【恐怖，懸疑】那天清晨: 第一四三話

夢終會醒來，但我不想戰友們隨夢醒而去。

沒有咖啡的May只能獨個兒生悶氣，但當Suki再從廚房拿出一杯咖啡給她，她也終於安靜了下來。

May和Joe在當值看着外面，我和兩位女士談天，而軒則獨自在大檯上拿着簿和筆在畫畫寫寫，繼續努力破解這異世界的謎。希望能找到回現實的方法。

「估唔到妳沖咖啡咁好飲喎！」

「係囉，仲有咁多唔同地方既咖啡杯。妳咖啡迷嚟㗎？」





「唔係啊，啲杯朋友送㗎，佢成日要出trip，每次我都會叫佢買隻杯俾我㗎，我學沖咖啡都係…算啦，唔講喇。」

Suki的表情由原本的微笑變為苦笑，然後再沒有出過一句聲，甚至連鼻子也有點紅紅的。我和Kelly亦不好意思繼續聊天，大家靜靜的坐着。

望着杯中最後一層淺淺的咖啡，一開始喝的時候香氣撲鼻，一絲絲微甜帶着一點甘味與苦澀是如此的吸引，是複雜還是豐富？隨着杯中的咖啡圈越來越低，味道卻越來越純粹，只留下濃濃的苦澀，但你仍會喝下這一口最後的苦。

時間會把味蕾上的感覺沖淡，Suki放下手中早已涼透了的巴黎在檯上。

Suki：「我去廁所先。」





剩下我和Kelly相對，這是難得亦難過的時光，難得短暫和女神獨處卻又苦無話題，空氣中只有悲傷的寂靜。

Kelly：「唉，我都好掛住屋企人啊，Suki就好啦，起碼返到自己屋企，可以用自己用開既野，可以望下同屋企人既相。唔知佢地而家點呢。」

我：「我相信佢地一定生活得好好，等緊我地返去，話唔定我地返到去會發覺原來只係發咗一場夢，又可能我地完成哩段旅程返去現實只係一眨眼既時間。」

Kelly：「如果係咁，我地返到現實咪會失去聯絡囉，咁樣好可惜啊。」