《小松奇妙物語！》: 09

不久，警方到場。


他們先是拘捕兩名傷人的男子，沿途不少圍觀者，皆議論紛紛。


現場有救護員為美香處理傷口，當警員詢問她要否到醫院就醫時，美香急忙地搖頭。


「做咩唔去醫院？」小松慰問。






「少少事啫⋯」


大概，美香是想避嫌身份被揭穿的可能。


「班高斯樂迷真係⋯⋯」說罷，小松望見圍觀者中，幾對兇惡的眼神正瞪住她。






「氣氛唔太對路，似乎唔講嘢比較好。」我提醒。


「喂，西裝大叔，再係咁好危險喎。」小松走向剛落完口供的他：「你係工作人員，有冇改善方法啊，發生咁大件事。」


「只可以算你朋友唔好彩⋯⋯」






「咁都得！？」


「有啲嘢⋯⋯」西裝大叔嘆氣，沉靜半晌：「唔知道真相比較好。」


「咩話，交代都冇過？道歉呢？慰問呢？」這方面，可以看出小松性子很急。


「你好好哋一個細路女，咁正義做乜鬼！有啲嘢，唔係你想知，就可以知。」西裝大叔拍拍她的肩，說：「乖乖返屋企訓覺，當今日乜事都冇發生過吧。」


「真相啊嘛？」小松抱住雙手，語氣沉緩：「你同我老豆一樣，都成日同我講，永遠唔好去追求真相，但你哋偏偏勾起咗我內心嘅好奇。」






「唉，我理得你啊！總言之，到你出事唔好叫救命。我只係呢間公司嘅中層管理人員，但我可以同你講，嚟到報壞新聞嘅記者，都冇好下場。」西裝大叔作出警告，就徐徐離去。


「小松，原來你都幾夠pop。」我說。


「傷我朋友喎依家。」小松望往美香。


「你諗住點做？寫封投訴信，佢去哋公司？諗住用英文定中文⋯⋯」我提出建議方案：「英文睇落好似比較專業。」


「我要拆佢公司。」






「嗯？玩到咁大，你睇落咁瘦，鐵鎚都拎唔起。」


「哼，我自然有方法。」


離開前，小松強烈要求美香到醫院查看情況，一番唇舌才迫使她同意。


如中階管理階層大叔言，商場外面沒有出現記者，圍觀者亦安份守已，沒有拍攝任何照片，這正常的氣氛，正常得詭異。


「咁奇怪‧‧‧‧‧‧」小松在門外疑懷起來：「正常香港人見到發生呢啲事，一早拎哂手機影相俾三姑六婆睇。」






「或者，呢到有黑勢力睇住～」我把視線，移向對面的街燈下。


那裡，正站住三個惡漢，盯住從商場出來的觀眾。


「咁呢間商場，關黑勢力咩事？」小松也回盯那三名惡漢。


「話唔定，呢間專門經營地下偶像嘅公司，背後係一個黑社會看管住。」我淡淡地說：「黑社會，最鐘意用娛樂產業去賺錢。」


「哇！小葵你咁聰明嘅？！」小松訝異地，望住膊上的我。






「推測，只係推測～」我說下去：「所謂真相，又邊會咁簡單。」


「搞掂呢間公司之前，我哋要趕得切返屋企先。」小松單手將我按穩在膊頭，說：「捉實喇你。」


「！！？」


說也不說，小松就忽然飛步奔跑，從旺角街道趕往小巴站。


其輕盈的步伐、飄逸的散髮，都展示出青春少艾的唯美。而我卻被迎來的風，吹得貓容扭曲，要死死捉住小松的膊才不致掉下，十分狼狽。


「呼，啱啱好。」跑到小巴站後，小松直接上車。


她撥撥掩住眼睛的秀髮，並選了個單人位而坐。


「頭先聽你講起父親，你語氣好似……有啲不悅。」我有點在意。


小松沉默一陣，說：「擺明不悅啦，吓嘛。」


「轟──」小巴開啟。


「講起上嚟，自從你將我帶返屋醫治嗰次，我都冇點見過你父親。」印象中的小松父親，只記得他是個戴眼鏡的中年知性男士。


「佢好多嘢做嫁～成日唔返屋企。」小松有些怨言，重複多次：「……成日唔返。」


「佢好似，係做獸醫？」


「係…但邊有人，連老婆都唔見咗，都唔會即刻返屋企？！」


「關於你母親嘅事……」我早有聽聞。


「好耐之前，就失蹤咗。」小松把我放到腿上，邊輕撫邊俯視：「所以，我算係同你一樣？都係…失去咗親愛嘅可憐人。」


「但你似乎，已經接受咗。」


「我又可以做到啲乜？我屋企每個人，對好似對媽咪嘅下落完全唔上心咁。」小松拉開車窗，沉默良久：「我都心死咗。」


「你唔再搵佢？」


「當你知道，得番你自己一個追尋佢喺世上存在嘅證明，到你攰……連身邊嘅人都阻止你、質疑你、欺騙你，你就會想停低，好好接受佢離開嘅事實。」小松掩住泛潮的眼框，搖頭：「因為…因為真係，已經冇任何辦法。」


是的，雖然表面看上去，小松像個幸福的寵兒。


每天有很多動物陪伴，也有環境舒適的地方居住。


可實際上，那空蕩蕩的屋中，只有這些能離補沒有雙親陪伴的苦澀。


「要搵番一個人，真係好難啊可？」小松反問我一句。


我想了想，答：「要搵，都總會搵到。」


片刻間，我倆繫住彼此的無形紅線，又再莫名其妙地出現。


雖然不知道是什麼，但就像某種命運的相連。


也許……



我與她的相遇並不是偶然，而是命運必然的選擇。