[新手][愛情][排球]那天我成為女之後 我的人生不再一樣: ３.伍潔瑤的故事１
我行埋床邊坐低，我呀媽就一輪嘴問我做咩要咁做，點解點解ｘｘｘｘｘｘｘｘｘｘｘｘｘｘ咁。佢講咩，大概就係話我做咩咁傻要自殺囉。仲話我未夠秤又走去買紅酒溝安眠藥點點點，我真係冇心情聽佢廢UP。
我見呀媽一直係咁講係咁講，最後我都好唔好意思講句「sorry」，希望佢唔好再咁勞氣。至於你地會心諗點解我要咁做，一黎佢同我呀媽真係一模一樣，二黎我都想靜一靜，諗下發生緊咩事，最後探病時間就完，我問佢地我幾時可以出院，佢地話依一兩日，話我無咩大礙就比我出院。
夜晚既時間，我就訓唔著就係床上面碌下碌下咁，因為冇手機係身邊既關係，想消閒唔得。碌碌下，最後都訓著左。
…….
……
……
「唔好走呀」一把甜美既聲音講
「你好好，但有樣野唔夠你姊妹好，就係你唔夠聽話！」一把男聲講
「最多以後都聽你話，你想點……就點啦。」甜美既聲音講
……
……
……
「伍潔瑤，伍潔瑤。」另一把女聲係度叫我個名
然後我擘大眼，原來係發夢，究竟把聲係邊個，點解我會話唔好走，咩事……
「醒喇？」
我望一望，原來係護士叫醒我。
「走身食Ｄ野，跟住做個檢查，冇咩事晏少少可以走架喇。」護士繼續講
「好呀，唔該。」我回應
咁之後就食醫院既頹飯，不過大家都知，醫院既頹飯，都幾清下，所以我都係爬幾啖填飽就算，不過係食飯時，我拎住隻匙羹「不」野既時候，唔知係唔係Ｄ藥力未過定點，控制隻手既感覺都好似怪怪地咁。食完跟住做幾個例行檢查之後，醫生就放行。
咁走時我呀媽都黎幫我執少少野，就帶左我返去。
「係呢，我地搭咩車？」係行緊出去醫院時我問
「當然係輕鐵啦，傻女，你真係啪藥啪到傻左喇。」呀媽沒氣咁講
「哦……」我敷衍咁答
然後我就心諗，咦，又係屯門？！無錯，我住緊既係屯門醫院，而依加我一出醫院就係輕鐵站。跟住呀媽搭車，到落車時，我心諗同我係男仔既時候住既果區係一樣。再跟住呀媽行，去到樓下，連住既果一棟同樓下既保安都係一樣……返到上去，原來所有野，都係同我係男仔時既係一樣，無錯，係連間屋既佈置都係幾乎一樣，只係本身放PS3同模型既位，轉左放其他擺設。
「我想入入房抖抖呀。」我講
「好啦，今晚食飯叫你啦，唔好再亂諗野同做傻事喇。」呀媽佢講
「知道喇。」
之後我就入左房，望一望間房，所有野既擺位都係幾乎一樣，係張枱多左Ｄ化妝品同護膚品外，枱面仲有樽藥同飲淨既紅酒，隔離仲有有本有鎖既簿。望真Ｄ，本簿係鎖住左既，但個鎖就係Ｄ鎖locker既鎖仔。鎖匙呢……？我望望床邊，有一個Ｇ字頭既背囊，我搵左一搵，就見到一抽鎖匙，入面有一條好細既鎖匙，於是我就行埋去試下睇下開唔開到。
皇天不負有心人，一…….下就開到把鎖，我揭開，由第一頁開始睇。
2010-9-1(三) 晴
今年係中四既開學日，其實我一開始都想寫日記架喇，但一直都冇心機寫。至於點解今日又會想寫呢，唔單止今日係中四既第一個開學日，仲比我遇到一個好特別既人，佢係同form，仲係係隔離班，仲未知佢叫咩名添，嘻嘻。
……
……
……
2010-9-8(三) 晴
今日係女排今個學年既第一個練習日，我一如以往咁都有去練習。咁本來覺得今日應該唔會有特別既我，比我見到佢拎左個排球行過。係休息時候，比我見到佢係小食部出面既空地同三個乙組既男排隊隊員係度猜波，原來佢都識打排球架。之後就開左幾場game，打下比賽咁，今年都係繼續打我既後二，感覺今年都打得幾好。要加油呀！
（唔知睇緊既各位，知唔知咩叫後二喇。係度講幾句，打排球基本上分五個位，大槌，中槌（又稱2.5），Setter，後二，同埋自由人（又稱L），唔計L既話，基本上每次落場都會係兩個大槌，兩個中槌，一個Setter同一個後二，簡單講每個位都係有一pair，換句話講其實Setter同後二其實可以話係差唔多，但set波能力比Setter弱，但攻擊力比Setter高，但問題受限於企位問題，當係後排時唔可以係前場跳起攻擊，唔係就犯規，所以個人覺得係一個唔係咁好打既位，但又可以當奇兵用，其實都可以係一個幾有趣既位置。各位有睇排球少年既，大概會知咩事架喇。）
圖解
＝＝＝＝＝＝＝＝＝＝＝＝＝＝網＝＝＝＝＝＝＝＝＝＝＝＝＝＝＝＝＝＝
Setter
─────────────前場分隔線────────────────
大槌 中槌 後二
中槌 大槌
2010-9-9(四) 晴
今日係男排今個學年既第一個練習日，因為琴日我見到佢放學有同男排隊既人練習，我今日放學時候專登留低去睇下佢有冇打排球隊。果然等左無耐，佢就同琴日果三個人一齊行入球場做熱身。我就再睇落去，佢又有參與訓練，但點解早兩年都好似唔多見佢咁既？
……
……
……
我睇左成個下晝，都只係睇左佢三分一左右，因為我！呀，應該話依個身體既主人，佢真係好有恆心咁今日都有寫日記。而內容都大概圍繞住佢既校園生活同對果個男仔。
依個身體既主人，或者都係叫返我啦，叫做伍潔瑤。讀緊屯門既某一間中學，而間中學係區內都頗有名氣，而且同我仲係男仔時候讀同一間中學。2010年讀緊中四，果年有個插班既男仔插左去隔離班度，而個我就讀4B班。4B班係學校入面黎講係同A班係冇分別既，揀左Physics， Chem同M2，有幾個朋友，Lunch基本上就係同佢地食。
而係十月既時候，我同個男仔終於識左。之後有時都會一齊食飯。到平安夜約左我出街……
我睇到平安夜既時候都真係好攰，邊吸收到咁多，只能講話背景一樣，但係成個人就係完完全全係我男仔時候既相反。點解咁講？靚女，多朋友，有人追……我男既時候朋友又唔多個，又唔靚仔…….點解同一個老豆老母生，可以有咁大差別？
至於個女仔點解要自殺，我相信係本日記後面係有講，但當刻既我真係幾攰，於是我就攤左係張床度……
「我好辛苦，我個心好痛，點解你要咁對我？」一把甜美既聲音再一次講
「Sorry，我有嘗試過接受，但同你真係唔夾，我地分手啦。」一把男聲講
「嗚嗚嗚……」甜美聲音既主人係度喊