[真人真事][校園][純愛]《兩個我加一個妳》: 第六章

之後嗰一日，

諗住搭車嗰陣會見到佢啦

點知又見唔到

都唔知係咪個天喺度玩鳩我

無啦啦見到一日之後嗰日又見唔到，



跟住我醒起一樣野

係喎

我見到佢嗰日係留低做壁報，

亦即係話比正常放學時間遲咗一個鐘，

唔通係因為咁樣先至見到



所以之後我決定，

每日放學我都留低一個鐘左右

之後先至去搭車

其實為嘅只係見到呢個女仔

係咪好無聊？



其實我覺得係架

明明之前先話過唔想咁樣，

到頭來見完一日之後，

又故態復萌

不過我都唔係第一日自打嘴巴架啦，

唔爭在打多一次

結果之後嗰兩日，

我都喺學校留到四五點先至走人，



諗住實冇死啦

結果教訓我地凡事真係唔好咁樂觀

兩日都係食白果，

重要搞到我玩少咗幾鋪aoe

不過邊有得怪人

自己決定咁做嘅，

抵死啦，



跟住我又再喺度諗，

究竟咩方法先至係有效

呢半個月以嚟用親嗰啲方法都唔使得，

全部都係失敗

成日話下次實見到，

結果冇一次得

諗諗下嗰陣，

我發現我地操場係可以望到學校門口



雖然唔算好近但亦都唔使用望遠鏡嗰種，

況且小弟眼力相當好

次次身體檢查驗眼嗰陣都望到最低嗰行

咁就掂喇

反正Cyrus佢地成日問我放學一唔一齊踢波，

咁我就可以一邊踢波同成班人增進關係，

另一邊就可以望住學校門口



喺度睇住嗰個女仔幾時放學，

除非嗰個女仔唔放學喺學校留宿啦

如果唔係冇可能見唔到

同埋我認得佢係深藍色書包，

重要咁易認添

今次出必殺技，

實食冇黐牙。

跟住就喺度踢波啦

講開又講我地學校好奇怪，

踢波嘅人多過打籃球好多

所以其實係足球派去主導個操場

之後當然係一路踢一路望住出口，

扮哂野企喺度等波到

好彩冇乜人發覺我真正目的啫

托賴嘅係小弟都叫做識踢下波

咁就容易埋堆

你知啦做中學生唔埋堆真係好辛苦

乜都唔預你都還好，

針對你就大鑊

其實真係有啲似小型社會

原本重擔心緊點樣同呢班同學相處，

依家唔驚嚕

中學嘅男仔其實真係好易玩埋一齊

玩下運動，

大家輕鬆下笑下，

再喺度傾啲有共鳴嘅話題

咁就搞掂

我踢完一場之後就坐低休息先，

當然話就話休息啫，

其實就梗係望住學校門口啦

因為頭先都未見到嗰個女仔走

再望下自己手錶，

原來都五點幾，

我驚嗰個女仔會喺我踢緊第二場嗰陣走人

因為時間都唔早，

到時我再踢嘅話，

咁我冇理由玩玩下走人架嘛

所以就決定飲下野坐喺度睇環境順便抖涼，

噴下止汗劑，

費事打到身水身汗

一陣間又臭到人

各位巴打絲打一定明我講乜，

嗰陣汗味真係好難頂

我都好唔鍾意啲男仔小食或者lunch嗰陣玩到出晒汗，

一上返嚟坐隔離就大撚鑊

特別係開緊冷氣嗰陣，

完全唔通風

講下講下，

我好似見到嗰個女仔喺學校門口準備走，

隔離重有一個女仔，

九成九係佢朋友

咁我就梗係拿拿臨跟住佢地啦

急步行上去，

一出到學校門口，

佢兩個就係前面慢慢行緊，

今次冇走雞啦掛。