[新手][愛情][排球]那天我成為女之後 我的人生不再一樣: 43.改變的契機
企左係商場既我，到係依一刻明白到原來所謂既朋友，係咁既時候就會唔見曬，情況同叫你揀partner，分組時蝦拋低一樣，直接Ｄ既例子就係Ｄ女朋友會問男朋友，佢同佢呀媽趺落水佢會救邊個既問題差唔多，簡單講就係到要選擇既時候，被選擇既往往唔係你。
咁我企左係商場，我都要搵Lunch食，咁我就自己周圍行下睇下食咩好，咁行行下，就見到有一個男既同我Say Hi，我認得佢係5D既許啟鴻，見Ｄ人叫佢做Michael，點解會記得佢，因為佢係音樂科第一，同埋Ｄ人叫佢做「小提琴王子」，傳聞佢小提琴係好勁果隻，但樣就一般般，雖然有Ｄ女埋下身，但就唔知佢點解會冇拖拍，但埋佢身Ｄ女好似話都唔差架喎，咁當然我講緊既係我仲係男既時候既事啦，如果你話依度既話，我就緊係明佢點解有Ｄ女埋身但冇拖拍啦！不過咁諗起，識音樂既人真係殺食Ｄ架咩？
佢跟手就行左埋黎問
「咦呀潔，你得一個既？」Michael問
「哦…係呀，你呢？」我問佢
「我？冇呀，一向朋友唔太多，可能我用左好多時間練琴而冇識唔到人啦。」Michael講
「呀…咁你就應該識多Ｄ人喇。」我講，其實我真係唔多想理佢
「你無錯呀，所以我依加就聽你講，去識下你。」Michael講完就望住我，我果刻心諗，嘩ching你轉數咁快，點跟呀
「哈哈，你平時係唔係咁想追女仔架？」我真係唔知講咩好
「我冇追過女仔架。」Michael講
「但聽人講你身邊都好多女架喎。」我笑笑講
「嘩，咁真係天大既誤會喇。」Michael耍手擰頭，好緊張講
「咁你睇中左邊個姐。」我笑笑口問
「睇中…」Michael若有所思咁，然後望一望我，我見佢咁樣望一望我，我身都不其然咁向後彎一彎
「哈哈，唔講你知住。」佢講完就摸摸我個頭，我比佢依個動作嚇一嚇，後退左一步，仲Feel到塊面熱熱地
「呀，Sorry，我…平時咁樣摸小朋友個頭。」Michael講
「唔好意思呀，因為我有教琴，通常都咁樣摸下小朋友個頭讚下佢，搞到你紅都面曬，Sorry.」Michael再講
「你有讚我咩？」我問
「咁你乖嘛，值得咪讚下你囉。」Michael講
「……」我唔知講咩好，但我Feel到我塊面比頭先好似更熱
「係呢，講左咁耐，你做咩一個人既？」Michael問
「冇呀，比人撇低左嘛，你冇聽過傳聞咩？」我問
「傳聞？話你一個玩幾個果Ｄ？」Michael問
「係呀，所以我唔係咩好女仔黎架。」我講完扁曬嘴望住地下
「唔緊要，咁我地一齊食飯？」Michael問
「……好啦。」我講，唔知點解聽到佢依一句，就好似天上既一道曙光咁
咁最後因為已經遲左好多，好多餐廳都冇曬位，咁Michael就問
「好多地方都冇曬位，咁…….Ｍ記你介唔介意？」Michael問
「冇所謂呀。」我講
「哈哈，好呀，仲以為你都會好似其他女仔咁唔食添。」Michael講
「唔會呀。呀你，仲話冇同過其他女仔出街？」我講
「咁Friend底出去姐。」Michael講
「你都幾識搬龍門架喎。」我笑笑口講
「邊係呢，咁我真係對佢地冇感覺既。」Michael講
我地講下講下，就行到去Ｍ記門口，見到都有小數既人係度排隊，咁Ｍ又講
「呀潔你想食咩，不如你搵個位坐低先？」
咁我咁岩見到有個二人位，咁我「嗯」一聲，就行左過去坐低，然後Ｍ又再問
「係喎，你想食咩呀？」Michael問
「脆辣雞腿包餐，轉粟米，飲熱朱古力，唔該。」我講
等左兩個字左右佢就行到返黎，然後我就拎左３０蚊比佢，但佢就話唔洗，佢請咁，咁我就收返埋果３０蚊，講聲多謝。
「講起，你咁勁？教琴。」我問
「係呀，教琴老師話咁樣可以幫補下學費，同埋教同學，都有野學到，所以叫我吸收下經驗囉。」Michael講
「咁你都幾叻仔喎，學左幾耐呀？」我問
「唔記得lu，都一段長時間喇。」Michael講
「係呢，唔好講我啦，講上你丫，其實你都幾好女呀，又會比返錢人，點解佢地會咁講？」Michael問
「其實係有兩個人約我睇同一套戲，第二個約我果日本身得，咁岩有事搞到最後唔得，只係同左第一個約我果個睇，其實佢地兩個都係男黎既，而且又係friend，咁佢地又成日會問下我睇唔睇，咁見佢地問有誠意，加上本身都friend咪同佢地去，點知因為去唔到陪第二個約我果個男既睇，而第一個約我果個問我套戲點，咁第二個約我果個聽到咪可能以為我有心玩佢啦。」我講
「所以就發生左跟住落黎既事喇，最後就你依加得你一個咁？」Michael問
「係呀，唉，所以我應該都係得自己食飯架喇。」我講
「其實幾多個人食飯又點，同邊個食飯又點，最緊要係開心既姐。舉個例，你多人一齊食飯，但個個都唔算好friend既，你真係食得開心？你覺得多人食，定同一兩個真心朋友一齊食飯會開心Ｄ？好喇，同埋，同邊個食飯，我自己覺得又有咩所謂，我見好多人都話，男同女單獨食飯唔得，其實又點解唔得？咁男同女都可以係有友情既姐，點解一定係男男同女女先可以係純友情呢？所以我覺得，無論你之後同男食又好女食又好，又或者自己食又好，最緊要係你食得開心。」Michael講
「最緊要…食得開心？」我若有所思咁講
「無錯，可能你依期比人話你同男點點點又好，我覺得如果同你食飯或者陪你果個令到你個心係舒服既係男，又有咩所謂，最緊要都係你自己點諗，男同女都可以做到好好既朋友而唔係一定只有愛情。」Michael講
「你…」我都未講完
「所以，我覺得我成日同女，又或者成日同唔同既女食飯出街，唔代表係我對佢地有意思，佢地點諗還佢地點諗，最緊要既係你地之間相處得舒服先，雖然可能同你食飯既果一個人，可能對你有感覺，但如果係唔係都要因為追求先去接近一個人，會睇小左果個人既野，好似缺點咁，點解唔將彼此既關係一開始放左係朋友方面先，覺得適合再考慮？」Michael再講
「你做咩一輪嘴講咁多大道理既…哈哈」我笑住講，我同時我都心諗，就依排比人話又點，都冇所謂啦，而且我亦都係想招下人入伍，亦未嘗唔係一個好機會
「冇，只係想比個方向你，其實只係想同你講話，同男食飯同女食飯，又有咩所謂。」Michael講
「咁我又唔Care同男食飯既。」我講
「唔知你啦，咁你依排因為有咁既緋聞嘛，所以唔知你會唔會避左唔同男食姐。」Michael講
「我真係避就唔同你食啦，係唔係先？」我笑笑口講
「哈哈，係既，咁唔知依排有冇機會同到你食飯呢？」Michael問
我望住Michael，我對住佢笑一笑，食左一啖粟米之後笑笑口講
「你中意囉。」