【恐怖，懸疑】那天清晨: 第一四四話

第一四四話

「我都覺。」

「咁不如我地嚟個約定丫，返到現實，我地約喺某個時間同地點等。」

「我地交換電話number咪得囉。」

「唔好啦。電話number好易唔記得㗎。而且我地嚟一個約定，你唔覺得咁樣好有電影feel好正㗎咩？」





雖然我覺得這主意不夠直接，又不太實際，但出自女神的口，我又怎會否決？

「都係既，咁咩時間同地點好？尖沙咀五支旗杆，心口插住紅玫瑰等？」

「咁核凸！」

「講笑啫，咁有咩地方我地一定會記得？唔好又一城就得喇。」

「咩又一城啊？」





這時Suki已經去完洗手間出來，一聽到又一城三隻字立即緊張不已。於是我們把剛剛的想法告訴她。

Suki笑說：「頭先間cafe咪得囉，一定記得，唔會錯，又可以坐成日。」

Kelly興奮地接着道：「好啊，咁時間…就我地返到去既星期六日，朝早九點鐘！一於咁話！」

於是我們六人之間的約定就這樣在我們三人決定下產生了。這是我們的第一個聚會，亦是一個註定不會成功的聚會，可惜的是興緻勃勃的我們在這時並不知道。

Suki：「啊，係啊，廁所用晒紙巾喇，諾你幫我拎丫，擺得太高，我拎唔到啊。」





如是者，我被Suki捉了入去廁所拎紙巾。但卻發現紙巾用光了是假的，那卷紙巾只用了很少很少。

「又話要換紙巾既。」

「嘻，紙巾喺櫃最高嗰格，記住差唔多用晒就拎定卷出嚟喇。仲有呢…」

我打開廁所櫃，望着最高的那格，誰要拿的話也要站在櫈上才可以拿到，那我和她又有什麼分別？後話才時重點吧。

「仲有咩吩咐？」

原本和女神談天說地，又有很好的氣氛，無端端被她捉來要我得閒換紙巾，太無謂了，語氣也不自覺冷了一點。

「喂！乜你咁㗎，多謝都冇句。」

多謝？多乜Q謝？