[新手][愛情][排球]那天我成為女之後 我的人生不再一樣: 12.女仔之入門秘笈
「係喎，你唔係約左Antonia架咩？仲唔去？」Ada問
「算啦，唔知係唔係比你開解左，我依加覺得知唔知Antonia既野，都冇咩所謂喇。」我講
「係唔係呀？你都同佢講返聲你唔出去啦。」Ada講
「都岩。」
我拎起手機一望，都已經成７點，原來傾左幾句就已經咁夜，我就快快打比Antonia。
嘟嘟嘟…….
A：喂，呀潔？做咩呀？
我：我有Ｄ事出唔到黎呀。
A：下？你早講啦，我出緊黎喇！
我：SORRY呀，聽晚果餐最多幫你比。
A：好啦，見你咁有誠意……忙住溝仔呀？
我：傻啦，屋企事咋。
A：嘻嘻，咁唔阻你喇，聽日見啦。
就係咁我就收左線，然後Ada問我「上我度食飯?」,既然佢邀請，咁當然去下無妨啦，因為我依加係女黎，唔會唔方便嘛。嘻嘻
咁我就跟左Ada去佢屋企，原來佢係住係我過幾棟，點解我一直都唔覺佢既存在既？我問完，原來Ada搭接駁巴士返學，佢話近過輕鐵，所以搭巴士；而係男既我，會搭鐵返學，因為樓下附近就係車站。
我入到Ada屋，當然同佢呀媽打個招呼，咁就跟左Ada入房。咁Ada有問過我仲係男時，佢既情況係點，我都係講話我果時太毒，冇咩留意人，連佢住我附近都唔知。就係講講下時，Ada問
「係呢，你做左女仔之後，你有冇保養下？」
「下？！保養？」我好疑惑咁問
「係呀，女仔唔保好易老架。」Ada講，我心諗係「補」，唔係「保」
「睇你都係冇架喇。但你……咦？」Ada講講下就一手摸落去我心口果一團肉度搓左幾下，老實講我覺得比同性搓就真係好唔舒服，然後一手撥開佢隻手
「咦，有戴bra架喎，又會識既？」Ada再問
「哎呀，想知咪問囉，唔好咁嘛。」我雙手抱住雙肩講
「嘻嘻，心急左。」Ada唔好意思咁講
然後我就講左有打底，點解呀，咁上下既野同原因比佢知，然後佢就話我呀媽都幾留意我，對我好好咁。最後佢話聽日飯聚前不如行下街教下我女仔有咩會買會睇，我應承左之後，佢呀媽就叫我地出去食飯…..
係果一刻我先醒起未同我呀媽講話出去食，咁當我拎起手機時就有個留言……
留言：你有一個新口訊…….呀女呀１我今晚出去食呀，你自己搞掂先啦，唔講住喇，自己小心Ｄ，唔好咁大頭蝦喇下！係咁啦……….刪除及…….
就係咁我放下心頭大石，就行左出去食飯喇。
食完我就返左去，沖左個涼。再攤係床上面，望望電話，突然有個Whatsapp
Ada：係喎！同你講定，聽日本身要練波，但因為今日打左friendly，所以聽日唔洗練波，所以聽日放學返去換衫我地出去行陣街啦。(22:27)
我：好呀，多謝你(22:28)
Ada：傻啦，要努力咁活下去呀！(22:31)
我：收到，咁聽日見喇，訓喇，早抖(22:32)
Ada：早抖(22:32)
到左第二朝我都係七點起身，我就知道洗頭會中伏，所以都箍起頭髮刷牙洗面算，著埋校服打埋底果Ｄ，唔係講笑，搞搞下都已經成七點五喇。於是我就拿拿聲著埋鞋就出門口。
落到去輕鐵站等車時，我就見到Ada從容咁行埋黎
「點呀？做女仔多野搞呀可？」Ada問
「係呀……聽左你講，我用埋呀潔留底既護膚品，搞搞下都搞左咁耐。好彩都趕到落黎坐35分果架車，唔係就死得。」我講
「係呀，所以你每朝都要早多小小起身預備架，就算你天生麗質都要保養架。」Ada講
「你都天生麗質啦。」我講
咁耐以黎我都冇交代我d friend既外形比大家聽，咁我係度略略講下啦。
Ada(歐曉詩)：164cm，偏瘦，iPad，靚女，斯文女，關心朋友
Bianca(高紫寧)：160cm，偏瘦，B cup，中上樣，斯文女，關心朋友
Carrie：167cm，小小肥，B Cup，正常樣，粗魯
Eva：158cm，小小肥，C cup以上，童顏，八婆格
Antonia：166cm
「邊夠你黎呀潔姐，你都唔知我地Form幾多人迷你，你都唔知自己因為怕怕醜醜，吸引左幾多男仔。」Ada笑住講
「咪玩啦，我對男既無興趣。」我講
「係咩，遲Ｄ睇下你仲會唔會咁講先。」Ada講
就係咁同Ada由車站傾到返上班房，Bianca都好奇我地傾咩，我地都一致話「秘密！」。
好快到左放學時間，咁我地同Bianca約好左時間地點之後就走左。我就同Ada一齊走，返到去換完衫就同左Ada一齊出左屯市行下街，學做女仔。
去到屯市，Ada就帶左我去一Ｄ既化妝品店，佢就每款都介紹下有咩用，點用咁，仲要愈講愈興奮。仲係咁話女仔一定要對自己好，要經常護膚，唔可以懶！佢係咁係度講，連sales都過埋黎係咁話邊樣好邊樣岩用咁。最後我當然係冇咩錢買，買左小小保濕Mask咁就算，而Ada就買左一袋，唉，點解可以咁有錢？
然後帶我去到一Ｄ內衣鋪，就話我咁既size要一Ｄ功能內衣去承托下，仲可以令我再大Ｄ。我睇睇下，Ｄ款都好似有少少呀婆feel。本身都係冇買，一黎款式問題，二黎價錢問題，但經Ada一番既遊說，我都決定買返一兩個試試，一黎我唔肯定依個身體既主人本身買既Bra岩唔岩，二黎我都想變靚Ｄ，有邊個女仔貪靚喎，係唔係先？嘻嘻
最後，我地行左去一Ｄ賣衫既鋪頭度睇下衫，Ada係咁話叫我買返多Ｄ靚衫著下，咁先似返個女仔。咁我睇完一輪，我都係果一刻先發覺做女仔係咁開心，有咁多靚衫著揀，但礙於冇錢，所以就冇買。唔係話好貴，都係百幾二百蚊一件，但學生既我，又點會有咁多錢。最後Ada幫我揀返一Set衫，佢話我依加既衣著搭得唔係咁好，而Ada話
「其實你唔好成日著褲啦，著多Ｄ裙啦，做女仔最好既就係可以有好多靚裙著。你咁靚女，揀返Ｄ淺色系既衫裙，咁樣會顯得係更加sharp架。依套衫裙我送比你啦。」
最後佢叫我著住走，我唔好意思咁講聲多謝，就去換左套衫。係更衣室望住換左套衫既自己，我覺得做女仔真係一件好開心既事，仲要做靚女。之後我仲忍唔住對住塊鏡影左幾張自己既全身相先出返去。
「做咩笑成咁既？」Ada問
「冇呀。」但我仲係笑笑口咁
「車，行啦，同我去萬寧，有樣野想買。」Ada講
咁我地慢慢咁行到去萬寧，一行到入去，Ada行左去一行放滿左M巾既貨架。Ada望左兩望，拎起左兩包正想行去比錢既時候，就比我拉住左佢衫尾問
「其實…….點用。」我愈問愈細聲，仲要紅都面曬咁
「Er……其實好難講，我示範你睇？」Ada尷尬咁講
「好…..」我都尷尬咁答
到比左錢之後，Ada行返去貨架果邊大約解釋點用，放係邊度，又講每個人用開既牌子都唔同，亦都有好多款式。又咩日用夜用咁，大概都解釋得七七八八，仲話我趁未黎Ｍ睇下屋企有冇多，有就參考返買返果一隻牌子。
然後我地就去左廁所，仲要入去同一個廁格，跟住Ada就拎左一塊出黎講點用，又講點樣換之後就叫我出一出去，因為佢要換。
到佢出黎時，Ada對我笑一笑,我地埋左去洗手，邊洗邊問
「做女仔係唔係好煩？」
「話冇就呃你啦，但……其實都幾好玩，我覺得比起做男仲好。」我係度講
「點解咁講。」Ada驚訝咁問
「好難講，可能你一出世就係女，就係因為你做左咁耐就會覺得做女好煩。同樣地，我做開男既，當做起女上黎，唔止係新鮮感咁簡單，我以前都有諗過有機會比我做到女既話，究竟會係點？依加做到喇，仲要係真真正正一個女，其實我覺得真係好好。就算比我做既係正常樣既女都冇咩所謂，只要打扮下都可以好靚。」
「估唔到你對女依個性別咁情有獨鍾。」Ada講
「係咩？我都唔知呀。或者本身毒男格既我，比較岩做女呢。」我再講
「嘻，毒男，真係好斯文，粗口都唔講。」Ada笑住講
「係喎，我……冇講粗口既？！」我自己都有Ｄ驚訝
「睇黎你都掌握到做女喇喎。」Ada講
我冇應佢依一句，之後我抹乾手，就同佢講
「差唔多夠鐘喇，去搵Bianca啦。」