火花不等人: 邀約

服了第二次藥，我再次昏睡過去，在讚嘆醫生相當「畀面」的同時我設定好閙鐘，免得今晚睡過時，沒有去等補完習的袁頌婷。
 
「做乜你今晚怪怪地嘅？呆呆地咁。」
「平時不嬲都係你嘈啫。」
「你病呀？」
「今朝發燒。睇咗楊仲儀，食咗兩次藥。」
「下？」袁頌婷伸手摸一摸我的額頭。「咁依家好啲未？做乜病唔同我講呀？」
「同你講咗會點呢？」
「你條友‧‧‧」袁頌婷強忍想向我出掌的衝動。「咁依家好啲未？做乜病唔同我講呀？」
「成日都係Hall昏迷嘛，食一次藥睡瞓幾個鐘，食一次又瞓幾個鐘，今晚都唔知仲瞓唔瞓到。」




「咁你成日都係Hall？有咩食呀？空肚食藥呀？」
「嗯‧‧‧都有食粥嘅‧‧‧」
「無情情有粥食？」
「嗯‧‧‧Peggy‧‧‧」
「Peggy買粥你食？」
「嗯‧‧‧正確嚟講‧‧‧係煲粥我食‧‧‧」
聽到我這樣說，袁頌婷板起臉沒有說話，她咬起飲管，手上的筷子撥弄著剛上枱的火焰牛柳粒。
「佢話下星期都係唔同我食飯喎‧‧‧」
「抵死」
似乎袁頌婷真有點生氣，但我反為在心中暗喜。




 
當晚的宵夜她都沒有幾句話，我亦找不到機會告訴她，情人節的晚餐我已經訂了座，並且很想她成為座上客。
 
食完結賬，我依舊陪她到地鐵站。在品香要走到就的地鐵站，由南山邨經城大停車場，袁頌婷說想去Locker取點東西，叫我不用送她。
 
「你唔驚一開Locker個陣有隻殭屍係你後面跳出嚟咬你咩？」
 
聽到我的恐嚇，在她依然沒甚表情的臉上，看得出她真的被我嚇怕了，這個平常「嘈漕閉」的女孩其實很膽小，神怪之事她完全不可以聽入耳，晚上睡覺也亮著房燈，所以我們從來未看過一齣恐佈片，晚上時份師生都不多，校舍很靜，把我的說話幻想出來的話面，令她當中腦內有一半忿怒一半恐懼。
 
「唔洗驚呀大人，有我。」我莫視她那雙如被女鬼上神，充滿怨恨的眼神，拖起她的手繼續走。