《我喜歡了隔壁班的交換生》: 16

燒烤到中途，彤彤很快就吃飽了。

「小恆，我飽喇，但我有啲口乾，不如我去買幾支嘢飲俾你同大家飲啦。」彤彤說。

「好啊，你等陣，我燒埋呢塊雞扒陪你去吖。」我說。

彤彤搖搖頭，說：「唔駛喇，買少少嘢飲啫，好快返嚟喳嘛。」

「梗係唔得啦，陣間你蕩失路點算？」我說。





「都唔係好遠咋嘛，我好快返嚟，到時你俾少少雞扒我食啦。」彤彤說。

「吓，咁好啦。」我說。

彤彤朝我揮揮手，便提着環保袋往士多出發。
～～～～～～～～～～～～～～～～～～～～～～～～
不知過了多久，我見彤彤還沒回來，便開始越來越焦急。

「大家，有冇見過彤彤啊？」我問。





「佢唔係一直都喺度咩？」杰仔答。

「佢啱啱出咗去買嘢飲，但係好耐都未返嚟。」

「咁不如大家一齊出去搵下佢啦。」Apple說。

「咁行啦。」阿Ray 說。

我們沿着沙灘一直走，直到最近的士多，還是不見彤彤的蹤影。





「都已經搵到士多啦，點解仲係唔見嘅？阿恆，你肯定阿彤係行喱個方向？」Jason 問。

「我睇住佢向呢邊行㗎，所以我都好肯定。」我答。

「咁我哋再行前啲啦。」杰仔說。

「唔該晒大家喇。」我說。

「傻的嗎，大家同學，互相幫手好正常啫，更何況佢同我地一齊嘅，我哋都好應該一齊搵啦。」阿Ray 說。

突然，前方出現一個像彤彤的女孩。

「你哋睇吓，前面有個女仔好似阿彤啊。」林卓忻說。

「直頭係啦，你睇下，佢同我地揮手啊。」杰仔說。





「彤彤！」我跑向她。

「小恆！」她回應。

「你去咗邊啊？」我用擔心的語氣問。

「啱啱見到前面有個細路女唔見咗媽媽，諗住幫下佢，點知越行越遠咋嘛。」彤彤搔搔頭，答。

的確，前面有個長得挺可愛的小女孩牽着她媽媽的手，向彤彤揮手道別。

「拜拜喇圓圓。」彤彤向小女孩說。

「拜拜姐姐！」說罷，圓圓便和她媽媽一起走了。





「下次幫人都要同我哋講聲啊，我哋會擔心㗎嘛。」我責怪彤彤。

「係喇，長氣。」彤彤捏一捏我的臉。

「一齊去買嘢飲啦。」彤彤說。

「Okay let’s go!」眾人和應。
～～～～～～～～～～～～～～～～～～～～～～～～
這天晚上，我們一起玩了一會沙灘排球，又玩了一會UNO ，最後在睡前還辦了個心事台，互相傾訴了一番，最後才睡覺。

「兩對情侶各一個帳篷啦，其餘我哋......」杰仔說罷，望向Apple 。

「咁...我同雪淇一齊瞓啦。」Apple 說。

「咁...我哋一齊瞓啦。」Jason說。





杰仔一臉無奈，唱道：「好大陣基味傳入我的鼻......」

「哈哈哈～」眾人大笑着。

睡在彤彤的身旁，才剛聊了幾句，疲憊的她便睡着了。

我卻一直還沒有感到累的意思，沉悶地聽着彤彤的一呼一吸。

我看着彤彤的側臉，越來越感到着迷。

「真係...好吸引......」我說。

突然，彤彤開了口說夢話。





「我想，子恆可以一生一世都記住我。」

初時，我還並不懂得這句說話的意思。