《小松奇妙物語！》: ２１

話畢，海面發生一縷縷波動‧‧‧‧‧‧水花正濺起。

「！！？」我驚愕。

其後，數十條海魚，突然彈跳上岸邊，形成我從見過的奇景。

「噠噠噠‧‧‧！」牠們一著地，便死死地掙扎，非常新鮮。

「都話咗，你係一隻有法力嘅貓。」他說。





「喂‧‧‧‧‧‧」我被這畫面震懾：「咁樣假咗啲‧‧‧‧‧‧我喊一聲，就會有咁多魚自動送上嚟？」

「事實擺在眼前。」

「哇好多魚啊。」、「跳哂上嚟嘅？！」、「咩事咩事‧‧‧‧‧‧」路人們，都反應不來。


「最好！我以後唸呢個咒語，都會有一堆魚跳出嚟。」我先上前咬住一條，免得被路人搶光光。

「快啲執啊大家！好多魚啊呢到！」一名頭髮花白的地中海老伯，在海旁大喊。





隨即，引來一堆本正在耍太極、跳豔舞的婆婆伯伯，都趕過來撿走我的魚。

「呵呵呵，今晚食飯有得加料啦，仲唔洗錢添。」一名婆婆徒手撿了三、四條魚。

「喂‧‧‧‧‧‧！唔好偷走哂我啲魚。」我怎樣制止，也沒人理會。

轉眼間，地上的魚已被那群突如其來的老人通通檢走，我就只有口中咬住的一條。

「呢啲小便宜，你唔會夠廢老搶。」假道學仙人說。

「如果我係人，佢哋就真係唔夠我搶！」一連繫到魚，我有些激動。

「人？」他側臉向我。

「嗄‧‧‧」我死死氣地，把魚帶到旁邊吃：「如果我係人‧‧‧‧‧‧咁就有好多可以做到嘅事。」

「我好少見貓，會咁講。」

「我由以前就一直咁諗。」

「點解？」

「因為，我見過太多唔公平嘅事，世界往往都係人類佔盡利。」我一下子，撕咬掉半塊魚肉：「某程度上，我哋係受緊人類統治。」

他的釣竿，到現在都沒什麼動靜。

「你總會搵得番自己。」他只答一句。

「你仲未答我，你係咩人，身份咁神秘。」正常來說，我應該好好提防他才對：「仲要識貓語。」

「你都識聽人話，你身份都好神秘。」他反說。

「你唔講就算。」我有些不爽：「唓，仲以為我哋可以做個朋友。」

轉眼間，那條魚被我吃得七七八八，只餘魚骨。






「或者，我哋以前就見過，一早已經係朋友。」


「你依種廢青樣咁特別，如果我識你，我點會忘記。」我又望望他那對被瀏海掩蓋得看不見的眼睛。

「屋企，仔細咁搵一次。」他說得像真一樣：「小松，冇理由咁蠢。」

「！？」

我轉頭的瞬間，他已經消失不見。

他的話，是什麼意思。

假道學仙人最後遺下一句不明不白的語句，害我行思坐想一整天。

後來，我覺得有點蠢。

為什麼因為他的一句話，令自己坐立不安。

而且，我很明顯跟他沒有任何關係，絕對沒有。

我很確定。

一如以往，放學後又到松記糖水店工作。

「小葵，今日好似心事重重咁嘅。」小松到收銀機前找換硬幣，準備開鋪。

「你又知？」剛好聽到的四嬸，問。





「我感覺到。」她皓齒一笑。

「最近呢，我無聊織咗件嘢俾小葵。」四嬸故作神秘地說。

「吓？」小松抬頭。


四嬸從腰包裡，掏出一件小小的圍裙衣服：「嚟，當我送俾小葵著嘅！」

「哇‧‧‧」小松接到手，細心欣賞：「靚喎，真係有「松記」兩隻字喎，四嬸咁勁嘅。」

「嘻，無聊整嘅小手工啫。」

這個多事的女人，叫四嬸，不是之前的三嬸。話雖兩人的外貌、性格都相差無幾，實際上卻是兩個不同的人。

四嬸是個喜歡織布造手工的人，三嬸則喜歡跟顧客聊些有的沒的。

除此之外，松記糖水店的員工還有幾位，包括一嬸、二嬸、五嬸、六嬸、七嬸，總共七個人。

一開始，我也以為她們是同一個人。

直到後來，我發現小松叫她們名字時，稱呼不一，才得知這事情。


我是不知道小松爺爺有什麼癖好，居然會連續請了七個外貌跟乎一樣的嬸嬸來工作。

辨認她們，有個小秘訣，就是根據今天的星期。

例如今天四嬸，就是星期四。

「小松，放哂啲硬幣入機未？」四嬸問。

「七七八八喇。」即使不用面對人，小松亦會自然微笑。

「準備開鋪！」四嬸把餐牌分發到每張桌上：「自從小松同小葵嚟咗之後呢，糖水鋪生意就有增冇減，後生女果然唔同啲。」

「吓！關事咩？」

「當然啦，你咁後生靚女，即刻令到呢到少咗陣老人味，隔離新開嘅小方糖甜品鋪全部後生仔女兼職，鋪面裝修又搶眼過我哋，所以好多時啲客都會走去隔離食。」四嬸鬆一口氣：「原本生意率開始有啲緊張架啦，係你嚟咗，先即刻幫輕番。」


「原來你哋同隔離間甜品鋪鬥緊嫁？唔講真係唔覺‧‧‧‧‧‧」小松一面茫然。

「係啊，同過你老爺子講，洗唔洗裝修或者請啲年輕兼職嚟吸引番人流，佢就死都唔肯。」眾嬸嬸都有一個特點，就是愛閒聊。

「喔，爺爺食古不化？」聊著聊著，小松坐到四嬸面前。

「唔係，佢話想保留呢間鋪嘅原本面目，唔想為咗同人爭生意，而搞到失去自己喎，哈哈哈哈，你話幾好笑。」

「哈哈哈，唔想出錢渣？」

「我諗都仲有另一個原因嘅‧‧‧‧‧‧呢間鋪，當初係你嫲嫲有份開，可能佢想保存住呢份思念？」

「嫲嫲‧‧‧‧‧‧」小松看望周圍：「爺爺肯定好掛住佢。」

「同埋你爺爺為咗保我哋七姨妹份工，都唔請其他兼職返嚟，就知佢幾有心，一直原班人馬用我哋七個。」四嬸說。


「換個角度睇，爺爺又幾好人嘅。」小松微微一笑。

「所以，我哋七姨妹都將生命，交付喺呢間鋪到，希望唔會辜負你爺爺！」

「放心，呢個生意咁好，佢肯定數錢數到好開心。」

「都要多得你同小葵，特別係阿小葵做咗松記吉祥物之後，好多人特登為咗佢拎食糖水，估唔到放隻貓喺鋪頭就有咁嘅效果，真係神奇。」四嬸不禁感嘆。

在兩個閒談之際，今天的第一位客人出現了。

他年紀約莫三十，穿著普通的襯衫：「你好，啱啱開鋪？」

「你好！客人想食啲咩啊？隨便坐。」笑容清新的小松，熟練地招呼。

「果然係我要搵嘅人。」對方卻回答。


「？？？」小松側側頭，不明白。

「未介紹，我係隔離鋪頭「小方糖」嘅老闆，方陶。」

「老‧‧‧老闆？！」四嬸有些驚愕。

「聽講，你哋鋪頭生意最近唔錯‧‧‧‧‧‧松記糖水店。」他懷以一個鋒利的目光。

「有質素，生意當然好！」四嬸自讚。

「所以係咁嘅，我想高薪挖角你過嚟。」方陶只對小松一人，說：「我哋小方糖，返工時間任揀，時薪會係呢到兩倍。」

「吓！？？挖角？？」小松還未搞得懂情況。

「一時間，你可能決定唔到，我會等你消息。」方陶續說。


說罷，方陶就徐徐離開。

「傻的嗎，我點會過去。」小松抱手。

「果然‧‧‧！」四嬸好像想到什麼：「佢哋真係想打贏我哋松記，先特登起喺隔離。」

「仲要咁明目張膽入嚟招兵買馬‧‧‧‧‧‧」小松說。

「佢哋，一定係想得到徽章！」四嬸突然說出，我們不知道的設定。

「咩徽章？想搶哂我啲女童軍徽章‧‧‧‧‧‧！！？」小松露出驚怕的表情：「我儲得好辛苦架！」

「唔係，係屬於每間糖水鋪、甜品店嘅專屬徽章。」四嬸緩緩解說：「可以得到或者集齊其他店嘅徽章，係無上榮譽嚟。」

「難怪怪爺爺唔親自嚟管松記啦，要佢管咁多嘢，我諗佢白髮都多幾百條，雖然都已經禿禿哋‧‧‧‧‧‧」


「估唔到，最後我哋呢啲小店都要捲入呢啲紛爭‧‧‧‧‧‧」四嬸顯得憂心。

「咁點算啊？」

「其實呢場戰爭持續咗好幾年，區內都係死淨幾間。」四嬸摸摸小松的頭：「你要記住，做糖水唔係為咗鬥，係為咗令食嘅人開心，記住呢個宗旨就得。」

「嗯，多謝教誨！」小松點頭。

「唔該～～」又進來一位客人，肥胖的卡文。

「咦，係你啊卡文？想食咩呀？」小松轉頭，低聲問：「同媽咪返到屋企之後，冇事啊嘛‧‧‧‧‧‧？」

「冇事。」卡文笑得有些硬：「係啦，我想‧‧‧‧‧‧嚟買啲糖水，不過係買好多喎。」


「好多？」小松晴朗一笑：「幾多呀？幾多都有喎，屋企開派對？」

「係吖‧‧‧‧‧‧係可以當係，我想要十碗綠豆沙、十碗紅豆沙、十碗薑蛋湯、十碗雪瓜木耳、十碗豆腐花。」她略略看過餐牌一眼，就下單。

「哇，買咁多？」小松驚喜歡笑。

「係吖‧‧‧分俾朋友食啊嘛。」文卡說。

她有朋友？

「四嬸，開工第一張大單嚟喇。」小松揮揮收據紙。

「得得得！」廚房裡的四嬸，應道：「即刻整，等陣啊。」


「嚟得正好！一張單，就抵消到隔離甜品鋪五十個客人左右。」小松還想著對面。

十五分鐘後。

卡文要的糖水，都製作完成。

但現在有另一個難題，她要怎樣帶這麼多糖水回家？

「好似有啲多‧‧‧‧‧‧哈哈哈。」小松望著幾袋糖水外賣，有些呆然。

「我一個人應該拎唔到返屋企‧‧‧‧‧‧」卡文亦不知從何入手。

「我幫你啊。」小松微笑。

「好啊‧‧‧！唔麻煩啊嘛？」卡文表情充滿感激。

「唔煩，你係大客喎。」


如是者，小松跟卡文二人，兩手攜住一大袋糖水離去。

可能長久相處下，我已成為小松的小跟班。

她一踏出店鋪，我就下意識地跟過去。

「咦，你隻貓貓跟過嚟喎。」卡文留意到我。

「喂～小葵跟出嚟做咩呀？」小松像對個孩子說話。

我沒回答，因為我去哪裡，都是我的自由。就像你只是想普通出街，也被老媽細問要去哪裡一樣麻煩。

不是不想回答，而是我已是成年的貓，不用再管我。

同一道理，我本來就是野貓，不需要像隻受照顧的家貓，處處受到慰問和照顧。

等等‧‧‧‧‧‧

我為什麼可以胡思亂想這麼多，青春期麼。

卡文就住在寶琳附近的公屋，樓下有不少婦人聚集，一起跳簡單的舞蹈。

即使上到卡文住的二十樓，亦仍可聽到婦人們在下面公園播的歌曲。


「到喇。」卡文住在最盡頭的單位。

「你屋企有冇人？」小松禮貌性一問。

「哦，冇啊，阿媽去咗返工。」

卡文住的地方，是個一開門就可以看見所東西的小單位。室內幽暗，窗口位置都被窗簾掩蓋住，客廳的沙發有一半位置佔住衣服，桌子亦堆放很多的雜物。

「想我擺喺邊啊？」小松邊望邊問。

「檯得嫁啦。」卡文把門關好、鎖上。

「好‧‧‧」

小松稍稍掃開桌上的雜物，以擺放糖水。桌子上放著什麼減肥藥、增高藥、唇膏、美容單張等物，十分混亂。

「你啲朋友‧‧‧未嚟啊？」小松頭轉轉，周圍觀望：「如果唔係一陣嚟，就可能要放定啲糖水入雪櫃先。」

「喔‧‧‧唔緊要，隨便坐啊。」卡文隨便拿出兩碗糖水，一碗給小松：「你都食一碗啊，幫我拎上嚟咁辛苦。」


「舉手之勞，唔洗客氣。」小松朗然微笑。

「唔緊要啦，唔報答返你，我唔好意思嫁。」卡文把綠豆沙，放到她面前：「食一碗啫，當我請你。」

「咁‧‧‧‧‧‧好啦。」小松點頭、展齒一笑。

「係喎，小松師姐你屋企有咩家人嫁？」吃糖水期間，卡文主動聊起。

「呃‧‧‧爸爸、爺爺、外公‧‧‧‧‧‧」小松想著想著，就會心一笑：「仲有一大堆動物朋友。」

「喔‧‧‧‧‧‧你都係住喺附近？」

小松搖搖頭，髮後的馬尾也跟著擺：「唔係啊，我住石澳嗰邊。」

「石澳‧‧‧‧‧‧邊頭啊？好少聽人住石澳。」

「石澳村。」小松邊吃邊答。

「哇，嗰到住好似幾有米！？」

「呃‧‧‧唔算啦，整到好似別墅咁，但其實規格同村屋冇乜分別，哈哈。」小松細嚼時，臉蛋也會出現顆淺淺的酒窩：「你識唔識中五一個姓「符」架？佢就真係超有錢啦，住大屋。」


「哈‧‧‧符愛糖啊嘛，你哋咁出名我緊係識。」卡文有點皮笑肉不笑：「但你住嗰到，都總好過我呢到先‧‧‧‧‧‧」

「換個角度諗，都幾溫暖啊，一出廳就可以見到所有家人，唔洗好似我屋企咁，爺爺外公喺隔離橦屋住。」小松有些抱怨成份：「屋企已經少人‧‧‧‧‧‧仲要隔到咁遠。」

「正喎，有私人空間！」

「我有個興趣架，鐘意煩人。」小松瞇眼抿笑。

「你嘅生活一定好正‧‧‧‧‧‧」卡文羨慕非常。

「還好，一般般。」

卡文吃綠豆沙的速度，比小松快整整半碗：「哎吔！」在她收拾期間，不小心打翻了膠碗落地。


「小心啊‧‧‧」小松望過去。

「‧‧‧小松，幫我拎一拎電視機面前塊抹檯布。」卡文指住那裡。

「哦‧‧‧」小松放下膠匙，馬上去幫忙。

誰知她一拿上手，就痛叫了一聲：「啊‧‧‧」抹檯布跌到地上。

「咩事啊？」卡文猛地回頭，問。

「好似俾嘢戳到‧‧‧‧‧‧」小松按住受手掌。

我去把抹檯布翻了翻，發現裡面插住數枝繡衣服的銀針‧‧‧‧‧‧

「啊！嗰塊係阿媽用嚟補衫，放住啲針喺嗰到當針包用。」卡文急忙地，把紙巾拿來，替小松抹一抹走血跡。

「我諗好少事啫‧‧‧枝針咁細。」小松凝視傷口，只有一顆小血珠溢出。


「真係對唔住，係我唔記得。」卡文說。

「唔緊要‧‧‧」小松把受傷的手指，放到我嘴前：「俾小葵舔一舔就無事啦。」

「雖然魚腥好吸引我，不過你唔係魚。」我不舔。

「如果可以上你身，將啲痛楚放落我到就好。」卡文嘆氣。

「又唔洗咁誇張，哈哈哈。」

「或者交換身體，直至你唔再痛為止，哈哈哈哈。」卡文亦笑住答。

「唔洗咁傻豬嘅，你關心我已經夠。」

「如果可以，你願唔願意先？！哈哈哈哈哈‧‧‧‧‧‧」

「呃‧‧‧」小松抬頭、細想。

「有人幫你分擔痛苦唔好咩？」

「都好嘅，哈哈，但世邊有咁多如果啊。」

「即係你都‧‧‧‧‧‧願意嘅？」

「願意。」小松點點頭。

「‧‧‧」

卡文轉為一副意味深長的笑容：「多謝你。」

「哈‧‧‧唔洗客氣？」小松站起身：「我同差唔多要返鋪頭啦。」


這幽黑的單位，跟卡文那笑容十分相襯，嘴角那弧度深劃出的暗位，彷彿如客廳二合為一，融入這裡的陰暗。

「呢個時代呢，其實唔洗再返兼職，亦都唔洗讀書。」卡文開門，送小松離開：「只要有樣，已經係一切，贏咗一大半。」

「唔同嘅，自己返工，感覺點都好啲，係咪？」小松穿上鞋子，步出走廊。

「或者係嘅‧‧‧‧‧‧」淡淡一笑的卡文，凝視過小松的眼珠後，把門關上：「再見。」

「再‧‧‧見。」她被卡文的關門速度嚇呆：「返去囉‧‧‧‧‧‧小葵。」

「嗯‧‧‧」有些不祥的預感。