火花不等人: 她的回憶

沿路走了不到十分鐘，走到大涌口路，有個涼亭，她見到涼亭便說她走得累了，要坐坐。
 
「今日去咗邊嚟呀？」涼亭內我們並肩而坐，我問了一個不知道該不該問的問題。
「無呀，行下街咁囉。」
「點解又會可以同我食飯嘅？」我問了另一個不知道該不該問的問題。
「你想知咩？」
「想，我想‧‧‧搞清楚我地之間‧‧‧到底即係點‧‧‧」
 
袁頌婷沒有馬上回答我，她雙手放在身體兩旁撐著石櫈，兩腳在胡亂踢著，她抬起頭看著天涼地的天花，似乎在想著甚麼。
「你仲記得，個朝我問你路呀呵？」




「無可能唔記得喇。」
「你記唔記得，你最後話，帶我去個房班呀？」
「記得，跟住你無理我，就一支箭咁走咗去。」
「其實我好無方向感，唔止係行路搵地方，做人都有少少係咁，尤其係感情方面，所以我好怕一個人‧‧‧‧‧‧個朝早，我一路搵班房，一路就諗，如果佢係度，佢就會帶我行‧‧‧其實‧‧‧我係唔係應該再畀機會佢呢？一路行一路諗，幾乎遲到，就見到你。見住你好好心機咁幫我睇Floor Plan，我就諗，定還是係，我應該畀個機會自己搵其他人帶我路，搵其他人同我一齊行呢‧‧‧你教我路個陣，其實我發緊夢無聽你講嘢，哈哈。到你話﹕『不如我帶你去喇？』我先醒咗，心諗唔通係你？」
「咁你個時又走？」
「咁你又唔追？」
「唔好意思大人，請繼續。」
「我醒一醒又覺得，自己當時咁諗好低能，哈哈，跟住就好似有少少心虛，所以拿拿聲轉身就走。點知‧‧‧」
「點知‧‧‧哈哈哈哈‧‧‧」
「係呀低B！第一堂就遲到已經囉咖喇，仲要一坐底就見到你呀﹗」




「again, my quality, your honor.」
「跟住你無端端寫Memo紙畀我，我心諗條友仔都幾搞笑喎，小學生咩，仲係度傳紙仔，咁我又諗唔通你對我有啲嘢，哈。但係個一堂之後‧‧‧又覺得好似唔係喎，你都有我電話喇，但係成個星期都無搵下我，所以我覺得可能係我諗多咗。直至有一晚，我同佢通電話，好似有少少嗌交咁，佢都係唔係好明白我，講到我好似因為入咗大學，去完OCamp就識咗第二個咁，收咗線之後，我懵下懵下咁，Add你msn，點知見你條友唔係幾理我，我都有啲嬲嬲地，但係知道你原來啱啱散咗，其實個下我有少少開心，嘿。」
 
我「斜睥」一下她。
 
「咩呀？人之常情喇下話？」
「算你坦白，繼續呀唔該。」
「嗯‧‧‧我講到邊呀？」
「有少少開心」
「係﹗咁之後同你msn傾到好夜，第二日上完堂開會，你竟然敢膽投票畀Peggy而唔support我，離晒譜呀簡直﹗又無口齒喎，明明講好咗，又唔幫我聽電話﹗仲要拖著Peggy走咗去﹗」




「喂咪住先，我無拖著佢喎大人。」
「我唔理！總之你就同咗第二個女仔走唔理我﹗仲有呀，之後呀，諗住同你玩下之嘛，你又唔讓我！仲要嚇鬼我﹗你明知我真係會驚咖嘛！」
「嗯，你罐可樂我一直都無飲，收埋咗。」
「嗯，我有諗過，你會唔會見到罐可樂，即刻跑落嚟追我呢？我地會唔會因為咁而開始呢？我入咗地鐵閘口之後，都有啲後悔，點解行得咁快，我仲有諗過好唔好暗示一下，叫你嚟搵我呢？反正我屋企都唔係好遠啫，我地會唔會係樓企樓下公園坐天光呢？點知返到去，打畀你，你就‧‧‧」
 
原來袁頌婷也曾經跟我排演著同一場戲。