[新手][愛情][排球]那天我成為女之後 我的人生不再一樣: 10.男女排友誼賽
「Sorry，我會留意返，」我講
「我地唔係話你呀，只係覺得為左一個賤人搞到你自己咁，值得咩？倒不如你唔開心時，同我地講，我地都會撐你架。好唔好？」Bianca講
「其實我都唔知點講好，我覺得我好似怪怪地，明明心入面冇咩野，但見到佢地時個心又會拿住拿住咁痛。」我攬住Bianca講，愈講我視線就愈模糊
「呀潔……」Bianca摸摸我頭講
同時間，Carrie遞左張紙巾比我，我接過之後抹抹眼框講
「多謝你地，我冇咩野喇。」
「唔緊要啦，我地都會企係你果邊架！仔死仔還在，又何必為左果一個賤人傷心呢，你有能力令返佢覺得你比佢活得更好添。」Antonia就行左過黎講
「喂呀Antonia呀，唔好成日引呀潔學你咁係度收兵啦!」Ada同Bianca一齊講
「收兵？」我問
「拿！我講多次我唔係收兵架！都講到明我係對佢地無意思，佢地都仲要「鐘」個頭埋黎，我可以點喎。就好似有人係都要請你食飯咁，你推一推佢都仲要請，咁緊係卻之不恭啦。」Antonia講
「下？姐係點呀？」我成頭問號咁問
「拿！都話你實有興趣架啦！」Antonia好興奮咁講
「呀潔呀！你唔係諗住收兵掛？」Ada同Bianca好激動咁話
「下……唔係呀，好奇聽下姐。」我講
我聽到Antonia咁講，唔通以前之所以覺得佢對人好，其實係因為想拎著數？唔係掛，明明佢個形象係咁好，冇理由架……我諗到依度我其實唔係咁信Antonia係咁既人，但又從佢既說話入面覺得，佢又冇否認。我有一刻安慰自己係依度既Antonia先係咁，但老實講，係度既野同我做男既時候完全一樣，你話依度係另一個世界，我反而想信我仲係原先既世界多Ｄ。
點解我會覺得我係另一個世界？因為我又唔係好信一夜間所有人對我既認知係由男變女，仲要本身個女係有背景，所以我先咁覺得，至於係唔係真係好似我諗緊，反正都證實唔到住，再算啦。
突然一聲哨子聲響片全場，一望，原來係Miss佢召集。
「拿，咁今日我約左男排既隊員同你地一齊練習，咁老實講，唔係冇得打架，記唔記得大家目標係咩，唔單止係學界冠軍架，仲有係精英賽架！我都知只係友誼賽，但唔好因為咁而Hea打，得唔得？」Miss講
「好」我地係度講
「好，咁樣今日照返上場波既隊形出場先。」Miss講
當Ｄ球員出左去既時候，我望一望點解得五個既，之後全部人就望住我……
「呀潔你做咩唔出？輸到傻左？」Miss講
「呀！諗緊野，Sorry Sorry。」我伸一伸脷講
行到出去時，Antonia走左埋黎話「做咩呀？諗緊我頭先講既野？一陣打完再講你聽。」Antonia單一單眼講
我報以一個微笑再講「開波啦隊長」。然後就開始就左今日場Friendly.
男排就讓左我地開波先，首先係隊長──Antonia開波。一開，一個平飄球飛左去對面，男排接起時因為波飄而未能輕易接起，所以打遠左，令到Setter難Set好個波，最後個殺波唔算太大力咁殺過黎。
我地果面輕鬆將個波接起之後，我見我地既Setter──Carrie望一望我，咁我於是就準備拉後助跑等殺波。之後Carrie就將個波Set左比我，我助跑時已經覺得佢個波放得有D近佢，最後因為打右邊用右手殺既關係，個波比我殺左落網。
「喂呀潔，你做咩用右手呀？你用開左手架喎，你今日玩野呀？」Miss問
「唔係呀，我覺得多隻手打到波可能會好Ｄ，試試姐，Sorry。」我講，我心諗，唉頂，一時唔記得左，雖則話我依加隻左手好用姐，但都有小小想用下右手架。加上得幾日時間，邊有咁快變到呀。
「唔緊要呀，呀潔，遲Ｄ我地一齊練weak hand，依加打好場波先。」隊員都咁講
「好既，唔好意思。」我講
然後到男果邊開波，個波都唔細力，個波直飛到去後場中槌度，佢不慌不忙咁接起，飛向Setter，Setter望一望我，我就再準備拉後助跑等殺波，之後Carrie就將個波Set左比我，我一個助跑抽手起跳，果種感覺係做男既時候冇既。唔知點解依個身體雖然依一對C Cup稍為有D阻礙，身體既動作比起男既時候真係仲要好，我真係愈黎愈中意依個身體。
到時跳到最高點時，我係可以係網頂望到過對面場，唔單止係網頂望到過對面場咁簡單，時間就好似停止左一樣，係空中望住對面場，真係望得好清楚，好爽！
同時，係空中既排球亦都慢慢趺返落黎，我將左手拉後，我身體向後仰少少。以我對排球運動軌跡既經驗，加上依個身體既能力，我覺得可以一下殺落個波度。「PAT」既一聲，一個充滿住下旋既波就慢慢落落去三角位置度，無人有意識接起，眼白白咁望住球波落地。
就係咁，我成功為我方拎返一分。雖然岩先果一球撻Ｑ，但拎到分就算啦，嘻嘻。原來依個身體出手都咁快，咁可以睇定Ｄ先出手。
就係咁，最後場波因為我拎左唔小分，成功險勝左我校男甲排球隊。
「嘩，呀潔，你做咩殺波狠左咁多既，以前你殺波係殺到，但力度同落點都冇依加咁刁鑽喎，講！中秋你係唔係去左特訓？」Antonia笑住問
「唔係呀。都話…….」我都未講完
「病左嘛！」Ada同Bianca異口同聲咁講
然後Aaron走左埋黎問「係呢，我地男排傾話想聽晚搵埋你地女排一齊食晚飯，唔知你地點呢？
「可以呀。」Ada同Bianca一齊講，然涕望望我
「Er……」我係度諗緊，我就唔知點解會望去Eva同Patrick果邊，佢地望到我望佢地，就行開左。
而其他人望到我咁，都話「我地冇叫佢架，你放心黎啦。」
「但唔係男女排飯聚咩？你咁樣唔比佢地黎又好似唔太好喎。」我講
全場聽到之後都好靜左幾秒，然後Antonia就話
「你地睇下呀潔幾大方，咁樣都唔同人計較，真係好女仔。」
「下？！」我紅都面曬咁講
「哈哈哈。」全場都係度大笑
「咁姐係去？」Aaron問
「咁男女排飯聚，唔黎唔係咁好既…」我講
「姐係黎啦，好啦！聽晚見喇。」Aaron好似好興奮咁講
然後我地就換都冇換，拎返自己個袋就走。我地行緊果時，Antonia就走埋我身邊問左句「係唔係想聽我既事?」