火花不等人: 婉拒

「你睇下。」
袁頌婷給我看一張貼紙相，可能是在銅鑼灣地帶拍的，也可能在旺角中心拍的，相中的男女笑得很燦爛，上面有個日期，14-2-2005。
 
「其實我無咩要求，我同你講過，我只係想有個人，同我步伐一致，可以陪我行，唔畀我盪失路。陳政，試過好多次，我都以為嗰個會係你，但係，我慢慢發現，原來你連你自想點都未搞清楚，我都唔應該太大期望。慢慢我就同自己講，可能唔應該再諗咁多，雖然我都想我身邊嗰一個係你，可惜，唔係。」
 
說著說著，袁頌婷雙眼帶點淚光。
 
「自後個晚之後，我就覺得好唔知點咁。我成日諗，如果個晚，兩件事唔係同步發生，可能結果會唔同呢？個晚其實我好想同你講，你所做嘅嘢無用咖，佢又唔知嘅，但係諗諗下，我憑咩咁肯定喎，或者你同佢仲有機會呢，又或者，我同佢都仲有可能呢。唉，總之我就好亂，我真係好怕啲嘢搞到咁複雜，因為我真係唔識Handle。所以呢，最衰都係你，見到你咁，我就會諗起佢，我就會諗佢會唔會因為我而咁傷心呢？你直情好似將佢嘅情況直播畀我睇。」
 
一直找不到插嘴的時機，我再次啞火。




 
「就算去到聖誕，你都係答我，你未完全放低佢，咁你叫我仲可以點？仲要錫咗你一啖，蝕底晒﹗」
 
「咁我仲有無機會？」
她沒有回答，雙腳繼續亂踢，但原本抬起的頭，聽到我的問題後垂下了。
「我要返去喇。」
「嗯，送你。」
 
袁頌婷點點頭，第一次讓我送她回家。