[新手][愛情][排球]那天我成為女之後 我的人生不再一樣: 44.尷尬
我笑一笑答完Michael「你中意囉。」之後我心諗，你都係想咁姐，另外我又心諗，反正依排如果冇人陪我食既都會係自己食，真係又有咩所謂。
食完之後我同Michael行左出Ｍ記門口，就傳黎一把女聲
「唉，條小騷貨又係度姣仔喇。」
「係囉，冇計啦你唔恨得咁多架喇，人地有樣有身材，人靚聲甜，邊似你呀。」另一把女聲講
「咁又係呀，只係條頭髮都滑過我，香過我，邊度夠佢玩丫。」頭先第一個講野果個女講
然後我就望一望佢地，佢地兩個就用不屑既眼神望一望我，我大概認得佢地係隔離班既女，佢地兩個外表唔算太差，普普通通既女，但就八婆格囉，相信大家都明我講咩架喇。
然後Michael就搭一搭我膊頭，佢依個舉動嚇一嚇到我彈一彈後，我又feel到塊面開始暖暖地，然後Michael好似有野想講時
「唉，你睇下你睇下，人地幾識玩，仲可以玩到比人搭膊頭都面紅紅咁，邊個唔中意丫係唔係先？」頭先第一個講野果個女講
「又真呀，咁勁，我有機會都想學下野呀。」頭先第二個講野果個女講
「好喇喎，你兩個洗唔洗係度單單打打，有咩就直接同人講，唔洗咁樣講人既，而且你地咁樣講好hurt人架，你地又有咩證據證明人地係真係有做過人地所講既野？冇丫嘛，冇就收聲啦。」突然Michael爆seed就鬧佢地，我都呆左咁望住Michael，果下又真係幾型棍既
最後果兩個女既急急腳走左去，跟住Michael就望住我講
「呀潔，唔洗理佢地講咩架，最緊要既係你自己冇做過。」
「嗯……」我講
之後返返去學校既路段，我地都靜左，到就返到去學校時，Michael突然開口問
「係呢，呀潔。」
「咩事呀？」我問
「想問下你，黎緊星期六你會唔會得閒？」Michael問
「今個星期六…」我若有所思咁答，其實佢咁問我都知佢應該想約我，然後我諗一諗佢頭先果一番說話，原來想幫自己鋪路
「我今個星期六要打學界，你問我得唔得閒做咩事呀？」我講
「冇呀，就咁既，因為我學琴果邊黎緊星期六下晝就有個小型既音樂會，咁想約你去聽下，其實之前都有係whatsapp問你架，不過你就冇應到我。」Michael講
「係咩？哈哈，唔好意思呀，因為我比較小睇電話呀，嘻嘻，你…唔…再覆你好唔好？」我笑笑口咁問佢
「當然可以啦，過幾日就係，咁個小型音樂會就下晝三點半開始，大約一個鐘鬆Ｄ，完左仲有個小聚餐，如果你可以既，不如黎聽下？」Michael好興奮咁問
「嘻嘻，今晚whatsapp答你啦。」我笑笑答佢，講多兩句就好快返到學校門口
「咁我返上去先喇。」我講
「今晚等你whatsapp，Bye。」Michael講
咁我笑一笑，就慢慢行上去，係我行緊上去既時候，我諗返去頭先Michael講既野，同埋……我居然係想去聽個音樂會，點解呢…？而且…我仲有小小期待佢今晚搵我。
咁我見仲有小小時間，就去一去第二層既廁所先，因為費事又出事啦。咁好順利去完之後，行過果層既走廊之後，打算係另一條樓梯上返去課室，咁我臨上去時，我就見到殘廁，果一刻我就靈機一觸，就係之後去廁所時去殘廁就算。
咁諗完就返左上去，一如以往，返到入去課室時，同學都以一副厭惡既眼神望住我，咁我心諗又唔我錯，又做唔到Ｄ咩，就一於小理，到行返埋位時，見到Ada同Bianca佢地係度傾緊計，咁Ada應該一早望到我入黎，我望佢時佢係眼尾都唔望下我，可想而知，Ada有幾憎我；而另一邊廂，Binaca就又望Ada又望我，佢既眼神就好似好唔好意思咁，我見Bianca好似好難為咁，所以我都冇理佢，就咁坐返埋自己個位就算，當我坐低左係度時，我就諗起…星期六學界，琴日已經冇練波，但今日要練波，仲專登book左體育館比我地練習多Ｄ體育館，因為近我住果頭所以我今日冇拎衫，但依加同Ada搞成咁，一陣練波都唔知點算好。
咁好快打鐘上堂，上完堂之後我就返屋企，當然，依加依個情況就我自己返去啦，咁返到屋企之後，我打開左衣櫃既時候，我就係度諗，究竟我去唔去好。想去，係因為我就算覺得自己打得唔係咁好，但又真係好中意打排球，但一諗到我同Ada既關係搞成咁，又真係好尷尬，而且係唔知其他人會點諗我。
最後我都係忍唔住，係衣櫃拎左套衫出黎換，著件風褸，拎埋護膝，拎齊野拎埋袋就出發。
當我等緊lift時，Antonia就打比我
Antonia：喂，呀潔
我：？
Antonia：單野搞到咁，你今日仲黎唔黎？
我：黎呀，出左門口架喇，依加過黎，你呢？
Antonia：就到你樓下喇，一齊？
我：好呀，邊度等呀？
Antonia：就…大快活門口？近唔近你？
我：大…好，都近既，就大快活啦。
Antonia：好，咁一陣見啦。
我：一陣見。
咁我落到去，去到大快活門口等Antonia，望住入面既枱枱凳凳，就諗返起早排Ada佢約我食早餐，我同Ada既友情…唉，估唔到真係脆弱成咁，一段長時間慢慢建立既關係，只係一個剎那就被人摧毀，唉。
「呀潔。」Antonia叫我
「Hello, Antonia，好快喎。」我講
「緊係啦，搵緊依個比人杯葛既心理難民喎。」Antonia攬住我手臂，塊面挨住我上臂講
「咩難民呀，咁深奧既。」我問
「咪就係你因為比人杯，冇地方可以容納你既心，你個心四圍咁走，仲唔係難民？」Antonia講
「我對眼都做埋太空垃圾添。」我斜視Antonia講
「下？點解既？」Antonia問
「聽完你句野之後我反白眼白到上太空，對眼落唔返黎。」我講
「……」Antonia唔知講咩好
「Sorry囉，dead air左，行未？」我問
「哈哈，咁係嘛，真係唔知比咩反應你好，唉，我心照明月，但明月照屎渠，心淡喇心淡喇，等我仲專登快快手黎搵你等你冇咁Sad。」Antonia講
「係喇係喇，最有心果個係你喇。」我沒氣咁講
「係囉，知我有心呢。」Antonia好自豪咁講
好快我地就行到去體育館，大家見到我都冇好似我同班同學咁用極厭惡既眼神望我，不過就都冇同我打招呼，我見咁都講左聲「大家好」，除左Eva有理我之外，其他人都冇點理我，Bianca我就睇得出佢唔好意思應我，所以就算啦，最後仲見到Ada佢望到我之後就拎住個波行去場邊對牆打，真係好尷尬，居然除左Eva之外係冇人理我…