《我還是救護員的日子》: 3.7 大年初一
農曆新年，相信係每個人內心非常期待既特別日子，因為唔單止有幾日公眾假期，仲有利是逗…
對於結咗婚既人黎講，一到新年或者要破財，因為隨時要使幾千蚊去派利是。
救護員由於要輪班工作，農曆新年嗰幾日公眾假期隨時要開工，有無得放假就要視乎嗰幾日係咪撞啱休息。
剛剛做完call，趁住有十幾分鐘無敵時間，我同輝仔喺醫院附近不斷搜刮目標，而目標當然係已婚既救護員。
隔離泊咗架救護車，車上有我地要搵既目標人物，我同輝仔於是立即行過去。
我：「志哥！恭喜發財！祝你身體健康！萬事如意！」
輝仔：「恭喜發財！最緊要以後生意淡薄！」
救護員最怕聽到生意興隆呢四個字。
膞頭上有兩條柴既志哥拎咗四封利是出黎，我同輝仔每人兩封：「恭喜恭喜…大家咁話，祝你地步步高陞！早日升職啦吓」
未結婚真係好，可以周圍問人拎利是，仲要係見人就拎，只要行埋去講句恭喜發財，對方就要自動進貢…
其實唔係話貪財既，只係趁住農曆新年既喜興，向大家攞個意頭同講句祝賀說話，人人都會開心醒神啲。
不過話時話，只係一個朝早頭，我就已經逗咗成廿封利是，收獲算係唔錯。
無敵時間結束，今日負責揸車既我準備開車返局。點知駛到前面轉彎位既時候，忽然有幾名著住白色制服既人攔咗喺我地架車前面...
唔係啲咩人，係同事黎既。
救護員A：「益哥！恭喜發財！身體健康！」
救護員B：「益哥！恭祝你龍馬精神！」
救護員C：「益哥！恭喜發財！」
救護員D：「益哥！萬事勝意！」
救護員E：「益哥！鞭鞭有力！」
坐喺我旁邊既益哥調低車窗，從腰包拎出利是，然後分別派俾各人：「恭喜恭喜…」
益哥嗰封利是，我同輝仔於今朝開工既時候就已經一早逗咗。
「佢老闆丫...賊黎架呢班，咁樣攔住人地架車，仲一嘢逗咗我十封利是。」益哥搖搖頭，相信佢經已派利是派到手軟。
返局途中，我地架救護車被中途擊落，要處理既案件係男性長者身體無力。
身體無力呢四隻字其實都幾空泛，構成原因可以有好多，可以係飲醉酒，可以係血糖低，又可以係中風…
所以要去到現場幫病人檢查過先知。
大家以為新年就會少啲人叫車？
當然唔係啦，就算係乜嘢節日都好，呢行都係一樣咁忙，因為病痛係無分季節。
到達現場單位既門外，益哥按咗一陣門鐘都無人應門，於是就拍門：「救護員啊！係咪有人叫救護車啊？」
呢個時候，一名婆婆從隔離單位開門行出黎，當婆婆見到我地幾個，立即好大反應咁講：「彩！大吉利是咩！新年流流撞埋啲咁既嘢！」然後婆婆走返入屋，仲好大力咁關門。
咩叫撞埋啲咁既嘢？我地幾個有幾唔吉利？
不過我地唔怪呢位婆婆，因為老一輩係咁，佢地認為新年見到救護員係一件好唔吉利既事，因為有救護員出現既地方絕對唔會係因為有好事發生，所以啲老人家一見到救護員就會覺得有衰嘢出現喺自己身邊，於是就覺得大吉利是。
被市民當作係瘟神，我地只係感到無奈，同時又覺得好笑。
過咗一陣，事發單位終於有人應門，開門俾我地既係一位年輕女士，對方樣貌竟然有啲似林嘉欣，令我地眼前一亮…
入返正題。
「咩事叫救護車？」益哥問。
「我爸爸今朝一訓醒就話半邊身無力，連落床都落唔到，我好擔心佢有啲咩事…」女士顯得憂心忡忡，佢一邊描述狀況，一邊帶我地到走廊盡頭既房間。
益哥：「你一發現呢個情況就報警？」
女士：「係啊，好彩我今日放假咋…」
房間內，一名伯伯軟臥於床上，佢既表情有啲扭曲，好似想講嘢但又講唔到咁。
「檢查咗先，篤埋手指。」益哥示意驗埋血糖。
「尋晚仲行得走得，好正常？」益哥問。
「係啊，尋晚佢都仲好地地，仲自己落到床…今朝我訓醒過黎睇佢，佢就已經係咁喇…」女士緊抓住自己既頭髮，一臉忐忑，因為佢根本唔知道發生咩事。
但我地心裡面清楚，一個人出現咁既情況，好大機會係中風。
「伯伯！」益哥趁住我同輝仔做緊檢查，上前同伯伯講嘢：「你而家見點啊？」
問呢條問題，當然唔係真係想問吓佢而家點，只係想測試吓佢既反應。
伯伯眼仔碌碌咁望住我地，並試圖開口講嘢，但講得非常含糊，完全聽唔到佢講乜。
益哥：「嗯…得喇得喇伯伯！放鬆啲先！可唔可以試吓郁啲手手腳腳俾我睇啊？」
伯伯提起咗佢既右手，不過動作有啲慢，而右腳亦有小幅度既提起。
益哥緊握住伯伯兩隻手：「而家試吓兩隻手一齊俾力，用最大既力握實我。」
咁樣做，主要係想測試對方兩邊手能夠使出既最大力氣。
輝仔：「Pulse: 72，SPO2：95，BP：161/90」
我：「血糖：7.9」
除咗血壓有啲高，一切指數算係正常。
益哥：「伯伯左邊身明顯無力，右邊還好，懷疑係CVA…執埋啲嘢，俾住氧氣走。」
(CVA，CerebroVascular Accident - 腦血管意外，即係中風。中風既原因，主要係由於供應含氧血液俾大腦既其中一條動脈受損，其實即係爆血管。)
「收到！」我同輝仔同時回應。
雖然無講出口，但我地已經有哂共識，目前情況屬於危急，做嘢要加快手腳。因為中風後果可大可小，嚴重既話可以隨時無命，所以要立即送院交由醫生處理。
上到救護車，將伯伯安置好後，我立即準備開車。
行車途中，益哥拎起對講機同control聯絡，要求control通知醫院進行「留位」。
留位既作用，係讓情況危急既病人可以第一時間接受醫生既診治。
抵達醫院既時候，我地從另一個緊急通道進入醫院，將伯伯直接送入「R」房。病人情況屬於危急，有生命危險，所以毋須於大堂進行分流輪候。
(R房，即急救房。)
由於係預先通知，一班醫生護士早已各就各位，一切準備就緒為病人進行醫治。
題外話，好多人誤以為假如叫救護車，去到醫院可以快啲見到醫生，實情並唔係咁。撇除「留位」呢個情況，病人去到醫院一般係要由護士按照病人身體狀況去進行分流，而分流有三個類別，分別係緊急，次緊急，同埋非緊急。
「非緊急」所需要等候既時間會比較長，而「緊急」則會比較短。至於幾長幾短，就要視乎急症室當時既輪候人數，假如係高峰期既話，屬於「緊急」既病人分分鐘都要等幾個鐘。
所以，經救護車送入院所輪候既時間會短啲呢個想法，其實係一個錯誤觀念。