香港殺入世界盃（尼馬故外傳）: 第五十二章

52）「我知道，你地準備左另一個問題要問我。」德仔續道。

主席及梁孔德面色一沉，知道他馬上便要提及那份「滅聲」聲明。工作態度被批評事小，若然被德仔公開「播獨」令上級追究起來，二人的頸上人頭隨時不保。

「等等……」
 
體委主席霍地站起想要搶咪，德仔已率先發言：
「關於呢個問題，我只可以叫大家睇翻喺北京發生既事，其餘無可奉告。」

所說的自然是中國對香港的比賽，港隊半場時間的默哀行動。





記者正想追問，德仔已下逐客令：
「今日既回應到此為止，大家應該已有足夠故事寫了。」


他轉頭望著怒氣上衝的體委主席及梁孔德，站起身離開會場。


「德仔！德仔！」
「講多幾句呀！！！」






記者爭相上前，德仔卻已沿通道離開。


「主席，梁生！你地有野想發表嗎？」
「對於德仔既控訴，你地有咩睇法？」
「德仔會被禁止重返港隊嗎？？」
「多謝大家出席今日既記者會，我地冇野回應……」
「勞煩記者朋友讓一讓……」






早已六神無主的二人實不知如何應對，急急腳離開現場。

翌日，德仔在記者會上真情流露成為各大報章頭條，爆炸性媲美「排雲掌」事件。不同的是，「排雲掌」令德仔備受各界批評，這番說詞卻受到激節讚賞，那份表達出香港運動員無奈及冀盼的真摯之言，使本地各項運動要員紛紛撰文感謝其發聲。

自此一役，德仔進一步確立自己在香港的地位，被推舉為「民間特首」。
 
 
「你真係好勇敢……」德仔公開挑戰權貴，遠在西班牙的里香亦有所聞。
「我只係講出一直想講既野。」德仔道。
「你令佢地顏面全無，擔心佢地報復嗎？」里香表現擔憂。
「香港人信任我，我無論如何都唔可以出賣佢地，後果我預左承受。」
「包括冇得踢世界盃？」
「有d野，比足球更加重要。」




「我只係擔心……佢地會以更卑鄙手段對付你。」
「我相信世界仲有公義。」德仔還是那句。


里香的擔憂亦是我的擔憂，因為我比她更了解中共的手段。

德仔記者會上公然與權力核心決裂，坊間開始流傳體委會即將秋後算賑，千辛萬苦帶領香港殺入決賽週的德仔，或許將要缺席所有足球員夢寐以求的世界盃。事實上，德仔這番控訴不但牽涉體育界，更涉及如履薄冰的中港關係，距離世界盃只有五個月時間，不穩定因素愈來愈多。


「作為球迷，我只係想香港隊可以齊齊整整參加世界盃……」


一月二十四日，一名著名體育主持人說出肺腑之言。
 
然而，正當德仔命運難料之際，另一個打擊隨之而來。




 
一星期後，西甲聯賽巴塞隆拿對貝迪斯。




「貝迪斯中場李文翰突然喺無球在腳情況下倒地，似乎拉傷左……」

「哎呀……」魯營球場上，我撫著僵硬了的鼠蹊，忍不住哭了出來。
「感覺如何？？」軍醫問道。


我不能回答，只是掩面痛哭。身體上的痛楚只是少事，這樣的疼痛代表著什麼，自己心知肚明。

掃瞄報告兩日後出來，正如鄧肯所說，數次被重創的鼠蹊部位再被觸傷，需要養傷六至八個月。





換言之，我已幾可肯定不能參加世界盃。


－－－－－－


繼德仔事件，我因傷缺席世界盃的消息再次令港隊成為A1頭條的主角，憾動整個香港。


「有見過Gary嗎？」正在等侯發落的德仔未能聯絡上我，只能向里香查詢。
「聯絡唔到，佢電話已經關左兩日。」里香道。
「或者佢需要時間靜一靜。」
「唉……」
 





德仔為我感到痛惜，我為香港足球勞碌半生終於守得雲開，卻很大可能從此退下戰場。一班昔日隊友得知消息後紛紛向我送上慰問，但在此艱難時刻，我實在需要關上電話好好處理情緒。

兩天後，我主動致電香港隊領隊積甸拿克。


「對唔住。」道歉的原因，是由於我無視物理治療師的忠告，導致今天的結果。
「請你唔好講對唔住。」積甸拿克道。
「咁多年黎，球隊欠你比起你欠球隊既多。」


我不能自己，再次哭了出來。

近來壞消息太多，我的傷勢加上德仔的前景未明，港隊的世界盃之路充滿著荊棘。


「德仔，無論如何，你一定要撐落去……」


此刻，我只能禱告。