《小松奇妙物語！》: １８

生芥草買了兩張入場票，方便等下混進去。


相較於以前，雖沒人山人海的景況，但仍是車水馬龍的街道。


「各位，可以入場，請交出入場票，多謝合作！」隊頭開始郁動了。


我們三個入到會場後，立即往保安室位置出發，途經「高斯死亡樂團」曾經表演過的場地，現已空空蕩蕩。






從前貼在牆上的羅蘭海報，也被人通通撕走，效率極高。


「‧‧‧真係好似消失哂咁。」小松迴視兩面牆壁。


「連外面印住羅蘭嘅嗰塊巨型廣告牌，都換走咗。」生芥草順帶一提。






說著說著，二人到達保安室外面了。


小松突然做出手刀姿勢，疑問：「咁樣從後劈人條頸‧‧‧‧‧‧係咪真係可以整暈對方‧‧‧‧‧‧」看來想要一技傍身。


「唔知‧‧‧‧‧‧你試吓。」生芥草轉身，亮出後頸。






「真係！？」小松有些緊張。


「係‧‧‧！」他點頭。


「咁我嚟啦！」眉目深鎖的小松，凝視目標。


「噠！」


合緊眼睛的生芥草，身子向前微傾一下，就再沒什麼異樣：「好似‧‧‧‧‧‧唔太夠力。」

「咁我大力啲！」小松再劈一下。


「噠！！」


「都總係‧‧‧‧‧‧」生芥草撫撫後頸，說：「差啲勁力咁。」


「啊！！！」小松倏地舉起雙手，往生芥草後頸瘋狂劈打。


「哇‧‧‧哇‧‧‧哇哇！啊！呀呀！！」生芥草半跌半拐地扶牆：「痛‧‧‧痛喇！開始痛！！」






小松就像著了魔一樣，兩手皆刀般，以手刀姿勢不斷襲擊芥草後頸。


「出面嘈嘈貢咁，咩事啊？」一名保安打開門，問。


「保安叔叔，我唔小心襲擊咗佢啊，可唔可以扶佢入去敷冰坐吓呀？」小松指住半蹲按頸的芥草。


「啊‧‧‧‧‧‧！」芥草咬牙吟痛。


「呃‧‧‧」保安懷疑中。






「求你！」小松雙手禱告，水汪汪的眸子穿透保安的心扉。


「唉‧‧‧」保安甜笑一番：「好啦好啦。」


入面如之前一樣，陳設沒什麼特別。


「冰就冇，紙巾就有，可以俾你用嚟止血。」保安對生芥草說。


「喔‧‧‧‧‧‧唔洗喇，唔該。」生芥草和小松對視一眼，眼神充滿示意性，就如在說明剛才只是一場戲。






「保安叔叔，呢到都幾大。」小松坐在沙發上，裝成天然無害。


「算係喇，我都係呢一、兩日先入嚟做。」保安挑逗地問：「咁小妹妹你呢？有冇IG俾保安叔叔follow吓？手機都得喎。」


「手刀就有你份！」忽地，生芥草站起以手刀形式，劈打對方後頸。


「噠！」響亮的一記。


「做咩啊你？」保安轉頭，愣問。


「咁都唔暈！！？」生芥草跳起，用力再劈一下。


「噠！！」比上一次更響。


「做咩啫你！！？搏打啊！！！？」可以看出，保安露出痛相了，但依然沒有暈倒，更想出手還擊。


「大叔啊！暈啦好嘛！！」這次，換小松拿起茶几上的煙灰缸，一記敲在保安的頭上。


「啊‧‧‧啊嗄‧‧‧」保安先是搖搖欲墜，後倒於地。


「呯──」保安暈倒去。


「哎吔‧‧‧！」小松憐憫地凝視腳下的保安，蹲下替其擦擦頭部受傷位置：「痛唔痛啊‧‧‧Sorry啊！！」


另一邊，生芥草已經坐在保安室的電腦前，翻尋當日的錄影片段。


「葵啊，幫吓手啦！？我驚佢個腦會積瘀血啊‧‧‧‧‧‧」小松繼續安撫暈去的敵人。


「我只係一隻貓，你期望我幫到啲乜？」此時，我把頭從書包緩緩地冒出，像地鼠一樣。


「唉，咁你入返去啦‧‧‧‧‧‧」小松用手掌拍拍我的頭。


「咦‧‧‧」電腦前的生芥草，十分愕然。


「咩事啊芥草？」小松抬頭，問。


「唯獨是嗰一日嘅錄影片段‧‧‧‧‧‧」生芥草目光銳利，盯緊電腦：「唔見咗。」


「唔見咗！？」


「真係‧‧‧搵唔到，垃圾桶都冇‧‧‧‧‧‧俾人刻意，刪除咗。」生芥草得出結論。


「吓，我哋仲背負傷人嘅罪名去搵出真相‧‧‧‧‧‧好大代價嫁喎。」小松走近電腦，一同觀看。


生芥草了當地說：「換個方法諗，咁代表，有人想刻意隱藏真相。」


「邊個啊？羅蘭啊？」小松托鄂，獨自推測：「有可能，但可能唔係唯一嘅可能。」


「小松，你嗰次話入咗個奇怪空間，其實係咩一回事。」生芥草問。


「佢帶我哋上三樓，入面最盡頭嘅房間，唸咗唔知咩咒，一打開眼就喺嗰個叫紫魅嘅空間入面‧‧‧‧‧‧」小松如實地說。


我也是透過這種方法進去，不過沒有唸什麼咒。


「嗰陣喺入面，我仲遇到一個男仔架，不過‧‧‧‧‧‧」小松說到一半，默默咬唇：「唔知佢去咗邊，可能佢同我一樣，係星期五被抽中嘅幸運兒。」


我就是那男生。


「如果搵得番佢就好‧‧‧‧‧‧」小松眼帶不甘：「如果係咁，就唔止得我一個，知道呢件事。」


「咁依家，至少證明咗有人刻意刪除證據先。」生芥草離開椅子：「我哋差唔多要走，一陣佢班老友記返嚟就麻煩。」


「等陣‧‧‧！」小松心思細密地問：「如果佢醒咗，同警察叔叔報警咁點？！」


「放心，交俾我。」生芥草握起相機，走近保安：「小松，你可能要另一另轉身先。」


「喔‧‧‧‧‧‧」


接著，好奇的我又偷偷把頭冒出，看見生芥草把保安的衣服都脫光光，給他影了一幅幅名為《沉睡猛男》的主題照片集。


「咔嚓──」生芥草拍攝的模樣，挺專業的。


「芥草得未啊？」小松問。


「就快！影一影埋條‧‧‧‧‧‧」他欲言又止：「‧‧‧頭髮先。」


拍攝結束後，兩人正打算快快逃逸，沒料到一開門，就遇到其他回來的保安。


「你哋係邊個？！」這名保安，一來就神色疑慮地問。


「我‧‧‧‧‧‧係阿B！」生芥草緊張得說了些不知所謂的話。


「呃‧‧‧！咁我係阿A！！」小松也有點慌張。


「A？B？」門外保安深思細唸：「邊個嚟？」


兩人沒回答他，便已從他腰側開溜。


那名保安進入保安室，望見自己暈倒的同伴後，想通了什麼事情，立即追出走廊，大喊：「喂‧‧‧喂！！你兩個停低！！！邊個係阿A！！邊個係阿B呀！！！」


「哇哇呀呀呀！！！！」雙手握緊書包的小松，回望後方：「佢追嚟喇！！！」


「小松跑快啲！！你頂唔順嘅話我抱住你！！」生芥草逃命起來，比小松跑更快：「但記住提前講定先！！！」


「追住前面嗰兩個阿A阿B啊！！佢兩個啱啱闖入保安室打傷啲兄弟！！！」那名保安死追不放之餘，更呼應其他保安加入。


「仲刺激個過山車‧‧‧‧‧‧」我又偷偷把頭冒出。


小松就像一部過山車，座我走過凹凸有序的樓梯、轉過不同的急彎、還有那些大直路。陣陣急風迎面而來，混合著小松馬尾的苿莉髮香，這程車坐得過。


離大門不遠之際，數名保安牽手攔住出口，異口同聲：「咪走！」


「冇計‧‧‧‧‧‧」生芥草咬一咬牙，在出口不到兩米前停下，並半蹲著：「小松，要好好生存落去。」


「吓，芥草先生你‧‧‧‧‧‧」跟在身後的小松愣住。


「踩住我嘅背脊，踏出去追尋真相！」生芥草高聲大喊。


小松清瘦的腿，一腳踏上生芥草的背，再用力向前而躍‧‧‧‧‧‧越過攔在門口的保安！


「噠」成功著地。


那些保安皆是一面愣然，轉身呆望如同女神降臨的小松。


「芥草，如果佢哋非法禁錮你，一陣再幫你報警！」說畢，小松就消失於街道中。


「呃‧‧‧‧‧‧！個女仔去咗邊啊？！」保安們如同配角，說些可有可無的對白。


經歷過一番激烈的逃亡，小松最終入了間龍蛇混雜的機鋪，打算匿藏自己所在。


她躲在一部「食鬼街機」後，悄悄觀察街道外的情況。


「班保安叔叔真係‧‧‧‧‧‧」小松喘氣不停。


「可唔可以再嚟多次。」我伸出手掌，拍拍小松膊頭。


「吓？」小松不明。


「過山車。」


「你就舒服啦，小葵‧‧‧‧‧‧」為了躲避，小松走入一點：「你可唔可以變巨大化俾我坐嫁？如果係咁就保護到我。」


「我可以坐喺書包做你指揮官，俾最正確嘅指示你，你聽我說話行動就可以。」這書包內裡已經被我睡暖了。


「咁同俾你操控有咩分別啊？」


「冇。」我如實地答。


突然，有幾名保安根據路人的口供得知小松所在，正在進入機鋪，這迫使小松走上機鋪的二樓。


「呢到啲機嘅音量真係好大‧‧‧‧‧‧」小松踏上那窄狹的樓梯，到達機鋪二樓。


比起一樓那些單獨遊玩的街機，二樓的遊戲機大部份都需要兩人以上，才能遊玩。


「你估班友會唔會追到上嚟‧‧‧‧‧‧」小松邊行邊問。


「唔知，不過二樓好少人，你不如搵個位收埋自己。」我偷偷左右一顧環境，並提出方法。


「呃‧‧‧」小松就像玩捉迷藏的慌張孩子，找不到可藏之處。


「嗰到！」我指住十點鐘方向，有部廂型街機。


那部廂型街機，被一塊黑布掩住內部，外面的人只望到玩家的腳部，而且連頂蓋，私隱度十足，肯定不會被人發現。


小松默默走過去，但望見街機主題時，卻變得有些懷疑：「恐怖射擊遊戲‧‧‧‧‧‧」


那些保安居然會追到出來，真的是一般的保安嗎？


「睇吓上面有冇。」他們正步上二樓。


「呃‧‧‧！！」小松馬上俯身進入廂型街機中。


入到去，小松才發現裡面原來坐著一人。


對方似是睡著了，戴住連衣帽睡覺，看不清長什麼樣子。可是從其腳上的CAR版黑色高筒心型Converse、腿上破爛修長的牛仔褲、原宿風棒球服連帽薄外套看來，對方是個穿搭很有強烈叛逆風格的人。


「呃‧‧‧」小松顯得有些尷尬，小聲提醒：「小葵，唔好嘈醒人哋‧‧‧‧‧‧」


我在書包中點頭，因此小松的身體跟著動了兩下。


機廂內，除了放著大量遊戲硬幣，更放著幾罐朝日啤酒和煙盒，有些空罐子及滅燼的煙更掉落在地上，十分混亂。


「正常應該係機鋪到‧‧‧‧‧‧」保安們四周圍查望。


「點解佢哋咁執著要將我搵出嚟，帶去俾警察叔叔‧‧‧‧‧‧」小松一副想哭的包包臉：「小松我唔想坐監啊。」


「冇事。」我安慰。


我的安慰不夠兩秒，機廂的黑布就突然被人用力掀起‧‧‧‧‧‧！


「嘿嘿，仲搵你唔到！」是保安，他大喝道。


受嚇的小松，下意識地退後，不小心碰到了旁邊正沉睡的人。


「‧‧‧‧‧‧」被弄醒的人，悄然地打個呵欠。


「後面嗰個唔關你事！繼續訓覺！！」保安指住小松身後的人。


對方反問：「你整醒我，我又點番？」是把偏中音、有點厚、有點硬的女聲。


然後，她把連衣帽放下，秀出俐落之餘有點蓬鬆的短髮。那銳利的眼睛，沒把眼前的男人當作一回事。


「莫‧‧‧莫妍小姐‧‧‧‧‧‧！？」保安神情大驚。


「喔～？你係我老豆啲馬仔？」這個叫莫妍的人，逗趣地問。


「係‧‧‧係‧‧‧‧‧‧！」保安恭敬地答。


「搞咩要欺負呢位‧‧‧‧‧‧」莫妍忽然搭住小松膊頭，深深地凝視著她：「可愛又青春嘅少艾。」


「係‧‧‧係囉。」不清楚情況的小松，也參一句。


「因為佢入咗我哋地盤搞事，仲打傷咗個兄弟！」男保安說得滿腔憤慨。


「噢，真係睇唔出。」莫妍打量著小松。


「咁係有原因嫁。」小松樣子有些委屈。


「一定要幫我哋主持公道啊，莫小姐！」保安敬意十足，連雙手都放在膝上微蹲。


「唔‧‧‧‧‧‧」莫妍閉眼步出機廂，忽然一腳踢在保安身上：「死開。」


「呀‧‧‧！」保安痛得跪下捧腹。


「對女仔咁追究，你係唔係人嚟？」莫妍冷漠地俯視：「唔好阻住我～你哋有三秒時間。」


「呃‧‧‧‧‧‧」


「三、二、一。」莫妍不依衡速倒數。


「啊！對唔住，對唔住！」保安忍痛離開，其他保安見狀也急急逃離。


「哇，好厲害。」小松眸子發光。


「哈，小意思。」莫妍回收那張冷淡臉孔，轉為淡然的寬容，想跟小松握手：「莫妍。」


「杞小松。」小松握住。


「小松～」莫妍退後幾步，至到桌上冰球機坐下：「睇嚟你惹咗啲小麻煩。」


「係大麻煩！我朋友俾佢哋捉咗。」小松說出景況。


「同你一樣，係個靚女？」


「叫得上靚仔囉。」


「咁應該只係斷幾條肋骨出嚟，冇乜嘢。」莫妍說得不在乎。


「吓！！好大鑊喎！」小松全身不其然抖顫一下。


「你不如喺到陪我玩吓？」莫妍返回到廂型遊戲機裡頭。


「我諗‧‧‧‧‧‧我冇時間陪你，對唔住。」小松始終憂心忡忡：「多謝你啱啱幫我解圍。」


在小松準備步落樓梯時，我偷偷舉頭出去，看見莫妍目光固定在她背部，淺淡而笑。


「喂，小松。」莫妍追了過來。


「吓？」小松樓梯落到一半、停下。


「我諗我，幫到你？」莫妍婉慢地說。


雖然小松不知為何，對方要幫助自己，但也點頭同意了，因為她似乎有很大影響力。


一路上，莫妍毫不忌諱地抽煙，小松則默默跟在一旁。當然，小松免不了側眼偷望莫妍幾番，因為對她而言，這個人依然充滿神秘。


「你係學生？」莫妍問起。


「係，中五。」小松答。


「喔‧‧‧」莫妍兩指夾下嘴上香煙。


「咁你呢？」。


「我？呃‧‧‧‧‧‧每日打吓機咁。」莫妍需要思考好久。


一、兩個街口，就回到會場外頭。


莫妍無視入口的職員，直接步進會場裡頭。


「喂‧‧‧你未俾入場票‧‧‧！」一名怯懦的職員將她叫住。


主管馬上拍打該名職員頭部：「作死你啊！莫小姐都唔識？」然後，擺出一副恭迎她的樣子，不過問太多。


跟隨其後的小松，當然也受到這種禮遇。


「既然俾人捉住咗，應該喺保安室。」莫妍意外地熟路。


彷似，跟這裡有什麼關連。


「咔」莫妍毫不畏怕，直接將保安室的門扭開。


幾個脫掉保安外套，露出兇猛紋身的大漢，隨即往門外盯住，但弄清對象時，卻一一微蹲，表現恭敬。


給被綁在地上的男子，正是生芥草。


「莫小姐！咁夜嚟到‧‧‧‧‧‧請問有咩事？」那些原形畢露的保安，問，


莫妍無視保安：「你朋友？」指住被綁的人，向小松問。


「係！」小松點頭。


「鬆綁。」莫妍命令幾名保安。


「小姐‧‧‧‧‧‧佢打傷咗我哋一個兄弟‧‧‧‧‧‧」保安們，說。


「聽唔明人話？」莫妍神色不耐煩：「定要幫你挖乾淨對耳，得你聽清楚啲。」


「明白‧‧‧‧‧‧」保安不敢怠慢。


從生芥草的臉頰看來，只是被打了幾拳，沒太大問題。


「但小姐！我哋喺佢件衫搵到一張記者卡片，佢可能想暗中報導我哋呢到嘅內幕！」保安把卡片拿出。


莫妍拿上手看看，又望望受傷的生芥草：「唓，見唔到卡片職位寫住「低級記者」？洗乜驚呢種人。」


「但係‧‧‧‧‧‧！」


「唔洗再講。」莫妍搶過生芥草的相機並掉到地上，用力踩幾腳：「佢已經乜都報唔到。」


相機瞬間變得支離破碎。


「小松‧‧‧」生芥草走到她面前。


「對唔住，嚟遲咗。」小松扶住他。


「唔緊要‧‧‧‧‧‧」生芥草張開口，原來相機記憶卡放了在裡頭。


「唔怪得知你啱啱唔出聲‧‧‧‧‧‧」小松低聲說。


「嘿‧‧‧低級記者必備技能。」


「走。」莫妍霸氣回歸，領著我們二人離開。


走出會場後，生芥草大口地呼吸：「呼‧‧‧嗄‧‧‧啱啱俾佢哋打咗幾十拳‧‧‧‧‧‧痛到‧‧‧」


「下次冇咩事，唔好再入嚟呢啲地方。」莫妍提醒完，就預備離去。


「莫‧‧‧妍。」小松叫住她：「多謝你。」


背住我們的莫妍，默默而笑：「小意思～」


「下次請你食飯！」小松再加一句。


「不如宜家？」


小松望望手錶：「十點半‧‧‧‧‧‧都可以啊。」她點頭。


「認真呢？」莫妍笑問。


「我小松有恩必報嘅！」


「咁‧‧‧‧‧‧」莫妍雙手放入外套袋，抿嘴微笑：「去邊到？」


「食魚！」此時，我才久違地露出頭部回答。


「哇‧‧‧？」莫妍被嚇退一步：「有‧‧‧‧‧‧隻貓喺入面嘅？」


「喔，係啊，佢叫小葵，有利益可圖個陣先會出現。」小松笑容可掬地說。


「唔怪知得‧‧‧‧‧‧」莫妍低頭、傻笑：「哈‧‧‧啱啱總係覺得，有啲不明嘅視線望住我咁。」


「小松，我索性以後訓喺你書包。」我說。


「喂，你搞到我裡面全部都係貓毛咪死！」