捉伊因: 第七個鐘

在已經混亂不堪的地下尋找一台notebook本身已經不易，要不發一聲翻開瓦礫查找更是難上加難，我們眼看手又動，奈何工廠面積很大，而且環境昏暗，又不知那notebook在什麼位置，只好像盲頭烏蠅般憑直覺找尋。

「你揾吓嗰面睇下有無，我揾呢面，萬一遇到隻鬼，記住匿埋，佢未必見到你。」我對酒店炒散陳煒下達指令。

分頭尋找時間快一倍，但同時風險也增加不少，要挪開大型的雜物很容易引發一連串細小雜物的騷動，要零聲音是mission impossible。埋首尋找不知不覺已過了半小時，整個地下也基本找遍，但還是找不到notebook蹤影，我正洩氣之際，衣尾被人用力的拉了一下，我嚇傻了，隨手拿起水樽作武器向後揮，「啪！」命中目標。

「痴咗線咩，咁大力打埋嚟，想打死我呀？好彩我眼明手快擋得住喳。」原來拉我衣尾的是酒店炒散陳煒，她故意壓低聲線。

「人嚇人嚇死人呀，我點知你係人係鬼，當然保命先啦。係喎，你嗰面揾成點？」我以耳語的聲音問她，生怕鬼會聽到後趕來。





她只是攤手搖頭，示意沒有任何收穫。

「揾唔到都無計，唯有去揾咗後門先。」我提議，但她的行動比我的說話還快，以行動表示了答案。

穿過工房走向後樓梯，她一直走在我前面，突然她停低了，我收掣不及撞上了她。

「呀！你做咩撞埋嚟？想抽我水？」她俏皮的說。

「我問你先真，做咩無神神停低唔行？」我反駁。





她指著地上一堆爛鐵，我順著她的方向看去，是一台notebook！但是已經爛了，我心情一沉，沒有表情。

可能她也感受到氣氛詭異，於是開口道：「可能唔係飛機逃生嗰部，而係我哋一開始解嗰部呢！」

但是世界是由莫非定律支配的，即是凡是有機會出錯的事都必定會出錯，我指著notebook殘骸上印著的一字，並說：「呢部係一號機而唔係五號機，所以我哋無咗一個任務……」

「等等先，依你咁講，即係隻鬼係可以破壞啲notebook，等我哋做唔齊六個任務，然後等死？」做酒店炒散的她想不到腦袋也挺靈光。

「所以呢場睇落係同時間競賽，實則係同隻鬼競賽嘅比賽，我哋一秒鐘都唔慢得！我哋快啲去揾埋後門先。」我說完拖著她跑。





去到後樓梯，圖則上的後門果然不存在，是封住了嗎？我和酒店炒散陳煒對望一下，然後敲一下四周牆身，看看有沒有空心的回音，可惜的是全部都是實心沉重的回音。

「睇嚟真係無後門，我哋快啲去埋前梯check下條煙囪。」她說，我緊隨其後快步走去。

煙囪連著大熔爐以及數條細管道，由煙囪內的塵埃和灰燼積聚數吋厚的情況看來，它歷史也夠悠久，再從半圓柱體外部的灰塵、油漆顏色和剝落程度看來，它是和工廠同時興建，而非後來搭建出來，即是圖則完全是另一間工廠。

「另一間工廠嘅圖則同呢間工廠究竟有咩關係？如果真係同我哋咁多個陳煒有關，究竟代表咗啲咩呢？假嘅圖則同真嘅工廠……」酒店炒散陳煒喃喃自語，陷入思想死角，但我卻被她的說話點亮了思維的深洞。

「假嘅圖則同真嘅工廠會唔會代表我哋當中係有人假扮陳煒，以假亂真，佢就係同隻game有關嘅人，控制住隻game嘅走向，令到成件事唔會偏離太遠，但問題係邊個先係假？」我推理道，而答案只有一個。

「會計師陳煒！」我和酒店炒散陳煒幾乎同時說出答案：「之所以佢唔駛死，係因為佢係隻game嘅人，所以隻鬼唔捉佢殺佢，佢提出嗰個方法其實係引隻鬼嚟殺人，佢果然係叛徒，要快啲通知其他人提防佢！」

「但應該點做？我哋都唔知其他人係邊。」她開始著急起來。

「揾唔到其他人唔緊要，我哋揾到佢都一樣ok，捉住佢，咁佢就害唔到人，我哋就可以係佢身上問到線索知道點先安全逃走到！」我越說越興奮，不自覺聲音大了點。





「口殊！細聲啲，咁樣會引到隻……鬼呀！」她說到尾聲音越發抖震大聲，手指著我身後，面容驚恐，由這些表現我不用回頭也猜得到，鬼正在走過來！