靈:「嘻嘻其實你真係好醒目 」

我:「你卜場呀 」

芊靈:「得啦懶鬼無聊人死人頭 」

我:「咁究竟我係邊個名 」

芊靈:「唔知呀我鍾意叫邊個就邊個啦哈哈 」

我:「你睇下我

咁唔鍾意出去都特登陪你

換嚟嘅就係懶鬼無聊人死人頭

心淡 」

芊靈:「由這一分鐘開始計起春風秋雨間

限我對你以半年時間慢慢的心淡」

我:「付清 賬單

平靜的對你熱度退減」

芊靈:「一天一點傷心過　這一百數十晚 　

大概也夠我　送我來回地獄又折返人間」

我:「春天分手　秋天會習慣 　

苦沖開了便淡」

結果我地喺度好無聊咁樣貼歌詞

起碼貼咗六七首

呢啲真係淨係同佢玩

其他人想玩一句就屌柒佢無聊啦

我:「低b咁都玩一餐 」

芊靈:「你冇份玩嘅 」

我:「陪你咋

第二個睬佢都戇鳩鳩 」

芊靈:「咁呀

多謝囉 」

我:「唔使咁好口 」

芊靈:「我講你平安夜嗰晚呀

蠢人 」

我:「應份嘅應份嘅 」

芊靈:「咁我卜到場再講幾點啦 」

我:「好 」