捉伊因: 第六個鐘

困在這荒廢工廠已經有六小時，距離時限只餘下一半，然而我們的任務也只解了一半，本來依據首六小時培養的默契，餘下的三個任務絕對能在三小時內解決，只是CW的廣播令整件事產生了變數。

「對唔住，我諗我都係獨自行動好啲，起碼唔駛被人推去送死，而且呢個game始終都係得一個生還者，到最後都係要我哋內鬥借刀，我唔想到最後先被人出賣。」女星陳煒說到這裡，頓了一頓，眼光投射向模型店老闆陳煒，厲了他一下，然後接著說：「比起將命運托付係人地手，我更prefer自己掌握，無野可以左右到我，包括婚姻。」語畢，獨自轉身離開，頭也不回往上層走了。

「冷靜啲，我相信一定有全員生存嘅方法，只要揾出我哋係度嘅原因，應該有辦法，同埋啲任務可能都會透露到啲message畀我哋……」這番話是衝著女星陳煒說的，但她完全沒有回心轉意的念頭，至於零碎片段一事，我隻字不提。

挽回她，除了是因為人多好辦事外，更重要是避免連鎖反應──一個接著一個離隊。人很有趣的，當大家在同一團體入面，基於群眾壓力，很自然會服從和安份守己，但一旦有人做領頭羊打破缺口，這份服從和安份守己的精神便會蕩然無存，到最後整個團隊只會變成一盤散沙。

世事往往都只會向壞的情況發展，又或者是吸引力法則吧，模型店老闆陳煒也開腔：「個CW又講得幾啱，差啲中咗你嘅奸計，你班契弟想攞我命？我先無咁笨，我條命要由我自己嚟作主，我先唔會畀你哋害死我，係咁先，今次係我哋最後一次見面，我出到去每年清明、重陽同埋你哋嘅死忌都會掃你哋墓。」我最不想發生的事最終也發生了。





「唔好中計呀！」雖然我情緒很激動，但說這句話時的聲線和感情都壓抑著：「佢想分散我哋，再逐一擊破，係呢啲moment我哋更應該團結呀，唔好走……」模型店老闆陳煒只是邊行邊舉起中指回應我。

「你唔會都想走啩？」我沮喪的問我身旁的酒店炒散陳煒。

「想㗎，不過見你得返一支公咁慘，所以咪唔走住囉。」酒店炒散陳煒俏皮的回應：「又或者你想我走我都可以走嘅。」她吐一吐舌頭。

不知道是否與吊橋效應有關，對著這個男仔頭的女性，剛才有一秒我竟然心動了一下。

「梗係唔係啦，其實係呢度五個鐘，你有無發現到啲咩係好特別嘅？又或者對我哋被捉嚟嘅原因有無頭緒？」我問她：「我覺得你嘅觀察力應該唔錯，畢竟揾錯處你都答得啱。」





「最怪嘅咪係啱啱任務個圖則囉，整體似成咁，但竟然煙囪位無標示，而且我發現個圖則清楚列明有一道後門係地下後樓梯，但我哋經過都唔覺有。同埋我覺得啲任務係有啲嘢想表達，但暫時未知係啲咩。」她滔滔不絕，但都是有用的情報。

「係喎，啱啱第二個解到嘅任務係咪你哋做嘅？」我按捺不住我的好奇心。

「係呀，係廁所入面，個任務好簡單，要我哋用light painting嚟畫佢指定嘅嘢。啊！佢最後嗰條題目係叫我哋畫一個參加者嘅道具，我就畫咗墨水筆。」她回憶道。

「咁而家已知嘅係地下仲有一個限時飛機逃生任務可以解，呢個我有信心，我哋落去完成咗佢先，我哋早啲解哂六個任務，佢哋兩個死嘅機會就會降低。」我看著酒店炒散陳煒，期待著她的回應。

「但你知確實位置係邊？萬一未揾到就遇到隻鬼，我哋點算？」她非常謹慎。





「呢個時候理唔到咁多，我哋要爭取時間，同埋我都想去check下枝煙囪，啱啱聽你咁講，我覺得煙囪好有可疑。」我扭開水，喝了一小口，然係遞給酒店炒散陳煒，她也喝了一小口，喝完後，我們便出發。

雖然不知道其餘三個陳煒正在做什麼，假如三人都正努力解任務是最理想的，但如果三人都在逛街，我相信我們定必全軍覆沒，我要阻此事發生。

小心翼翼的來到地下後，我們便開始探索該目標電腦，不過剛才的逃亡令到場面非常混亂，要不動聲色的找到看來不容易，而且不知什麼原因，總覺得這層比剛剛寒冷了不少，而且有莫名的壓迫感在身後某處發出，我向酒店炒散陳煒打了一個眼色，她意會到我的意思，於是抬頭掃視了整個樓層，但沒看到有異樣，便再次一起找電腦。