【恐怖，懸疑】那天清晨: 第一四五話

「多謝？」

看到我一臉疑惑，Suki慢慢露出一個非常奸狡的微笑。

「係啊，你要多謝我啊，如果唔係我，你點同到Kelly一組丫。你估我真係想同軒一組咩。實悶到死。」

「咁你又揀同佢一組？」

「哈，咪就係幫你囉，喺log on你幫過我，我講過幫你追Kelly㗎嘛，係咪好感動先。係咪好應該多謝我先。」





「你有咁好死？咁就多謝囉。雖然Kelly係好完美，不過有咩都返到現實先算啦。唉。」

「傻仔，有咩緊係而家攪掂佢啦，佢咁靚女又有氣質又有學歷又好人品，你覺得返到現實你會有機咩？人地做護士，一定大把靚仔有型兼有米既醫生圍住佢身邊轉啦。返到現實你食得屎啦。除非你千萬身家，又或者才藝出眾啦。你係唔係丫？」

「咁我又唔係。唓…你咁市儈㗎。」

「咩市儈，係實際。如果有個又靚仔又有錢既人追我，諗都唔洗諗，緊係去馬啦。你應該襯而家哩個機會將佢追到手先，機會錯過就冇㗎喇。」

Suki說完未等我反應就立即轉身離開廁所，留下一臉茫然的我。用冷水洗一洗面，讓自己能冷靜下來並避免和Suki前後腳走出廁所而造成尷尬。





Suki所說的其實不無道理，而且她還給我製造出如此難得的機會，我是否應該去馬？

她回到客廳後便如常和Kelly說說笑笑，軒仍在一邊角落畫畫寫寫，May已經昏昏欲睡，留下Joe一個監視。我當然選擇繼續和兩位女士談天說地。

不一會Suki便投入PS4的懷抱裏，遺下我和Kelly二人繼續相對。

「估唔到Suki都鍾意打機，好少女仔會打機。」

「都唔係丫，我好多朋友都會打機㗎。」





然後報了一串on99的手機apps，我只能稱那些為apps，因為那些垃圾不應稱為遊戲。

「不過我都唔知有咩好玩。click下click下，掃下掃下咁，好似好無聊咁。」

Suki突然一句：「咁你男朋友打唔打機㗎，佢打機嗰陣你咪好悶囉。」