[新手][愛情][排球]那天我成為女之後 我的人生不再一樣: 47.溫暖的肩膊
我行到去車站，我見到有車到，就拿拿聲就衝左上車，我挨左係架車既車尾位度獨自抽泣，雖然好努力咁希望令自己唔好喊出聲，但幾努力都好，都係仲有少量既哭泣聲係我喉嚨發出……
「小姐….小姐。」一把男聲叫我
我望一望佢，但我就冇理到佢，我繼續無視佢
「小姐…你冇咩事嘛？」佢繼續講，但佢愈講，就好似哄得愈埋，我為左避佢，就愈縮愈埋牆角
「哎呀，Joanna呀，你做咩係度喊呀，唔好喊啦。」果個男講就想伸隻手去我塊面度，令我諗起當日……
「靚女，入黎一齊飲丫！」
……
「嘩，靚女塊面係真係唔同Ｄ，可以滑成咁，唔知其他地方會係有咩感覺呢。」
……
由我塊面，摸落去我條頸度，然後隻手繼續順住咁摸落黎，係我對波既中間滑過，之後一手揸左落黎，仲要係度搓，搓到我真係好痛，因為佢真係好大力咁揸。
……
個腦只係識得搞女，Ｄ男真係好乞人憎…
個腦只係識得搞女，Ｄ男真係好乞人憎…
個腦只係識得搞女，Ｄ男真係好乞人憎… 「呀!!!!!!」我踎左係度尖叫，個男好似比我嚇一嚇，然後咁岩架到左站之後，個男就即刻落車跑走左
「妹妹，你冇事嘛？」一個姨姨行左過黎問我
我望一望果位姨姨
「冇事，我諗返起Ｄ野姐。」我企返起身，抹抹眼淚同佢講
「小妹妹，岩岩先果個男既有冇對你做Ｄ咩呀？」姨姨問
「冇呀，但佢好似想摸我塊面……」我講
「你係唔係有過唔好既經歷呢？」姨姨問
「係呀，你點知架？」我問
「其實都唔難估既，唔介意同你講啦，姨姨我以前係鄉下地方，都有人係試過比人拖埋一邊咩左架，咁我就好好彩冇遇過啦，但就見過有就比人咩左，咁個反應都似係你咁，我都明白比人咩左個感覺既…」姨姨感歎咁講
「下……er……姨姨呀，我諗你誤會左喇……」我唔好意思咁講
「姨姨我點會誤會啦，你既反應都係架喇，不過千其唔好自暴自棄呀，錯既唔係你，而係果Ｄ衰人呀，知唔知呀？你唔好因為咁既事而遷怒於人呀，知唔知呀呀妹？」姨姨講
「下？姐係……？」我不解咁問
「姐係話，可能你有不快既經歷，但比不快經歷你既人還比不快經歷你既人，總有人係對你好既。可能你會覺得，因為比人咩左，男人就只係識咩咩既生物，但我覺得總有好既人，如果你唔肯定佢係唔係真係一個好人既，我相信日久見人心，到時睇清楚再諗都未遲呀，千其千其唔好咁快將自己既所有交出，等你確定到果個人真係好既，再交出都未遲呀。」姨姨講
「姨姨……點解你好似知道我諗咩咁。」我問
「唔知架，或者都係比人咩過既人既通病啦。」姨姨講
「其實呢我……」我想澄清講
「姨姨我到站喇，珍惜對你好既人呀，我睇你，其實應該係一個內心善良既人黎既。」姨姨講
「下……」我無奈咁講
「好啦，ByeBye喇。」姨姨講完就落左車
仲係車入面既我都仲係一頭霧水，真係唔知佢想點，但佢講既野又不無道理……其實……Michael係真係對我好，定只係想同我搞……我差Ｄ比人搞左，搞我既人固然係衰，但又唔係個個都係衰人既，如果我玩人，玩中既係個好人，咁我就真真正正係一個衰人……的確收兵係一件樂事，但…….被我玩既人，佢地心又應該都唔會好受……
係我諗緊野既時候架車就到左站…..我返上屋企沖涼時，個腦只係諗住個姨姨講既野，唔知點解覺得個姨姨講既野其實就好似知我個心諗咩咁，句句都係隊落去我既痛處……
我沖完涼，換完衫望望個鐘，見差唔多時間就出去，係車站度，我都繼續諗緊岩先姨姨講既野
「Hello，Katrina，好耐冇見。」一把熟悉既聲音講
我望左一望，原來係Desmond。
「Hello，Desmond。」我講
「你做咩呀，你對眼，好似好紅咁，你係唔係喊過黎呀？」Desmond問
「你睇錯啦。」我講
「係咩，依排搵你你都冇點覆我既。」Desmond問
「係呀，近排忙住打波比賽嘛，黎緊又有test，咪小睇電話囉。」我講
「原來咁，咁……」Desmond未講完
「好啦，我有車喇，再講啦。」我講完就上左車，我對住Desmond揮揮手就走左
我去到屯門大會堂之後，就去左搵Michael，話咁快就搵到佢
「Hello，Michael。」我講
「Hello，呀潔，你真係黎左呀？」Michael問
「係呀，你誠邀喎，冇理由唔黎啦下話？」我講
「就開始架喇，我入去準備先，比張飛你先，咁一陣用依張飛入去就得架喇。」Michael講完遞左張飛比我，之後就轉身行入去，唔知點解望住佢入去，我好想叫住佢，但又好緊張…..
「Michael！」我叫住佢，然後我feel到我雙頰有Ｄ熱熱地咁
「？做咩呀？」Michael問
「加油。」我講
「一定。」Michael講完，就轉身行左入去
望住Michael行左入去時，我透左一個大氣，先發現原來自己隻手握得好緊，我心諗，點解我會咁緊張既……
等左無耐，就可以進場，當我地坐低曬時，好快就開始，一開始都係一Ｄ比較細既小朋友既表演，經過左一輪之後，我仲心諗點解Michael都仲未出場呢，依個時候…
「咁大家都聽左我地好多小朋友既演奏喇，咁依個時候不如轉下channel，聽下大朋友既演奏呢，有請許啟鴻為我地表演Czardas，請大家掌聲鼓勵。」
啪啪啪啪啪啪啪
我行出黎時，我真係忍唔住全情望住佢，佢一舉手一投足，我都望到實一實……首歌好快就完左，我雖然唔識欣賞，但聽到我都覺得好勁，我係果一刻先感覺到，有才藝既男仔，係特別吸引。
到完左個音樂會之後，我去左後台搵Michael，當我想行入去既時候就比人阻住左，話唔係團員唔可以入去，當我打算出返去等時…
「呀潔？！」Michael叫我
我就即刻擰轉頭，Michael佢行左出黎，捉住我隻手拉左我落去地下果層，然後佢帶左我入去一個唔知咩位之後佢先肯放手。
「我頭先表現點呀？」Michael問
「好好啦。」我笑笑咁講
「多謝你，因為……我想比最好你。」Michael講
「下？！……」我比Michael既說話嚇左嚇
「點解你對眼好似紅紅地咁既？」Michael問
「冇….冇呀。」我講
「係喎，今日你場學界點呀？入唔入到冠軍賽呀？！」Michael問
「入…唔到。」我愈講愈細聲
「點解既？」Michael問
「算啦…」我講，講完我眼線又開始模糊
Michael見我咁，就講
「有咩唔開心，唔介意可以同我講，你要我既膊頭，我可以借比你，只要你唔介意。」
我聽完之後都忍唔住挨左落去Michael既膊頭係度喊，唔知過左幾耐，到我開始冷靜返時，我就推一推開Michael
「Sorry」我講
「唔…唔緊要。」Michael講
「頭先失禮曬…」我講
「咁可唔可以講我知發生咩事呢？」Michael笑一笑問
我望到佢既笑容，其實真係好安心，加上岩岩佢既肩膊，真係…好溫暖。