火花不等人: 聖誕快樂

「袁頌婷‧‧‧我唔想呃你‧‧‧未百分百‧‧‧」
「嗯‧‧‧」表情似乎有少許失望。
「正如，你都未完全放低佢。」
「你又知？」沒有否認，以問題答問題，十之八九我猜中了，但我沒有自討沒趣的追問，只是聳聳肩不置可否。

袁頌婷不想說，亦無謂強人所難。
 
我們相對望，半刻靜默後，袁頌婷把重心向我靠過來，她的額頭貼在我胸口上，我想伸手環抱著她，但我沒有。
 
因為，未是時候。




 
「陳政，我地Timing唔啱呀。」
 
對，未是時候。
 
起碼在這方面我們還有點默契。
 
「會唔會啱Timing個陣你又同咗第二個一齊咖？」她問我。
 
「你呢？你會唔會聽日就約第二個呀？」不再解釋這答案背後的意思了。




 
聽到我的反問，袁頌婷沒有回答，亦沒有追問，相信她也理解，在這種狀態下，彼此都無法要求對方許下任何承諾。
 
袁頌婷用手指在我左邊胸口用食指畫了個小圓圈。

「落我降頭？」
「你頭先話，我開始係你心入面有個位置，所以我依家要畫個地盤，呢個位，永遠都屬於我。」
「永遠？咁我唔可以鐘意第二個呀？」
「你咁花心，留少少位啫，唔好畀人知咪得囉。」
「哦，咁我係咪可以係你個心又畫個位呀？」




「食懵你呀！」袁頌婷坐直腰骨，沒有再依著我。
 
然後，同樣地，袁頌婷用食指在自己左邊胸口畫了一個小圓圈。

「嗱，畫咗，留咗個位畀你喇。」

不管日後袁頌婷是否仍然記得這個小圓圈，有過這一幕，我於願足矣。
 
那天晚上，袁頌婷堅持不讓我送她回家，說我身份不對。
「普通朋友都可以送咖啫，咁夜。」
「聖誕呀今日，幾夜都仲係好熱鬧咖。」
結果我們在地鐵站分別，回家途中，我收到袁頌婷的SMS說已安全回到家，我回覆她，問了一個問題﹕「頭先你係咪真係錫咗我呀？定係我幻覺呀？」

「真的」





「聖誕快樂，袁頌婷。」

「聖誕快樂，陳政。」