《小松奇妙物語！》: 11

說罷，音樂奏起，眾人開始投入到旋律中。


羅蘭也合上眼睛，開始唱出首句……


一把既沙啞，又絕望的唱腔。


同時，生芥草也按下錄音筆，偷偷把歌曲錄下。






「暫時都冇咩特別啫……」小松半掩耳朵，因為音響實在太強了。


「我都覺得除咗嘈之外，冇咩特別之處。」生芥草小聲同意。


驀地，頭頂上方的灑水器開動，灑了些水到觀眾身上。






「落雨啊？」小松張手，接住水點。


「灑水器開咗……」生芥草抬頭，說。


「你哋第一次嚟？正常效果嚟！」一位狂迷，在旁亢奮地道。

「一睇就知你哋未投入個氣氛！！」生芥草旁邊的胖子狂迷，說：「你哋係情侶啊？可以搵到一樣鐘意地下重金屬嘅女仔，真係好！嘻嘿嘿！」


和其他觀眾相比，他們二人確實顯得生硬。


入場的聽眾，都有種共鳴，就是統一地做出揮手動作。而為了擺脫這種格格不入的感覺，小松都只得學習他人揮手。


「我覺得你放低隻手仲好……」我無奈地直視，小松那機械性的揮手動作：「一啲節奏感都無。」


「我髮尾俾條髮戴紮到好痛啊…仲邊得閒理乜鬼節奏……」小松咬牙切齒地猛力揮手。






「！！」突然，我嗅到了什麼。


「呢陣味，好怪……」我嗅著小松的頭髮。


「怪？我一日至少洗兩次頭嫁喎！」小松不悅地撐腰。


「唔係，係上面灑落嚟嘅水。」我指出。


「莫非……」小松漸漸睜大眼睛，對我掩嘴低語：「啲水入面…有奇怪成份？」

「水應該無味，但我聞到味。」之於是什麼，不太清楚。


「果然係貓啊！」小松點一點我鼻子：「靈敏過人。」


「小松？你同我講嘢？」生芥草瞧向她。


「冇啊，呃…我去一去洗手間先。」說畢，小松就轉身欲離。


經歷人海的一番壓縮，亦終於擠出會場外。






「呼…」小松在通道透透氣，伸腰大叫：「係自由啊！」


我又作善意提醒：「噓，太大聲，好多人望住你。」即便是通道，也有零散幾名高斯樂迷聚集著。


因為整層二樓的通道，也是屬於高斯樂團的，從牆上的海報可以看出。


「大家…真係當佢神咁拜。」小松走到海報前。


忽然，不遠處的汽水販賣機旁，傳來爭執的聲音。






三個貌似不良少年，正圍堵一名少年。


「喂～見到你明明手郁郁咁！你偷影相啊！？拎出嚟！」從衣著及言行，可以看出他們三人衡是高斯狂迷：「高斯大人係唔容許任何形式記錄低！你咁樣可以叫做褻瀆神明！」


高斯狂迷的幾個特徵：穿龐克夾克、語氣暴躁、擁護偶像。


「我…我冇啊…！」被圍堵的人，是個冬菇頭少年：「我真係冇啊…！」


「仲扮嘢…」不良少年抽起他衣領，不爽地說：「你係時候要見識下，高斯嘅暴力。」


「打…打…打打…人犯法！報警啊……！！」冬菇頭少年叫得像被宰的雞：「救命啊……！殺人啊！！」


「喂，停手！」小松現身。


我用一秒時間跳落地下，向他們三人自告：「我唔識呢個女仔。」希望他們會聽得懂貓語。


麻煩了，


麻煩了。


「哦～一個女仔？」不良少年走近小松，對她凝視。


「仲有隻貓！」小松正想按住膊上的我，卻發現摸了個空：「咦…小葵呢？！」


她望見肩膊空空如也，立即回頭返望：「你做咩想靜靜雞走咗去啊！」說畢，小松強行把我抱回過來。


「我哋贏嘅機率係零啊！零！」我掙扎著。


「有時係必須為正義而戰嫁！！」緊閉眼睛的小松，死死抓住我。


我如同在跑步機上，不斷地原地踏步。


「搞乜鬼……」那三名氣焰正盛的不良少年，也看得一頭霧水，火也被蓋熄了。


「喂…小松，等陣。」我偷偷瞧向那邊：「嗰個人好似已經偷偷走咗，個冬菇頭……」


「咁我哋……」小松話中有意。


一息間，原本被小松抓住的我，轉為被我牽住走，終於有種掙破跑步機的感覺。


「你點會跑得咁快咁大力架！！」小松小步小步地跟著我走。


於是，小松就這樣彎住腰捉住我身子，我就不斷地跑，假裝她正被我拖走。


直至，沒入通道轉角之中。


「……」三名不良少年一面愣然。


「嗄…嗄…」我瘋狂地喘氣。


「走囉！」離開他們的視線範圍後，小松馬上抱起我奔跑。


她一直跑到女洗手間才收步，大概是因為這裡是男人禁地。


「佢哋應該唔會追嚟…」小松搖搖頭，準備推門入廁格：「入去打個電話俾芥草先，我驚一陣出返去又遇到嗰班友……」


一推門，卻發現剛才那個冬菇頭男生！


「哇啊！」小松急速退後。


「啊…呀呀！！！」那男生，也留露出懦弱的叫聲。


「係你…？你唔係走咗啦咩？」小松貼在洗手盤，問。


「啱啱…多謝你幫我引開佢哋注意力……」他小聲地說。


見是剛才幫助的男生，小松的怯意也退了幾分。


「唔緊要…」小松抱住雙手，尷尬地說：「不過你洗唔洗匿埋喺廁格咁嚴重，仲要係女廁。」


「佢哋唔會入女廁啊嘛…。」他這才緩緩走出廁格。


近眼看去，是個滿臉暗瘡，個子矮矮的男生。


兩人並站之下，小松更好像比他高一點點。


「啱啱嗰班……」


「高斯狂迷。」他知道小松想問什麼，便答：「我偷影咗一幅相，唔小心俾佢哋發現。」


「咁你……都係呢個樂團嘅聽眾？」小松問。


「唔係…我嚟，係為咗搵人。」他道出自己目的。


小松點點頭，腦袋消化著新攝的資訊：「雖然我唔識你，但睇落我同你都算係場內仲有理智嘅人。」


「咁緊係……」他語氣突然陰沉起來，彷彿要開始說個鬼故事：「因為呢到唔係一個簡單嘅地方。」


「咩意思…？」小松雖知，但由旁人所述，還是不禁愣然：「不過，我一直都覺得呢到怪怪哋。」


「你指嘅怪，係邊種怪。」


「就係…」小松苦惱地，想著形容方法：「由我第一次嚟，見到依個樂團開始，我就覺得成件事好怪、好詭異？直覺嚟？我唔知，但個心，就係有種…心有餘悸嘅feel？仲一直徘徊緊，令我覺得點都要嚟呢到知清楚咩事，解決某啲嘢。」


小松轉身，望住鏡中的自己：「我平時唔係咁，仲有啲懶，但唔知點解……我就係嚟咗呢到想知道「高斯死亡樂團」嘅一啲嘢，就好似控制唔到自己嘅……欲望咁。」


小松的懶，我可以證實。


她回家後衣服總是會胡亂掉，然後直接躺在大床上。


「…好抽象下。」對方也聽得一頭霧水。


「唔好講我啦，你呢？」小松往他回望。


「我想搵返細佬。」


「細佬？你細佬係高斯狂迷？」


「係，而且仲係元老級狂迷。」


小松亮出精明的眼神，感覺對方能幫得上忙。


「你叫咩名？叫我小松。」


「昂救濟。」


「……」小松嘴角微微抽動。


「你唔洗…刻意去忍笑，我個名都俾人笑呱……」


「Sor！」小松噗一聲大笑：「哈哈哈哈哈哈……」


「感覺呢到都唔係太安全，不如落去再傾。」昂救濟說。


小松很快就收拾好心情：「嗯。」


啊，你忘了生芥草他嗎？


很快，二人就溜到外面一間小小的咖啡廳。


一離開那表演會場，某種紮於心頭的不安感，就像隨即消逝。連原本被髮戴紮得痛痛叫的小松，也忽然輕鬆起來，紅色的髮戴可自由解開。


「兩位，熱牛奶同凍朱古力。」店員奉上飲料。


他們坐的窗口位置，能注視表演場地的入口。


「我細佬喺高斯樂團未出名、未到咁多人識之前，已經一直支持緊。」昂救濟雙手放在熱牛奶杯子上：「佢好入迷，成間房都係個主唱羅蘭‧高斯嘅海報，又有好多佢哋嘅CD，幾乎每一週嘅表演，都會入場去睇。」


「然後……」小松深入地聆聽著。


「有一日，佢用手機傳送咗信訊俾我。」昂救濟面色極沉：「佢話，自己即將要全身奉獻俾高斯。」


「…」


「開頭我以為佢廢up下，但喺嗰晚之後，佢就冇再返過屋企，就算報警都無用，警方完全搵唔到任何線索。」昂救濟咬咬牙，盯向那會場：「但我知道……我細佬一定俾佢哋帶咗唔知去邊。」


對於家庭處境相同的小松，她深深體會得到，失去家人的滋味。


「一定係呢個樂團帶走我細佬！」昂救濟生氣得，一口灌下整杯熱牛奶。


「你細佬大概失蹤咗幾耐？」小松先問基本的。


口腔不堪熱力的昂救濟，把牛奶吐回杯子中：「嗚…咳咳…咳！嗄，我細佬，大概一年半前唔見。」


「咁講法，高斯死亡樂團都係近呢年先興起……」


「而地下偶像嚟講，佢哋成績已經係最Top，連同樣出名嘅「中彈少年團」都比唔上。」昂救濟提出可異之處：「但奇怪嘅係，佢哋冇諗過出道，只係一直以地下偶像身份活動，完全冇諗過出現喺大氣電波面前。」


「我都覺得奇怪，有錢到揸勞斯萊斯，都只係喺呢啲小地方表演。」原來小松也十分疑惑。


二人一同陷入苦思，那昂救濟卻率先拋下小松，把注意力放到我身上：「佢係你隻貓？」


「係啊，叫葵。」小松趁機摸我的頭：「成個向日葵咁。」


「喔…好得意，佢飲唔飲牛奶？」這個昂救濟，不是打算把剛才吐出來的牛奶給我喝吧？


「飲啦當然。」小松笑容燦爛。


「咁就好啦…」他真的把那杯熱牛奶（嘔吐過），推到我面前：「飲啦，應該都凍。」


「……」望著杯中的奶，我靜如止水。


「小葵？飲唔飲啊？人哋一番好意。」小松詢問。


「小松，我希望你係講笑。」我一本正經地說。


小松只以笑容回應，臉頰更冒出酒窩，多了份青澀的甜。


「佢好似唔多願意，咁我飲番，唉。」昂救濟把杯中牛奶一灌入喉：「連貓咪都唔鐘意我……」


不到兩秒。


「嗚…嗚嗚嗚！！」昂救濟一副想噴出來的模樣，手舞足蹈的十分趣怪：「仲……仲係好…好撚…熱啊！！」


他又把牛奶吐到杯子裡，第二次了。


他直接把這杯牛奶當作漱口水算吧，不能再飲用了。