(短)《月光狼人傳》: 第九章
「喂，你到未㗎？」「我成個戇居居嘅人咁企咗喺Sogo半日啦！」係呀，你冇估錯呀， 生平最少遲到嘅我，竟然而家就喺家宜嘅奪命追魂call之下應緊機。我自問自己出街，裝備都唔太差，準備起嚟嘅時間又唔太慢喎。都唔知點解而家竟然會淪落到要一個女仔等我出街，果然行街同埋shopping係女仔嘅天生吸引磁鐵嗎？真係非常可怕啊！
「出緊嚟，出緊嚟」 如果冇睇上文下理嘅人，可能仲以為我係度追近呢個女仔，做緊佢隻兵，要隨傳隨到。
「哼，遲曬大到， 我今次一定要你好好賠返畀我」「好好好....」老實講，我對於呢個所謂嘅賠償，心入面係冇底㗎。當然啦，考慮到本身我就只係一個普普通通嘅a0，更加冇鍾意嘅人，就絕對冇可能知道約女仔出街遲到嘅懲罰係點㗎喇。
喺又再經歷多30分鐘嘅巴士車程之後，我終於係喺sogo門口見到家宜嘅身影啦！
「sor.....sorry呀，我冇諗過會遲到咁多㗎。」我氣喘不已咁講。
雖然我未試過同女仔單獨出街，但係我都知道一個常識，但凡遲到咗，為咗尊重返原本準時到嘅人，我呢啲咁嘅遲到小伙子係需要，過去嘅時候扮臨急臨忙衝過去，好著緊咁！至於準時到嘅人受唔受理呢？就聽天由命啦。
家宜望住我咁嘅樣，嘆咗一口氣，然後開始講：「唉，知道錯未呀？」點解我喺呢句嘢都聽唔到撒嬌，我聽到嘅更多係無奈。「知啦知啦唔好嬲啦，唔好嬲我啦 家宜bb~」為咗舒緩家宜嘅怒氣， 我冒險喺佢個名後面嘅稱呼加多咗bb兩個字。
「哼~口甜舌滑，唔好以為我咁易就氹得掂呀！」雖然家宜佢冇直講，但係憑佢聽到我嗰句嘢之後，嘴角不經意地向上微微捲起，我就知道我今次成功咗啦！係喎，唔記得講，呢招係我琴晚準備瞓之前睇嘅書上面寫嘅。所以話，得閒睇多啲書都冇壞嘅。
按照本書上面所講嘅，女仔通常喺呢個狀態之下，只需要稍微氹一氹，就應該可以彌補返頭先被遲到嘅不滿。
「係嘅係嘅，不過賠呢啲嘢就遲啲先算啦。做咗原本想做嘅嘢先啦，唔係話要黎一齊行街嘅咩？」我假裝附和佢嘅講法，實質上係為咗佢對我遲到嘅注意力。「好呀，咁我哋行啦！」家宜面露笑容咁企起sogo門口呼喚著我。果然本書入面講嘅嘢係冇錯㗎~
熟sogo嘅人都知道，其實入面真係冇咩啱廣大嘅香港宅男們行。眾所周知，一間商場入面嘅男裝部，喺男裝部出現嘅男性顧客，通常都係畀同行嘅女性拉扯入去㗎！咁仲有咩地方好行啫？唔通行去家電及影音區咩？喇叭呢家嘢，梗係買電腦嘅時候一齊買埋㗎嘛。咁鐘錶、靚鞋、生活品味嗰啲，就更加唔洗講，完全唔適合我哋呢啲標準嘅香港宅男去行啦！通常都冇乜需要裝扮自己㗎嘛，宅男。
所以好老實講，就算我大大話話喺香港生活咗十幾廿年，我基本上係一次都未入過去sogo入面，如果唔係家宜今次約我一齊去sogo行，我相信我呢一世應該都唔會踏足呢度入邊。
喺門口一行入去，就見到淋漓滿目嘅化妝品櫃。我原本都諗住家宜可能會喺呢層到停留好一陣子先嘅，但係俗語有話，女人嘅心海底嘅針，你永遠冇辦法估得透。
家宜一嘢走咗去搭扶手電梯上上一層，眼尾稍都冇稍過啲化妝品。唔通係地下呢層嘅化妝品太cheap cheap，家宜佢看不上？但係在我看來，呢層啲化妝品連我都聽過喎，絕對係名牌嚟㗎噃，竟然會連停留喺度嘅時間都冇？
「仲企喺度做咩呀？」家宜擰轉頭催我。
「嚟緊」
「話時話，家宜bb你，唔使去睇下啲化妝品咩？」我將我嘅疑惑終於講咗出口，當然加咗「bb」呢個愛稱，如果唔係我驚佢打我XD
「我唔使呀，我不嬲都係如天仙一樣美麗㗎喎。你覺得我要用呢啲嘢㗎咩？」笑容十分可人的家宜說道。
「呃。。。唔係，你梗係唔使用啦！」呼。。好彩我個腦轉得都叫做快，差啲踩咗落個陷阱度添。
「咁你使唔使用呀？」
「我都唔需要」
「咁咪係囉，咁我哋使乜嘥時間喺呢啲大家都唔用、覺得冇用嘅展櫃到停留咁耐啫！」果然真係邏輯鬼才，咁聽落真係非常之有道理。
「咁....既然唔行化妝品區，咁我哋行咩展櫃呀 ？」「直接上男裝區囉！」果然，如我所料，以家宜嘅性格，一定係行咗男裝區先 。即係我都要變成嗰班喺男裝推比女性友人的入去換衫嘅其中之一人，真係可喜可賀，可喜可賀。
「宿主，雖然見到你咁開心，正常嚟講我呢個響導唔應該走嚟阻鬼住你嘅，但係我必須要同你做返一個緊急嘅提醒：喺呢個商場入面有你下一個目標 ，呢個係一個非常之緊急嘅任務，上面嘅系統要求我話畀你知，你必須要喺離開商場之前解決咗佢。如果唔係，香港警察嘅報案中心就會突然間多咗一個電話嚟消滅你，咁到時我嘅工作就到此為止啦！好，我嘅提醒完啦！唔阻你同你嘅對象繼續行街街。係喎，為咗以防萬一之後冇時間同你講，拜拜。」喺我一入到男裝部嘅換衣間嘅時候，小愛把聲就又出現咗喺我嘅腦海入面啦。
喱鋪大鑊喇，咁樣玩鳩我都有嘅，呢個系統。我而家極度懷疑系統其實知道，我今日係同之前一個受害人個女約會，先至安排呢次嘅突發任務。而家點算呢？究竟點樣先可以避開到家宜去搞掂呢個目標呢？冇可能當住家宜面去變身加解決今次嘅目標㗎？如果我真係咁做，恐怕我死千百萬次都冇可能有用。唔係噃，的而且確有方法去搞掂㗎喎，只要我唔當面變身，咁咪得囉！機智如我。
「喂，你得未㗎？冇嘢呀嗎？使唔使我幫你入嚟著一著呀？」弊，唔好再拖。雖然我喺家宜把聲度聽唔出有任何唔耐煩嘅語氣，反而唔知點解仲有少少性感添。但係 為咗保障我自身嘅人身安全著想，我都係快啲著好家宜揀畀我嘅呢套衫，然之後出去比較穩陣。
「嘩，仁仁你好型呀！不如以後就咁樣著啦。」家宜讚嘆咁話。以往通常我聽到家宜咁講之後，我一定會同佢反駁番幾句，跟住再死死氣咁道歉氹返佢。但係我而家滿腦子都係關於目標嘅事，唔好話反駁嘅語句我未諗好呀，我直頭連佢有講到呢句都聽唔到。
「喂，諗緊咩呀你？做咩神不守舍咁呀？講，你諗緊邊個女仔？」察覺到一絲唔對路嘅家宜，運用傳說中最準嘅「女人嘅直覺」，對我作出咗靈魂嘅拷問。無奈嘅係，諗嘢諗到出曬神嘅我，依舊都係聽唔到家宜對我嘅拷問。
家宜見我理都唔理下佢，頓時火冒三丈 差在未爆粗口：「張瑯仁，你好野，咁都唔理下我，走去諗其他女仔？！係咪同我行一陣街都咁唔願意呀？你咁唔想同我行街嘅，當初就唔好應承我啦！算，我自己一個人行。」佢放下咗呢個狠話之後，就真係自己走咗去行街。
當我由沉思當中終於回過神嚟嘅時候，喺我嘅視線範圍之內已經見唔到家宜啦！「小愛，都係你做得嘢，我就知道你唔會要你嘅宿主陷入呢啲麻煩當中嘅。」其實我之所以諗咁耐，最主要嘅原因都係唔知道點樣可以使走呢個比較上纏人嘅女朋友家宜。
「但係，小愛究竟將佢變咗去邊呢？就咁樣被消失咗，會令到我呢個現任同學兼男朋友兼殺父仇人好難做㗎喎！詳細嘅嘢都係等陣間叫小愛出嚟問啦，而家最重要嘅係搵到個目標出嚟，搞掂佢。」自以為小愛幫我搞掂咗個大麻煩嘅我，此時此刻終於要開始出動啦！
「好啦，咁而家。。我又唔知個目標係邊個，我又唔知個目標所在嘅具體樓層喺邊度...咁我點搵呀？？」我覺得自己又再陷入咗一個更加大嘅麻煩之中。
「唔使緊張，宿主，我之所以被稱為點用都得嘅響導係有佢嘅道理嘅。咁啦，雖然你冇問我，但為咗方便你呢個狼人嘅遊玩體驗，我都係為你指一條明路啦！你要殺嘅目標，而家喺11樓個書店度睇緊書呀！」
「嘩，小愛，你真係好幫得手呀，有你喺度，我覺得咩問題都可以迎刃而解啦！」估唔到，小愛真係咁幫得手。「不過，如果可以話埋畀我聽我要殺嘅目標具體係邊個人就更好啦！」「為免影響宿主嘅遊玩體驗，目標嘅樣貌身份等宿主你自己確認較為穩妥。放心啦，去到所在地嘅時候，我會幫你指個目標出嚟㗎啦！」我。。。仲可以有咩怨言呀，可以設定到呢個殺人獻祭遊戲，一個漏洞都冇嘅人，估計都有控制我嘅備用方案㗎。即係係呢度，我都真係必需要搞掂呢個目標。
我好鬼快趣就搭扶手電梯上到11樓（唔好問我具體點樣搭扶手電梯上去，因為作者本狐真係從來未上過去sogo。），其實11樓個書店都唔係話真係咁大，要搵人嘅話其實都好快搵到嘅啫。之不過，今次嘅我基本上唔需要小愛幫我指個目標出嚟。其實我應該諗到，系統所指定嘅目標都係曾經同我一齊玩過狼人殺嘅人，而我玩開嘅通常都係親友局，所以目標基本上都應該係我識得嘅人。
縱觀成個書局我所識嘅人就只得果一個，但係，點解偏偏會係佢.........