火花不等人: 小病一場 II

手軟腳軟的我來到了Common Room，看到Peggy正在房中間的圓檯上做功課，那份平常會跟我一起做的Accounts 的功課。
 
「早晨。」
「四點喇陳政。」出自Peggy口中聽見自己的名字，有種提神的功效。
「點解你會係度嘅？」
「探病。」一邊說著，Peggy放下筆記站起來，走到鋅盤旁的電磁爐，按了幾下按鈕，打開爐上的煲蓋，然後在她頭頂上的吊櫃取出一個湯碗及匙羹，Peggy先在鋅盤把碗及羹加了點洗潔精洗一洗，過水後再用抹手紙抹乾水漬。
 
將湯碗放在在電磁爐旁邊後，Peggy提起爐上的湯煲把內裡的東西倒進湯碗，然後把冒著蒸氣湯碗放在我面前，一碗熱騰騰的白粥。
 
「小心熱。」把手指放在兩隻耳珠的Peggy跟我說。




 
她提醒我注意熱的同時，自己卻徒手為我端上白粥。
 
為了不負她的一番心意，加上我真的餓了，二話不說便開餐了。
「點呀？」Peggy問。她又繼續揭筆記了。
我沒有直接回答Peggy，自行到湯煲倒出第二碗粥。
「識煲粥咁叻嘅你？」
「我自己住，自己照顧自己，所以都識煮下嘢咖。」很少有的，在Peggy臉上見到她帶點自滿的神情。
 
「無聽過原來你自己住。」




「你都好少問我嘢，通常都係我問你多，
「係咩？」我懷疑。
「係，問功課，問你同Chloe點，諸如此類。」
「哈，又好似係喎。」
「我諗我‧‧‧下個星期都係唔同你食飯喇‧‧‧」
「嗯？咳‧‧‧咳‧‧‧點解‧‧‧咳‧‧‧點解呀？」
「情人節，係應該留畀某一啲特別嘅人。」
「咳‧‧‧」我只有繼續咳，並後悔當時沒頭沒腦的向Peggy提出邀請。
「睇在碗粥份上，你老實答我一個問案。」
「咳‧‧‧」我只有點頭。




「我同你講應該留畀一個特別嘅人，你係唔係第一時間諗起Chloe？」
 
聰明的Peggy也有猜錯了，當時我腦內浮現的，不是Chloe，是袁頌婷。
「咳‧‧‧」我繼續點頭，輕輕的點頭。
「嗯，問完，唔洗再扮咳。」
沒有回答Peggy，停止「扮咳」的我去倒第三碗粥。
「我夠鐘上堂，再唔走就遲到，你好好休息下喇。」
「嗯，BYEBYE，多謝你啲粥。」
「喂，其實你訂咗邊度食飯？」步出門口前，Peggy轉身問。
「係西貢，做咩呀？」
「哈，問清楚，萬一撞到就唔好喇。Bye。」
 
除了第一下聽到的時候有點驚訝，就沒有預期中的失望，反而有點鬆了口氣。聰穎的Peggy提醒了我，情人節該預留給特別的人，留給那個第一時間出現在我腦海的名字。