[新手][愛情][排球]那天我成為女之後 我的人生不再一樣: 11.與Ada交心
「下？！」我問
「你唔想知咩？」Antonia問
「想呀。」我講
「你今晚得唔得閒？我地食住飯講？」Antonia問
「可以呀。」
「咁一陣七點半屯市等啦。」Antonia對我單單眼
無耐我地就黎到輕鐵站，然後就分開，搭車既搭車，行路既行路。咁岩我同Ada同一方向既車，咁因為我都唔係咁識Ada既關係，我都冇咩出聲。唔知點解我覺得全程係有D奇怪，Ada就好似我講野咁，但大家又冇咩出過聲。到差唔多落車既時候。
「呀潔，你今晚約左Antonia？」
「係….係呀。」我尷尬咁講
「你好想知佢點收兵咩？」Ada問
「又唔係既，只係……有Ｄ野我想證實下姐。」我講
「證實？」Ada一面疑惑
「嗯。有Ｄ野我真係唔知點講，我講出口，好似好科幻，但……的確發生左。」我講
「下？呀潔，你係唔係有咩想講？」Ada問
「我想問下你有冇聽過一個人，佢叫吳耀傑？」我問
「冇喎，做咩咁問既？」Ada問
「唉，果然……吳耀傑依個人從來都唔存在過。」我講
「呀潔…….」Ada一面擔心講
「Ada，有Ｄ野，我知我同你係好朋友，但……或者我遲Ｄ再同你講啦。Sorry。我落車喇。」我講完然後我就落車
「有咩唔同得我講架？」Ada問
「下？！你做咩都落車架？」我問
「呀潔，你做咩過左中秋真係怪怪地咁？你係唔係想講依件事？」
…….
…….
…….
「係呀…..」
「不如我地去公園講？」Ada講
就係咁，我地就去左公園坐低左，Ada就一面認真咁望住我，事到咁，我就慢慢同佢講。
「其實就咁既，我本身係男黎。」我講
「下？！我中學識你到依加，你都係個女黎喎，你小學係男黎架咩？」Ada好疑惑問
「我繼續講埋先啦，咁一開始我就係一個男黎既，我原來係男既時候，我都係讀依間學校，咁我又係排球隊成員，我又係讀依Ｄ科，依一班。而依一班又係你地依一堆人，只係得我一個，由男變成女。」
「下？！咁……奇怪？」Ada問
「係呀，咁因為一次學界輸波，個個都怪我，咁我好唔開心，咁岩完學界果一日就落雨，我返到去直頭行雷，之後我就係鏡入面見到呀潔，姐係依個身體……跟住我同鏡入面既呀潔一齊伸手去摸塊鏡，之後呀潔就問我調唔調轉身體？就係咁就同左佢調轉左。」我好認真咁講
「好……可以繼續。」Ada講
「咁調完之後，我醒時我就發覺我係醫院，後尾先知原來我係想自殺……」
「自殺？！」Ada捉住我隻手好激動咁問
「嗯。但就係死唔去，本身係男既我，就同左佢交換左身份，變成女，我諗之後既事，唔洗我多講啦？」
「唔怪得你唔見左人幾日啦。但你又會知呀潔既野既？」Ada問
「呀潔有寫日記既習慣，我睇返佢寫既日記，仲有Whatsapp呀， MSN呀咁上下。睇返小小野，同埋本身電話入面，都係有Ｄ相，所以先知Ｄ野。」
「但就知Ｄ唔知Ｄ咁？」Ada問
「係…….就係知你地大概係邊個，所以咪答唔到你地嘴囉，只係坐埋一邊聽，笑下就算。」
「但係同你問Antonia證實一Ｄ野，有咩關係？」
「因為Antonia係我係男既時候既女神黎，係好多人追果一隻。無論係氣質，學識，絕對唔會差，雖然係咁，但佢又好平易近人，唔會因為對方係個咩人而唔會唔理人，加上係打波時都散發住陽光少女既味道，單單咁都已經引人入勝。至於身材方面又唔差，唔會有多餘既肥肉係佢身上出現。絕對係女神級既人物黎呀！」我講
「所以……?」Ada問
「因為我發覺其實好似只係我變左女仔，其他野都係一樣，所以我好奇確認下究竟Antonia係咩人咁姐，其實係私心黎。」我感慨咁講
「見你語氣，似乎都好似get到下Antonia係個咩人啦？」Ada問
「都係掛，但我想聽下佢，或者其他人講多Ｄ。因為以前我好摺，完全係冇女性朋友，但男既好多人都好冧Antonia，你問佢地，佢地個個都會覺得自己係佢既真命天子，唉，所以根本問唔到Ｄ咩。」
「無錯呀，Antonia的確唔係Ｄ咩好女仔。老實講，我地知既未必係全部，但Antonia係我地女既角度覺得，佢成日都會拖住Ｄ男既唔同佢地講清楚，又會洗下佢地，真係唔係咁好囉！我地都講過架喇，咁佢意見接受，態度照舊，又可以點？」Ada愈講愈激動
「你做咩咁激動既？」我問
「呀……Sorry。」Ada講
「係呢，你又會咁信得我過，講依件事比我知既？」Ada問
「其實我都唔知，但我覺得你係值得人信任。」我講
「唔……憑直覺……」
「又唔止既，我見日記話呀潔會同你傾野多嘛。」我再講
「哈哈，就算係男既你，都同呀潔一樣，都係咁易信人，好彩我唔會呃你姐！」Ada笑住講
「係……」我面紅紅，頭dup dup講
「唔怪得你既行為咁似男仔啦，但你依加又似一個女架喎。」Ada講
「下？！唔太明喎……」我問
「其實你自己唔覺咩，只係幾日，你諗返你男既時候係點，依加係點？我唔知啦，雖然你行為上都似男，但同時有時你都似女，可能你自己唔覺姐。」Ada分析道
「嗯……」我繼續面紅紅，頭dup dup咁微笑住
「你睇下你依加，笑得真係好似一個女咁，老實講，我覺得你依加咁樣仲好,冇呀潔以前咁怕醜。」Ada笑住講
「其實呀潔以前係點？」我問
「何必咁執著呀潔本身係點？最緊要你做返你想做既野，我又覺得你唔洗Keep住呀潔以前既形象，但我覺得，呀潔會比較岩斯文向既形象多Ｄ。」Ada講
「姐係……」我再問
「咪叫你咪咁粗魯囉，咁簡單！起碼似返個女仔先啦，當然你想粗粗魯魯既，都可以既，但我覺得你斯文返少少，真係引死男仔呢！你又冇咩好乖乖女果種既拘泥，真架！你諗下啦。」Ada講
「嗯…..其實我都覺自己好似比起男仔時，都變左Ｄ。係真係唔似男仔咁再咁癲，多左野諗，乾淨整理左，同埋……好似怕醜左。」我講
「哈哈，咁都好正常呀，本身呀潔佢係比較怕醜既。點都好，你係唔係呀潔，我都係你好朋友呀。」Ada單單眼，比隻手指公我
「多謝你。」我面紅紅咁笑住答佢，然後就攬攬Ada
「你攬住我你有咩感覺呀？」Ada問
「又冇咩喎，個心好舒服囉。」我講
「冇諗衰野？」Ada問
「下？！你講落……頭先換衫時我望到你地，我都冇咩感覺，仲覺得好正常……」我講
「咦，咁睇黎你開始變緊一個女仔喇喎。」Ada講
「姐係點呀？」我問
「我估你男性既心理有機會被依個身體影響，但係好事定壞事就你自己諗喇。」Ada講
「嗯，依樣野，再算啦，點都好，多謝你，估唔到我要變左做女仔，先識好似你咁好既朋友。」我講到依度都有感覺到視線開始模糊喇
「傻瓜。」Ada再攬住我講