[真人真事][校園][純愛]《兩個我加一個妳》: 第五十八章

十二月都唔使講咁多廢話啦

大家都知有咩節日

先係平安夜跟住聖誕節

最後就係除夕

咁當然啦，



放聖誕假之前就梗係有聖誕聯歡會

我地個聯歡會係喺放學後搞

中一至中七全部都係同一日舉行

喺度講啲同芊靈冇關嘅野啦，

費事又話我掛住講佢唔講其他人



可能大家都知今次呢個聯歡會

係最後一次成班人聚埋一齊

因為聽聞同學會考之後會離開學校

去外地讀書，

又或者係出嚟做野



嚟嚟去去都係呢兩樣啦

至於我呢條蛋散

當然都係以原校升讀中六做目標

亦都係最多人嘅做法

我自己真係冇乜錢去外國讀書

就算真係有，

我都夠膽話自己唔適合去

記得一開頭已經有講



我自己就好犯賤嘅，

雖然唔係好眷戀香港

但係要我離開呢度幾年我就一定唔捨得

先別論關唔關芊靈事

係呀嗰陣真係好天真

竟然會諗埋芊靈

唔好意思又講多咗



返返嚟先

你要明白我係好唔鍾意重新適應嗰個感覺

即使我知道出去外國讀書

有幾多好處都好啦

即係嗰啲乜撚野訓練獨立能力呀，擴闊眼界乜乜柒柒

問心我係完全同意出外國讀書會有好處

但就係唔想重新適應過

我知你地會話未試過你點知



喂大佬呀

做咗十幾年人話長唔長話短亦都唔短丫

自己鍾意啲乜唔鍾意啲乜，

我唔認為有其他人比我自己更加了解

如果連自己都唔知自己想點

每一次都試過先知，

咁我會覺得好失敗囉



當然啦嗰陣時家庭唔係一個重要因素

因為我雙親都比較容易話為

我想出去，

佢就會俾錢

我唔想出去，

佢就唔會迫我

老實講有幾多人喺中學時期，

會咁生性下下以家庭為首

全部都係諗自己架啦

再不孝啲，

可能諗自己暗戀嗰個女仔重多過屋企人添

好明顯我就係呢種人啦

話時話我都唔知芊靈佢會唔會考慮出去外國讀書

雖然我知其實唔係好關我事，

咁自己都會想知丫

以前中學暗戀人嗰陣係咁架啦

幾平凡嘅野，

只要係關於心入面個女主角，

好自然會主動想去了解

當知道係咩一回事之後，

就牢牢記住

低b就低b架喇

嘥咁多時間心機去記一啲同自己冇關嘅野，

不過自己會樂在其中，

一個人獨處嗰陣諗起就會傻笑

想同人分享但又驚俾人白眼

不斷滋生矛盾嘅感覺。

聖誕聯歡會內容冇乜特別

嚟嚟去去咪又係咁，

食下野玩下啲戇鳩遊戲就走人

反而想講當晚返到屋企，

即刻問芊靈會唔會有出去讀書嘅意向先

可能今日晏晝接觸得多呢方面嘅野

所以就變得好想知佢有冇呢個諗頭

您剛剛已送出來電震動

我:「係喎你會唔會出去讀書 」

跟住就見到佢個狀態由忙碌變返做線上

芊靈:「做咩咁問呀 」

我:「冇

想問下啫

喺度扮忙 」

芊靈:「咩扮忙呀 」

我:「一搵你就由忙碌變線上

又真係幾忙喎 」

芊靈:「你唔知喇有啲人好煩

咁咪長時間較忙碌囉

你睇我幾俾面你

係喇做咩無啦啦咁樣問 」

我:「冇

晏晝聽到有啲人都話會考之後諗住去外國


想問你會唔會啫 」

芊靈:「你好驚我走咗去咩 」

我:「梗係啦

知唔知你就係我生存嘅動力

力爭上游嘅原因

如果你依家走咗去，

我自己都變得前路茫茫 」

芊靈:「咁你準備前路茫茫都得喇 」

我:「你講真架 」

芊靈:「哈哈同你講下笑咋 」

我:「戇鳩 」

芊靈:「你自己唔係

夠成日喺度講笑啦

邊個上次呃我會去外國讀書 」

我:「小姐都差唔多半年啦

使唔使咁記仇 」

芊靈:「下

隔半年咁短點會唔記得

講咗你唔好睇小輕我嘅記 。」

我:「真係唔好爭你錢

唔係俾你記成世 」

芊靈:「你知就好啦

依家都係諗住一路原校升上去

跟住讀U 」

我:「點解唔去外國

你屋企大把水俾你去外國啦 」

芊靈:「唔知點解我覺得自己唔適合長時間去外國

去旅行一個禮拜兩個禮拜就還好

一講到幾年我就有啲保留 」

我:「其實我都係喎

講真真係唔昆你 」

芊靈:「實係咁啱啦

我又一定信你啦 」

我:「心靈相通呀

似唔似嗰啲浪漫愛情小說 」

芊靈:「唔似囉好冇

都冇一個男主角係咁口花花嘅

講啲野誇張到死 」

我:「證明你睇嗰啲小說實在太狹窄

男主角性格全部都係斯斯文文高大靚仔 」

芊靈:「即係話你都唔會出外讀書 」

我:「如無意外就係 」

芊靈:「即係有意外就去 」

我:「都係保守啲啫

費事有咩意外啦係咪先 」

芊靈:「奇奇怪怪

都唔知係咪又想呃人 」


青春的預言無數 有哪個信守到老