[新手][愛情][排球]那天我成為女之後 我的人生不再一樣: 46.一敗塗地
第二日返學，我返到去課室時見到Ada未返到黎，我就心諗Ada平時都唔會咁遲，點解今日會咁遲既呢，但都唔會有答案，所以我都係放低個袋就出左去兜個圈，我漫無目的咁係學校兜圈，兜兜下就去到Michael班房附近，我望一望，我見到佢未返到，唔知點解心入面有小小失落，但原先既我……只係打算周圍兜下，點解會兜左過黎既？
「你地睇下啦，條臭雞係度呀。」同學Ａ
「WOW，係喎，唔知佢係度做咩呢？」同學Ｂ
「佢咪黎睇下Michael係唔係度囉！」一把唔知係邊度聽過既女聲講
然後我望一望，原來就係之前係Ｍ記話我果個，雖然心入面係有Ｄ嬲，但亦都好唔開心，最後我知依加個個都好唔中意我，加上時間都差唔多，所以就走返上去。
返到上去，我見到Bianca返左黎，但係Ada都仲係未返到，咁我就問下Bianca
「喂喂，Bianca，點解Ada仲唔見人既？」我問
「佢？佢好似整親隻手，之後一陣去睇埋隻手，晏小小先返呀，做咩呀？擔心人呀？」Bianca掩住半邊嘴係度笑
「你做咩笑到咁奸既？冇呀，都係問下姐。」我鼓起泡鰓講
「哈，冇呀，睇黎你真……」Bianca都未講完，個鐘就響起既同時老師都入黎
之後就冇咩特別咁過左上半晝，我都依照約定同Michael食飯，其實又點會唔知Michael想點，不過…或者係我問題啦，我都係依加先知，Ｄ女成日話唔知點，原來係真事，原來有時真係唔知自己依加想點…
之後下半晝Ada都返返黎，見佢隻手包住繃帶，應該今朝一早就去左睇趺打，咁我都唔敢行去問佢，所以都係平平凡凡咁過埋依個下半晝。
依幾日都冇去參與練波，黎緊果場學界幾點同係邊打，我都係早排經Antonia講我先知道，依幾日我都係放學就返左屋企，就好似自我放棄咁，一返到去就頹廢。過左幾日就到左星期六既學界。
今次學界就係係友愛打，打朝早，咁都係一早去到熱左身，對猜開波殺波咁，到準備開波briefing時
「呀潔，你做咩依幾日都冇黎練波？」Miss問
「唔好意思呀，依幾日唔係好舒服…」我講
「拿，雖然你依幾日都冇黎，本應我就唔會比你出住架喇，但依加Ada隻手就未好曬，咁我都唔方便咁快放佢上場，咁我都唔想一下冇左兩個主力打依場波，所以依加你都同我出場。」Miss講
「知道。」我講
「拿，我同你地講，你地諗清楚你地今日黎係做咩，你鬥氣？定係黎打波？我唔要再見到早幾日既事一陣再發生係場上，understand？」Miss問
「知道。」大家講
咁我就行到出場，企返原先自己企開既位，今次係我地開波先，開波既都係Antonia。咁哨子聲一響就開波，四強就開始左。
因為始終都係四強，對面人腳都唔野小，所以岩先Antonia開既波，對面都成功接起，之後組織到一個功勢，但因為對面果球殺波既位置都刁鑽，所以後排隊友都係勉勉強強接起球波，波起到setter都唔係咁好，球波比較難set，所以set得一般，雖然係叫做set到去大槌度，但因為依加個大槌係第二個，技術未夠Ada咁好，所以依球大槌打左落網。
0-1
「唔緊要啦，依球好波黎架，下球做返好，仲有時間架，加油加油。」Antonia拍拍手咁鼓勵我地，但我見到場外既隊友都報以一個怨恨既眼神望住我，好似我做錯咁……
然後對面開波，對面開既波都比較大力同平，所以都幾難接，而且佢開既位都比較刁鑽，經常開落人同人之間既位置，令到大家有誤會，因為咁所以我地都連失左幾分，Miss都忍唔住叫停左我地。
「你地搞咩呀？之前都唔會咁架！頭先我講咩呀？下？仲記唔記得？」Miss問
「記得……」我地細細聲講
「記得你地又咁？！我唔知你地發生咩事？總之同我打好左場波再算。」Miss講
然後我地落返場，依加比數去到8-0，要一下子追返８分，確實唔容易，但唯有盡力啦。跟住對面開波，佢繼續開去一Ｄ尷尬位等我地難以接起個波，加上佢好似睇穿左我同佢地既默契唔好，所以都針住我同中槌個尷尬位開個波過黎，最後我地都係一球都救唔起，輸到14-0時，Miss就換左我出去，用第二個人頂替我既位置。
最後因為一開始輸太多，所以以25-6輸左第一場，轉完場之後，Miss冇點出聲，就只係叫我地打好場波就算。
第二場就出返Ada同我，full team上陣打先，一開波又係頭先果個開左十幾分既開波，今次我都好主動咁去救起佢既波，所以比佢開左幾分就成功截停左佢既攻勢。
然後到我開波，我都用小跳開波算，以免消耗太多體力，但對方都真係唔弱，我只係開左兩球，就被對面既人截停左。
今場波比起頭先果場好返Ｄ，起碼都唔係單方面比人ＳＭ咁，都叫做有來回，但去到14-18(我-敵)時，因為Ada既手傷，所以被逼換出場，最後因為咁樣欠缺攻擊力，我地今場以16-25輸埋，最後場數零比二咁無緣爭奪冠軍，只可以爭季軍。
我地執好曬野行出大堂，搵左個位坐低，Miss一開聲講
「我唔知你地今場做咩，其實對面佢地實力未去到好勁果隻，佢地有一兩個開波勁既人，但唔係個個都咁outstanding，你地做咩姐？下？今場我真係冇野好講，你地自己返去好好諗清楚你地今場做左咩黎，下星期練波再同你地講。」
然後Miss走左之後，隊友Ａ講
「一日最衰都係你個臭閪。」
「咪係！」隊友Ｂ
「下？……」我不解咁講
「話你呀臭閪，連你朋友Bianca都同你夾唔到，你諗你啦。」隊友Ａ講
我望一望Bianca，再望一望Ada，佢地兩個既眼神不若而同咁都係望住地下，我唔明點解我今場同Bianca既默契好似係０咁，成日都接唔起Ｄ尷尬波，所以我都冇聲出。
「冇野好講呢？搵仔你就叻，打波？！你食屎啦臭閪。」隊友Ｂ講
「好喇，你地講夠未？人地冇名你叫？」一把男聲講
我望向男聲既主人，原來係Andrew。
「ＷＯＷ，又走多個出黎，點呀護主犬？」隊友Ａ講
「你中意點講我都好，都唔好講呀潔！」Andrew講
「哈哈，咁中意條臭閪，慢慢返屋企攬飽佢啦。」隊友Ａ講
「算啦唔好嘈喇，走啦。」我講完就搵住Andrew走
出到去時，Andrew問我
「冇咩野嘛？」
「冇呀……其實你唔洗理我。」我講
「點可以呢，話曬我地都係朋友，點可以唔理你既呢？」Andrew講
「下？！」我講
「不如…我送你返去先？」Andrew問
「唔洗喇，我自己可以喇，頭先唔該你。」我講完就慢慢行
「喂！」Andrew大叫
「做咩呀？」我擰轉頭
「其實可唔可以比你電話我？平時傾下計都好。」Andrew問完上前，拎左自己手機出黎比我
我諗左諗，為左等佢唔好煩住我，我最後都有比佢。之後我就慢慢行出去輕鐵站，我一邊行一邊諗返起岩先既事，諗諗下，我前面既視線開始模糊，我既眼淚亦流出黎…