[真人真事][校園][純愛]《兩個我加一個妳》: 第五十七章

秋季旅行完咗正式踏入十二月

唔知大家重記唔記得，

我地學校每年都有個文化節

重要每次都係喺復活節之前搞

不過唔知點解今年提早舉行



喺十二月頭就嚟料

但係都唔關我事啦

因為中五中七兩級係唔需要參加

可以返去玩但係唔使準備

記得中五嗰年最後我就冇返去嘅



芊靈有叫我去但我話唔想返去

可能嗰陣我真係好懶好攰

去到最後佢話夜啲帶埋呀bi一齊散步

等佢去完文化節先，

兩人一狗其實咁樣真係幾舒服



特別係慢慢行嗰陣，

又唔會太凍

可能本身我唔怕凍啦

呀bi個死仔又聽話

唔會亂咁嚟周圍撞

當然隔離重有芊靈喺度啦

行完之後話想食野

咁按照慣例，



就係先擺呀bi返去佢屋企先

我就喺樓下等

點知嗰日情況有少少唔同

芊靈:「上嚟等啦

啱先咁大風 」

我:「唔係幾好意思嘅 」

芊靈:「放心啦屋企冇人呀 」



我:「咁樣你會好大鑊喎 」

芊靈:「你會做得啲咩丫

要做一早做咗啦 」

我:「可能我就係等緊時機

到時我連自己做咩都唔知呀 」

芊靈:「無聊鬼行你就行啦

雖然你係一個變態佬

不過



你唔似係嗰種 」

我:「你講乜春呀 」

芊靈:「總之唔係啦

唔好睇少女仔嘅直覺 」

我:「好信你信你 」

講真嗰句，

出發之前完全冇諗過件事會咁樣



都算叫做意外收穫

跟住我梗係即刻對住呀bi細細聲講句叻仔啦

唔係佢我都未必有得上佢屋企

入到去佢大廈

私樓真係私樓

就連架𨋢都零舍大過人

又夠光猛

我:「係咪真係冇人喺裏面

有嘅話即刻走 」

芊靈:「放心喎我daddy媽咪唔會食咗你 」

我:「傻嘅佢地喺度我點樣做野呀 」

芊靈:「你個樣好明顯諗緊衰野

一定要淨化你嘅思想 」

我:「因住你捉老鼠入米缸呀 」

芊靈:「係喇係喇

出𨋢啦 」

一入到去

原來間屋真係幾大

未去到話有足球場有游泳池

但真係有個露台仔

目測有三間房

走廊好闊落

三個人住計真係好q大

同埋伯母執屋應該係好撚勤力嗰啲嚟

令到個空間望落去更加大，

跟住呀bi即刻去返佢個籠嗰度飲水

然之後就見到芊靈俾咗杯水我

芊靈:「頭先聽到你口渴呀

嗱 」

我:「好撚感動呀竟然聽到 」

芊靈:「費事嘥錢去買啦

水咋嘛上嚟飮咪得

定係你想飲檸檬茶可樂 」

我:「唔使喇水就得 」

我上人屋企從來都唔會周圍走，

即使係去Cyrus屋企都係

都係坐定定喺度聽佢講

始終去人地地頭亂咁參觀

自己覺得唔係好尊重囉

芊靈:「唔使坐定定喺度喎 」

我:「要嘅要嘅

你地頭丫嘛 」

芊靈:「重飲唔飲水呀 」

我:「你沖俾我多多都飲 」

芊靈:「無聊

俾你呀死人頭 」

我:「頂你間屋好撚整齊

犀利 」

芊靈:「媽咪全職打理屋企丫嘛 」

我:「唔怪得啦

走喇落去食野喇

拜拜喇呀bi 」

芊靈:「哈哈我平時都會架喎

對住呀bi講拜拜 」

我:「證明我地心靈相通囉 」

芊靈:「邊個同你心靈相通

痴線 」

就係咁，

今次就係我第一次上佢屋企喇