《小松奇妙物語！》: ２０
「就係俾啲貓自己喺鋪頭行嚟行去，咁就吸引到更多客人嫁啦～好似招財貓咁。」小松說。
「有咁神奇？啲客人唔會覺得污糟唔入嚟咩？」說畢，三嬸撥撥我散落桌上的貓毛。
「唔會，信我。」小松雙手放後，淺齒一笑。
「都得嘅‧‧‧‧‧‧反正鋪頭係老闆話事，你係老闆孫女，應該唔成問題。」三嬸同意這方案。
「咁我哋開工啦！」小松摺起手袖，勁力滿滿。
「？」我望著小松，不太明白自己定位。
真的單純坐著就可以了！！？
「你咩啊你，有咩想講？」小松把我抱起，放到收銀機旁：「你當自己另一個職務係防止有人偷錢喇。」
好吧，我先小睡一會。
反正，不會有人這樣白痴來糖水店打劫。
在我小睡過後，神奇的事發生了‧‧‧‧‧‧
一小時前還冷清清的店舖，轉眼已坐滿接近一半人流。看看天色，頂多只是傍晚，還未入夜。
「嗚啊‧‧‧佢醒啦。」、「巧打耳呀‧‧‧‧‧‧」、「等我影相先！」、「好想摸吓佢。」
店舖接近一半的客人，也是女性。
果然跟小松所說一樣，我似乎真能招惹一點財氣。
另一邊，三嬸似乎在廚房努力做著糖水，而小松則努力地落單，還有迎接大量女性客人。
「呵欠～」還是有點困倦。
「哇哈哈哈，佢打喊路啊！哎吔，影唔切！」那些少女們，感到十分可惜。
她們喜歡的話，我其實可以瘋狂打呵欠，但這樣子可能會嚇跑她們，還是不了。
突然，有個潦倒的男人，步行進來：「喂‧‧‧‧‧‧」
「係！請問幾位？」小松上前迎問。
「打劫‧‧‧」他低聲說。
「吓？認真呢？」小松再問。
「認真啊‧‧‧！拎哂收銀機啲錢出嚟。」那潦倒的男子續說。
「講笑渣？坐啦，客人先生。」小松沒好氣地笑笑：「邊有白痴會拎打劫糖水鋪。」
「我‧‧‧我‧‧‧‧‧‧」這傢伙平頭且矮小，做盜賊也沒有氣勢。
「食咩啊？」小松拉住他，坐在近門的位置：「我推薦六寶湯圓，因為凍凍哋食呢，都幾暖身。」
「我係嚟‧‧‧‧‧‧」他想重申一次進來目的。
「好啦～當你食六寶湯圓嫁啦，要等六分鐘左右，有咩想要可以再叫我。」小松完全沉醉於自己的工作世界中。
而那個疑似來打劫的男人，則愣然地坐著，好像完全不清楚正發生什麼事。
直至小松把湯圓奉上，他茫然地吃下一顆，才眼中炯炯，凝視小松‧‧‧‧‧‧
然後，他又快快地吞下幾顆湯圓，像隻餓了數天的狗，把整碗薑汁也喝下。
吃得滿足的他，坐了一會，趁我們店務繁忙之際，就跑走了。
三小時過去。
由於禁夜令下，小松不得不脫下圍裙，準備離開了。可是店外大排長龍，似乎要做死三嬸。
「忙到爆呀！忙到爆！！」三嬸在廚房大喊。
「三嬸！我要準備走啦。」小松已換好衣服。
「Ok！一陣會有人嚟接更，再見小松！」三嬸說。
「Bye！」小松把我放到肩膊上，不少客人都依依不捨地看著我離去。
步出店外，小松深深呼吸、嘆氣，彷彿重返現實世界。
「有嘢做時間真係特別快‧‧‧‧‧‧」進入地鐵站前，小松將我放入書包內。
「留啲位俾我抖氣。」我提醒。
「小葵，你今日訓飽訓足啦～」
「你試吓俾幾十對眼望住嚟訓，仲難過要清醒。」
地鐵站，車軌冒出燈光，一陣強烈風聲傳至，列車快捷地穿過，並慢慢停在月台之前。
「嘟」一聲，車門打開。
小松全身軟累累地，靠在玻璃屏上。
記得初初小松把我帶上地鐵時，我是坐在她膊頭上，那時候不少人都感奇怪地凝望，更差點驚動地鐵職員，幸好她剛好到站了。
「小葵，幫我按摩～」小松合著眼，說。
「唔識。」
「當係麵粉咁揉得架啦。」
於是，我在書包內，伸出兩隻貓手按住她的雙膊。
「哇‧‧‧好冇力啊。」小松不屑。
「我邊識咁多‧‧‧‧‧‧」四處張望的我，無意發現一些東西。
「喂，小松，睇吓右邊地鐵貼住張海報。」我說。
「咩呀？」小松稍為張眼。
那張海報，上面寫著兩隻字──「走犯」。
而海報，正是張貼住今天來店子的那個潦倒男人，其樣子完全吻合。
「佢咪係‧‧‧」小松也記起。
「今日原本嚟打劫嗰個人。」
「佢係走犯？！」小松盯緊海報。
我望向所犯罪行一欄，並讀出：「擅闖民居偷竊傷人‧‧‧‧‧‧及強姦屋主。」
「原來咁恐怖架‧‧‧‧‧‧」小松有些訝異。
「佢叫田文軍。」
小松疑惑：「我係咪應該報警？同警察叔叔講佢嚟過。」
「嘟嘟嘟嘟嘟‧‧‧‧‧‧」車門關上，列車高速駛出。
夜晚八時前，小松順利回家，她嘆言一整天都在跟時間搏鬥。
這種生活維持好一陣子，自力更生的小松，比起單純嘴多的她，更為吸引。
時間好快就踏入五月，雖然她房間的日曆永遠只會停在六月份，但掩蓋不到要考試的事實。
唯一的好消息是，大家差不多可以迎接暑假。
今天，小松如常地，在松記糖水店上班。
單憑她每天黃金三小時的努力，松記糖水店的知名度總算打響了一點，成為區內首間有貓進駐的商鋪。
不少學生、情侶，每天都會慕名而來。
客人們望著我，都總是笑的，也許貓咪就是有一種不可言喻的心靈治癒能力？
但是，今天卻遇到個，眼框濕潤的女生。
「小松，佢係你學校。」那女生，跟小松同校的。
「哇‧‧‧佢叫啦！」、「再喵多次吖！」、「真係好可愛‧‧‧‧‧‧」
我現在哪怕說一句話，都會引來很大回響。
「喔‧‧‧係喎。」小松一邊收拾碗匙，一邊望向剛進來找座位的同校女生。
「你好！想食啲咩啊同學？」小松一貫開朗地說：「我哋同校我計八折俾你。」
「多謝‧‧‧」她擦擦眼睛，才下單：「要個SUMMER同心太軟‧‧‧。」
「好，係咁多？」
「唔‧‧‧」這同校的女生身材胖矮，站在小松旁邊頓時形成差距。
「我留意到佢好似喊完嚟啊‧‧‧‧‧‧」小松來到收銀機前，輸入帳單。
我回憶著：「我好似見過佢。」是學校門外？
「佢唔係我個級。」小松手指輕快地戳著收銀機，短短日子內已經用到熟能生巧。
甜品做好後，小松一一奉過去。
「慢慢食。」小松泛起微笑。
那個女的，很快就把兩款甜品都吃光。她在吃的時候，可以看到她吃得開心，但吃完就會回到失落的情緒。
「幫你收收碟‧‧‧？」小松靠近。
「師姐‧‧‧‧‧‧」那女的，忽然叫小松。
「係‧‧‧？你係中幾？哈哈哈，我冇乜印象記到全校嘅人。」小松傻傻地笑。
「我係低你一級，中四‧‧‧‧‧‧」對方答。
「喔‧‧‧‧‧‧考得好嘛？考試。」小松抿嘴，問。
「‧‧‧你可唔可以陪我傾吓計？」對方又問：「其實我一直覺得你好好‧‧‧‧‧‧喺學校係出名嘅「七大女童軍」，份人又好、又冇咩煩惱咁，大家都話你同咩人都做到朋友‧‧‧‧‧‧」
「冇問題啊，我哋女童軍宗旨就係助人助己。」小松淺笑：「你入嚟個陣已經見你眼濕濕啦，做咩唔開心啊你？」
「我成日俾人叫做肥婆肥婆，我真係好憎‧‧‧‧‧‧」她說。
「喔‧‧‧‧‧‧世界點都有呢啲人，笑吓咪算。」小松安慰。
「但我都好憎自己！」
「憎自己肥？」
「係‧‧‧‧‧‧同埋，我鐘意嘅人，已經有對象。」
「咁感情冇得勉強嘅。」小松說得輕鬆，拍拍她的膊。
「係呢，你咩名？」小松問。
「吳卡文，叫我卡文就得。」她答。
「好！我認住你，返學可以再同我傾訴。」
「‧‧‧‧‧‧」卡文低頭、眼框再次濕潤。
真奇怪，低一級的學生，突然走過來松記，想跟小松談心，兩人明明之前互不相識。
「我去忙先啦，你都記住要識靠自己振作啊。」說畢，小松就繼續去忙。
在小松背對卡文離開時，我竟然發現，她用仇怨的眼神，盯住小松數秒。
她見小松忙過不停，就沒再打擾，快快付帳就走人。
待一天的工作完結，我才問小松一些事情。
「七大女童軍係咩嚟？你喺學校好出名？」這些，都是我在今天卡文口中聽回來的。
「冇啊，係學校啲人起俾我哋「女童軍」嘅名，因為全校淨係得七個女童軍。」小松抬頭，自傲地哼一聲：「我就係其中之一～小葵估唔到呢～」
「成為到一份子係好厲害？」我真心問。
小松觀望日落傍晚的餘燼：「係咪好勁？又唔算嘅‧‧‧‧‧‧至少我當係同朋友聚埋一齊嘅課外活動囉。」
「女童軍‧‧‧‧‧‧」
「估唔到，原來你都有人崇拜‧‧‧‧‧‧」石澳這條樹蔚海邊下的路，特別舒服。
「我初初都估唔到，你係統領好多野貓嘅將軍啦，哈哈哈。」小松斜斜地望我：「我哋之前好似淨係見到對方缺點咁。」
「咁咪好，以後唔洗掩飾太多。」我從書包跳到小松膊上，一同感受涼風快意。
「但太多人，淨係識睇我嘅優點。」
「得我唔識睇，呵。」
「唉～」小松在街口，忽然停下來：「就咁返屋企好似太悶。」
「我帶你去體驗吓，野貓點樣搵垃圾桶嘅食物。」
小松把我放到頭頂上，往沙灘海邊奔跑：「我哋去癲吓！」
「癲！？」
一直跑到沙灘，小松踩腳脫鞋，將我帶到海邊，然後掉入冰涼的水中。
我扭一扭全身，濺出毛髮上的水。
「哈哈哈！！」小松則不斷俯水，撥水向我。
完全零反擊能力的我，只好逃出水面，在沙灘上奔跑，逃離女魔頭的襲擊！
「唔好走啊！哈哈哈哈！」誰知，她居然還興致勃勃地追過來，變成一場追逐戰。
還大喊什麼「仙女散花」，就起腳踢起一堆沙子向我。
瘋了，瘋了，都已經瘋了。
這段日子，我跟小松不知不覺間變得形影不離。
在睡覺，我會伏在她一旁。
在上班，我會坐在一邊觀望住她。
在家裡，我會跟隨她的步伐而行。
去買菜，會待在她的環保籃子。
有事沒事，都會在她的兩肩、頭部遊走，就像被磁鐵吸住，好不容易才能分開。
然後，她很快又會將我抱上手，讓我幾乎習慣了她的溫度。
同時，我們都像把食人魔事件忘卻，或許忙碌急趕地生活，對想要忘記某些事情的人來說，也是一種幸福都說不定。
每個早上，都會被小松朝氣而有活力的聲線感染，她逐漸讓我覺得，原來生活能有個人陪伴，是多好。
亦把我從失去芳的迷茫中，伸手拉回來。
藍天白雲，風和日麗。
今天，是小松站崗的日子。
聽說，今天是同學見家長的日子。
因此，身為女童軍一份子的她，就擔當起迎接客人到來的任務。
雖然我不太清楚，人類的審美觀可謂美，可謂醜，但從回校的學生不顧家人目光，入門時不停地盯著女童軍們，就可得知，小松和她的朋友有多厲害。
即使是一個點頭、微笑問好，也足以令一眾男同學神魂顛倒。所以，造就了群每一分鐘就進出校園一次的無恥之徒。
「好想佢哋瘋狂同我講早晨‧‧‧‧‧‧」一位剛剛出來的男同學，笑得如入夢境，如痴如醉。
至於之前來過松記店舖的學生吳卡文，今天我亦看到她攜同母親的回杖校。在進入門口，經過那條「女童軍之路」時，其母親更低聲細怨：「點解我個女唔係好似佢哋咁‧‧‧‧‧‧」
七名女童軍當然聽得見，有的面面相覷、有的不作表情和反應，其中膚色健康、身材最高的那位，更不屑地盯人母親一眼。
真是各有千秋。
可惜我不是家長，只能站在遠處。
不過，小松會趁沒家長進來時，對校園大閘外的我，做出調皮的鬼臉。要是我臉部再精緻一點，我都想做個鬼臉回應她。
「嘟嘟嘟～」校務處電話響起，職員接聽後有些困惑。
然後，那名校務處職員，呼叫外面站崗的女童軍們：「友思，四樓好似出現咗啲事啊，你哋過去睇睇？」
那個叫友思的回應：「嗯，阿敏你同我去睇吓？」她戴起眼鏡，是個充滿知性美的少女。
「你繼續留喺到，我同小松去。」那個叫阿敏的女生，是連沒有人類審美標準的我，都唯一認可的天生麗質。
大概，美到我形容不出她的美，因為那種氣質只有親眼看見，方才懂得。
「我？！」小松也意想不到。
「哈哈～」那位高高的女生，說：「帶小松去會唔會令情況再麻煩啲，闖咗咩禍。」
「行啦，家長日出事，不外乎係啲家長問題。」阿敏說。
「果然係隊長。」小松跟隨其後、抱拳：「英明！」
小松離開我的視線後，我有些好奇她會上去處理什麼事‧‧‧‧‧‧
跟上去，看一眼好了。
「貓‧‧‧？」神色一直冰若無情的那位女童軍，詫異地盯住我：「我哋洗唔洗捉住佢‧‧‧‧‧‧」
「唔洗，等班男童軍做，學校每次都叫佢哋守後門、操場、走廊，肯定好得閒～」說罷，友思呼喊他們。
不需一秒，數十名男童軍服裝的少年，精悍地現身：「莫友思同學？請問有咩事？」
莫友思指指我，說：「見唔見有隻貓準備上樓梯？捉住佢，溫柔咁放返出去。」
「收到！」他們同步踏地、進行軍式敬禮，操場頓時聲如洪雷。
而我，則感到殺氣重重‧‧‧‧‧‧
「S級密令、S級密令！！！」其中，一名男童軍拿出手機，神色凝重地說：「要協助女童軍，捕捉一隻毛髮淺黑嘅貓，請各單位立即停止老師指派工作！如無視家長查詢或請求，可以不受任何懲罰！！」
單純捉拿我，有必要說到這麼恐怖嗎‧‧‧‧‧‧
我不再多想，馬上踏跳梯級，逃離捉捕。
逃走過程，那些正上落樓梯的學生和家長都嚇了一跳，靠在一邊讓路。
在下一個轉彎位，我駭然聽見樓上傳來急速的腳步聲，當下轉變移動路線，改為直奔三樓的走廊。
穿過別人的跨下、避過他人的攔截，閃過眾人的圍捕，這種逃出生天的感覺，倏地與我腦海一些畫面互相重疊。
那‧‧‧
那個零碎畫面中的我，一樣在逃跑不停。
周邊的牆壁塗滿字樣、圖案，身後追趕的是一群穿著校服的不良少年。
而且‧‧‧‧‧‧
我更是以人類的視覺，去逃命。
這種臆測的畫面，伴隨即將要撞到牆壁的我消逝。
「嗄‧‧‧」撞牆前，我急剎。
然後，再跑上四樓，進到一所女廁躲藏。
「應該跑咗上五、六、七樓，繼續上去睇睇！」走廊外的男童軍，比軍人還要勇猛。
女廁，他們進不了來吧？
忽地，外面有把女生響亮的哀哭聲，聲音主人更直入女廁。
「嗚嗚嗚‧‧‧」透過廁格下的空隙，我看到一雙粗胖的腿，停在一個洗手盤前。
「卡文！」另一雙清瘦的腿進來，是小松的聲音。
「唔洗理我‧‧‧‧‧‧」這哭聲，聽著也煩厭。
「點得呢，要唔要紙巾？」小松慰問。
「唔洗‧‧‧！點解我同你哋啲女仔一樣差唔多呢種歲數，但係你哋可以好我咁多！！」卡文痛哭。
「你唔一定要理你媽咪講嘅嘢嫁？我都成日唔理自己老豆。」
「呢個社會根本就係看臉時代，就算我做啲咩都唔會有人鐘意‧‧‧‧‧‧好似你咁簡單笑一笑，就已經好多人為你死心塌地，點解我同你哋差別咁大啊‧‧‧‧‧‧！」
看來，小松正安慰情緒失控的她。
說些什麼，我就不太清楚。
「你唔應該花咁多時間在意人哋，在意下自己好冇？」小松真摰的聲線，很動人。
「我為佢付出咁多，想得到番少少報酬都冇‧‧‧‧‧‧！」
「但你都唔需要做到送錢俾人用呢個地步‧‧‧‧‧‧」小松撫順她的背脊：「班主任知道呢件事之後，同你媽咪講其實係好正常，老師幫緊你。」
「我唔係俾‧‧‧只係借住俾佢先‧‧‧‧‧‧」卡文哭不停：「但點解付出咁多‧‧‧‧‧‧點解學長鐘意嘅人係你，嗚嗚嗚嗚‧‧‧‧‧‧」
「我‧‧‧？」小松訝然。
「嗰日我嚟你兼職嘅地方‧‧‧‧‧‧」卡文握緊洗手盤：「其實‧‧‧其實係想‧‧‧‧‧‧嚟罵你，串你有幾巴閉，搵機會落你面‧‧‧‧‧‧因為我無意偷聽到學長講，佢好鐘意你‧‧‧‧‧‧」
「‧‧‧」小松無話可說。
「不過‧‧‧‧‧‧直至我見到你嘅笑容、你嘅性格、你嘅外貌，我終於知點解自己會失敗，自己咁失敗‧‧‧‧‧‧嗰陣我呆咗‧‧‧覺得自己好冇用‧‧‧‧‧‧」
「你真係好執著愛情？」小松反問。
「係啊‧‧‧！我冇咗鐘意嘅人，根本無動力返學！」
「我唔太識呢啲嘢，不過‧‧‧‧‧‧我至少知道無結果嘅嘢，就無謂停留。」小松說。
「嗚‧‧‧‧‧‧」她正以淚洗面。
「嚟，我扶你出去先。」小松扶持著肥胖的她。
卡文不小心捉住小松髮尾，發現捉錯後說了聲：「唔好意思‧‧‧‧‧‧」才把手放到膊頭上，讓她扶出去。
不過，卡文的手有些奇怪‧‧‧‧‧‧
她以握拳的手勢，搭住小松膊頭，而不是用手掌。
她不是想打小松一拳，就是手中握住了什麼。
「家長，就算你罵個女蠢都無用，佢始終係你個女，點樣教識佢先係最重要。」另一邊廂，女童軍阿敏把卡文的母親，帶到女廁外。
「如果我個女有你一半咁聰明，又靚女，咁懂事，唔會傻到送錢俾男仔用‧‧‧‧‧‧」那家長對阿敏，說：「你屋企人真係幸福。」
看來阿敏是負責安慰家長。
「計我話，見到家人已經好幸福。」小松微笑。
「你都好可愛，個女有你一半就好‧‧‧‧‧‧」家長又轉對小松，說。
「Ok啊，食多啲菜，人都精神啲。」小松眨眼、舉起小姆指。
她說完的同時，我憶起今天早上，在床上差點睡過頭兼且不斷賴床的小松。
問題解決後，二人就相互不揪不睬地離去，留下恭送二人離開的小松和阿敏。
阿敏以微笑恭送：「再見。」直接她們消失在面前，才驟然變面。
「兩母女都好似有啲極端咁‧‧‧‧‧‧」小松轉問：「阿敏，佢媽媽點啊？」
「好似係，因為班主任同佢阿媽講咗，自己個女「借」錢俾人用嘅事，而令到佢兩母女嘈起上嚟，一個堅稱自己只係借，另一個就一尾罵。」阿敏抱手、搖頭：「又會有阿媽，咁想自己個女係人咃個女。」
剛巧，學校鐘聲響起。
「放飯～」
小松與她的六名朋友吃飯時，我則在附近四處遊逛。無意間，我遇到那位愛哭胖女孩卡文，她似乎跟母親分開了，獨自在街上四逛。
而我之所以能遇見，皆因她腳步停在一間美容店前，在看望貼在玻璃窗上的宣傳單張。
上面列舉多項服務，但卡文的焦點只有一個──「美顏療程」。全套療程價錢為八千元，是什麼樣的概念？
「八千蚊，會唔會好貴‧‧‧‧‧‧」她正細算。
這種療程，報完就一定變美嗎。
我覺得變美就不一定，但這八千元肯定可以吃到很多東西，特別是魚。上次跟小松到街市買菜，我特意發脾氣要她經過魚檔，為什麼要發脾氣？因為她十分抗拒那裡。
我粗略看過鮮魚的價錢，這八千元，應該夠我把裡面的魚都吃光光。
耐何小松不願意給我買魚，更反對我發脾氣說，死也不會再去魚檔、雞檔、肉檔這些地方。
想著想著，肚子又餓了。
那些乾巴巴的貓糧，話雖不是很難吃，但我仍然想吃魚的鮮、魚的甜，以前經常在石澳燒烤場捕食，真是養貴了口腹。
正值上午，艷陽高照。
我回到公園的樹蔭下乘涼，每每我跟小松上學，想找個地方歇歇就會來到這裡。
有時候，索性會待在小松的書包內，一起陪她聽堂課。從窄小的書包拉縫內，我仰視著‧‧‧‧‧‧
她巧笑倩兮的側臉。
有時候，心底會有一種感覺。
一種，
我不敢去多想的感覺。
「哈，你聽唔聽得明啊，小葵？」她有時會問。
然後，我總是會假裝睡去。
「又係你。」公園樹蔭下，坐著一人。
那微捲蓋眼的瀏海，是他最大特點。
這次我還留意到，原來他左邊眼角下，是有顆痣。
「冇大礙？上次。」他問。
「冇。」我跳到他旁邊。
「你唔熱？個頭留到咁厚。」我不禁問。
「‧‧‧」他又無視我的問題。
「你識瞬間轉移？」我轉問。
「點解咁講。」沉默的他，說。
「你上次明明唔喺小巴上面。」
「你眼花。」
「唔通你為咗救我而出現？」我坐開一點。
「唔係‧‧‧為咗你。」看樣子，他不善交談。
「你住喺附近？」不然，則會在上班時間坐公園。
「可以咁講。」突然，他站起身，從不知哪裡取出一枝釣竿。
「枝嘢邊到出現？！你啱啱有拎住？？？」我睜大眼睛。
「我去釣魚。」他眼神終於與我交接：「一齊？」
「出發！」瞬間，我已跳到他膊上。
他被我那迅雷的速度，有點嚇到：「‧‧‧‧‧‧」
之後，我們在公園出發，一直往北面前進。
「我真係想知，點解你上次會出現喺嗰架奇怪嘅小巴到。」我提出疑問。
「你就當，係偶遇。」
「你坐埋入嚟仲疑似將時間停頓埋，我好難當你係普通人。」
「如果，我唔係普通人又點。」
「你係唔係都好，都會多謝你，疑似救咗我哋。」
「你要接受，有啲事情永遠都唔會有答案。」
我坐著怪裡怪氣的他，到達將軍澳海濱長廊一帶。那裡有些別墅式的民居，放眼過去皆是家徒四壁，看來還未出售。
相較於石澳，這個海十分平靜，沒有陣陣波動，的確是個釣魚的好地方。
「你唔洗返工？」我望著他，轉念又道：「咁又係，有咁嘅法力仲洗乜返工。」
「你已經將我假設成有法力嘅人。」他跨欄，走到岸石上。
「我有講錯？」
他不回答，把釣竿揮出。
天空萬里無雲，跟整個大海很相似。
「仲最重要係，你聽得明貓語‧‧‧‧‧‧」我思疑：「同小松好相似。」
「‧‧‧」
「不過小松唔可以好似你咁，玩時間停頓，唉。」我嘆氣。
「我邊識時間識停頓。」他很淡然，沒一絲情緒。
「上次架巴士擺到明突然停低咗，除非係我眼花。」我坐下來，靜心等魚。
「話唔定係你自己整到局部時間停頓？而你自己唔知。」
「我？我只係隻貓，邊會得。」
「世界上都好多妖貓，而且未必所有貓都係真。」假道學仙人望著海，說：「你試試，對個海唸咒‧‧‧點唸都可以。」
「唸咒？？？唔好講笑，我唔會成個白痴咁，對住個海講嘢。」
「唸咗話唔定有好多魚上釣。」
我立即對海大叫：「魚啊～～～魚呀～～！！！！！」