[新手][愛情][排球]那天我成為女之後 我的人生不再一樣: 20.食花生
落到去，都不外乎猜下波，夾埋其他人開返場Game咁打下，都係上映住男排對女排咁，點解唔打散黎打？好簡單，增加同隊友一齊練波既時間姐。
打到完左兩場Game，人都開始散去，球場上得返Ada，Antonia，Carrie同我，而其他人都走曬。始終都中五，打完波都要早Ｄ返去溫書，又或者可能要補習架嘛。個場得返四個人，我望望手機，都成5點幾，然後我就走左去同Carrie細聲講話有野同佢講，不如洗完手去後巷講？
然後Carrie就作狀話去個廁所就走左，然後Ada同Antonia就望住Carrie行開左之後就問
「你頭先同佢講咩黎？」Antonia問
「好野黎既。」我答
「咁你同冇答冇分別喎！」Ada講
「唔係架，依加我諗我唔方便答你，你地好快就會知我同Carrie講咩架喇。」我講
「會唔會係咁呀？講完既野我地之後會知？」Antonia問
「係！」我講
咁佢地對一對望，然後就一副唔信既眼神咁，咁我地再猜多幾球波，咁我就話去洗個手抖抖，叫佢地打住先咁。然後最後得返佢地兩個係排球場度打波，而我當然就去食下花生啦。
行到過去後巷附近，我就靜靜地行埋小小聽下佢地講咩啦。
當我伸個頭去望一望佢地原來Carrie已經到左，但佢地好似靜左冇出聲，兩個dup低左頭……Carrie依加背住我，而Carson就面向住我。
唔知點解作為旁人既我望住佢地，仲緊張過Carson，我心入面係咁叫Carson出聲啦咁，但同時我又諗緊會唔會我遲左黎，錯過左小小野。係依個時候，Carrie終於出聲
「其實點解你會係度既？呀潔呢？」Carrie問
「呀潔佢唔會黎架喇。」Carson講
我心諗Carson你做咩講到好似綁架左我咁……識你咁耐你都真係唔識講野，唉。你衰左真係唔好喊
「下……你講咩呀？」Carrie問
「呀，冇呀……」Carson又頭dup dup咁講
兩個又靜左…….過左一陣
「呀潔佢真係唔會黎？」Carrie問
「呀……其實係我搵左佢幫我。」Carson摸摸自己後腦，尷尬咁講
「下？呀潔佢點解會幫你既？」Carrie問
「其實我頭先求左佢好耐先幫我架，我唔知搵邊個幫我手好，而咁岩見到佢咪試下問……開頭佢都唔應承我架，但我求多佢一陣佢先肯架咋，我同佢冇野架！」Carson耍曬手擰曬頭講
「咁……你又呀潔約我黎，你想做咩呀？」Carrie問
「其實….其實….」Carson雙手緊握住，頭不自覺咁望向地下
我心諗：講啦Carson，講啦！
「其實咩呀？」Carrie佢都好似好緊張，佢講完都雙手放背後，右手係咁捽左手手指公咁等緊Carson既答覆
「其實……」Carson都係講唔出
「如果冇野既咁我走架喇。」Carrie講
正當ＣＥ想轉身既時候，Carson就一個箭步衝左上前捉住左Carrie隻手，然後係褲袋拎左條手鏈出黎話
「Carrie，其實我係一個冇用既男仔。我連小小野都做唔好。但係遇到你之後，我就一直都想有一個機會，可以成為你身邊最重要既果一個人，我咩都唔掂，咩都廢，但我好想我因為張嘉欣你，令到自己變得更好，再用更好既我，令張嘉欣更加幸福，唔知你可唔可以比個機會我，幫你戴上依一條手鏈呢？」Carson捉住Carrie隻手問
「咁你依加姐係想住我過橋，令自己變好？」Carrie望住Carson細細聲問
「唔係呀唔係呀，係想一齊改變，想拖住你對手，一齊去改變，去變得更好，令到你可以得到更多既幸福架！」Carson講到眼紅紅咁，但個樣又真係好誠懇，如果有個係我真心中意既男仔對我咁講，我諗我真係感動到喊都似
「人地都冇話ＸＸＸｘｘｘ……」Carrie講
心諗：你唔好再細聲Ｄ？
「下？」Carson問
「聽唔到就算啦！」Carrie好似好悔氣咁講完
然後Carson一手拉Carrie埋自己度攬住佢問
「聽到，冇話唔比你借你過橋嘛。」Carson講
「衰人，知唔知人地等左你幾耐呀？」Carrie拍拍Carson心口講
我微一微笑，食完花生之後就慢慢行返去排球場，佢地兩個見到我返黎都不約而同咁話
「嘩，去咁耐既，洗咩手呀你。」
「冇呀，我兜左個圈，抖抖姐，話曬都打左個幾鐘波喎。唔留Ｄ力，過幾日Friendly會唔掂架。」我笑一笑講
「會唔會係咁…….喂你地睇下。」Antonia突然好緊張咁叫我地望學校門口方向
我一轉身望，原來係Carrie同Carson兩個並肩，有講有笑咁行出學校門口，跟住Antonia就拉住我地行出去望，我地就見Carrie都好大膽咁用個頭挨住Carson膊頭。
「嘩，Carson終於得左喇。」Antonia再講
「係喎，咁唔係幾好咩？」我講
然後望一望Ada，佢又望一望我，然後突然對眼放一放大，再一下奸笑咁講
「祝佢地永結同心啦。」