《日頭嘅我係個學生，夜晚嘅我就係個降魔師》: 《死靈術士篇》第二章 Ep.12

「點呀？依加有咩發現呀？」歐陽sir一邊衝過黎一邊講。
 
「你地黎啦？我地搵到張地圖，既然依加齊人咁就出發啦。」Ivan帶住我地去地圖上標記嘅地點。
 
我地係行動嘅途中向歐陽sir解釋事件嘅來龍去脈。
「阿洛，唔係你嘅錯黎架，無人想發生呢件事，唔好怪自己啦。」歐陽sir了解完事件之後同講。
 
「我無野架啦，依加最重要係搵番個死靈術士出黎阻止佢繼續計劃。」我抬起頭同歐陽sir講。
 
我地話咁快就黎到我地嘅目的地。




 
「同上次一樣，呢度有好多好亂好雜嘅邪氣，睇黎我地無估錯。」Ivan講。
 
「你地行後少少，呢度交比我。」歐陽sir一馬當先。
 
「又係百鬼夜行呀？咁姐係上次果隻都係個死靈術士整出黎架啦。」海澄指住百鬼夜行講。
 
「等我黎啦，係咪好似上次咁呀？」阿詠將佢塊八咫鏡拎出黎。
 
「收番埋佢啦，我要捉到個死靈術士。」歐陽sir一講完就衝左出去。




 
「歐陽sir!」我睇到都覺得擔心。
 
「唔洗擔心歐陽sir架啦，佢一個勁過我地咁多個夾埋呀。」Ivan搭住我膊頭。
 
歐陽sir拎左把大鐮刀出黎，輕輕一躍就已經跳到上半空，同百鬼夜行平排嘅水平。
 
「好啦，你係咪係呢度呀？」歐陽sir把鐮刀一揮，百鬼夜行嘅身軀轉眼間就已經比歐陽sir砍開幾份。
 
「好快...好強嘅力量...我根本就睇都睇唔切...」見識到歐陽sir嘅功力，令到我當堂目定口呆。




 
「個死靈術士一定係附近！搵佢出黎！」歐陽sir指示我地。
 
於是我地分成兩組人，我同海澄，阿詠同Ivan，分別就去搵死靈術士嘅下落。
 
「海澄，你有無辦法可以搵佢出黎呀？」我問海澄。
 
「我無呀，唯有周圍行慢慢搵啦。」
 
既然我地無D快速嘅方法就只係可以逐條街咁行。
 
「Ivan佢就好啦，有得用樹精幫手，如果我地都有咁就好啦。」啱啱開始無幾耐我就已經唔想再搵。
 
「唔好咁啦阿洛，我地唔係要幫Anson報仇架咩？」海澄拉住我行。
 




「係，講係咁講，但就算比我地搵到佢，我地又夠唔夠佢打呀？」我停低腳步。
 
「我地有歐陽sir呀嘛，佢咁勁一定夠打嘅。」海澄向住我踏前兩步。
 
「如果真係比我地搵到個死靈術士，你覺得我地比人殺左先，定係我地同歐陽sir講先呀？」我問海澄，希望海澄可以好好諗下依加嘅情況。
 
「阿洛，你後面呀！」海澄急速向後退再拉開我。
 
「咩事呀，咩黎架？」我被海澄突如其來嘅行動嚇親。
「點解...會係你嘅？」我另轉頭一望，見到Anson向住我呢邊行緊過黎。
 
「你點呀？你有冇事呀？對唔住呀，你唔好怪我啦。」一見番Anson我就慢慢咁行過去佢身邊。
 
「阿洛！唔好呀！佢唔係Anson黎架！」海澄對住我大叫。
 




「收聲呀！Anson佢番左黎啦，佢番黎搵我架！」我對住海澄喝佢。
 
「阿洛，你唔好咁啦...」海澄面對住呢個情況完全唔知點好，佢成個人跪左係地下度。
 
海澄好清楚我地眼前嘅只係Anson嘅肉體，只係個扯線公仔，Anson嘅靈魂已經唔再係度。
 
「Anson…」我見Anosn向住我嘅方向遞高雙手，我都向住佢遞高手諗住同佢擁抱。
 
Anson對手隨即同身體分開，向住海澄果邊飛過去。
 
「啊...」Anson對手捉實左海澄條頸。
 
「海澄！」我向住海澄果邊想跑過去救佢。
 
「你係咪又要掉低我一個呀？」Anson出聲。




 
「我...我...唔係呀...我...」Anson咁樣一講我就停左係度。
 
「咁你唔好過去啦，留係我身邊好唔好呀？」Anson講。
 
「我...」我未開始講就已經比Anson捉住。
 
「過黎啦！」Anson對腳飛左出黎，將我按住係地下上面。
 
「Anson…點解呀。」我勉強都出都聲。
 
「Anson死左啦，傻仔。」Anson個頭飛落黎望住我講。
「你再試多次啦，睇住身邊嘅人死而又救唔到佢。」
 
「你咁樣做有咩意思呀！」我係地上面叫。




 
「呢個係你阻撓我地嘅懲罰。」Anson講。
 
「究竟你地有咩計劃呀？」我睜大隻眼問。
 
「你唔需要知，你淨係需要知你個朋友就黎死就得啦。」Anson繼續用果把無靈魂嘅聲講。
 
「無咁易！」歐陽sir從天而降，一揮刀砍斷左Anson對手。
 
「咩話...點解你會...」Anson一見到歐陽sir就即刻好驚。
 
歐陽sir再次舉起鐮刀，將壓住我嘅腳都砍斷。
「好啦，阿洛，佢係你朋友嘅身體，應該由你黎了結佢。」歐陽sir同我講。
 
「我明白啦...」我拎起斷劍，將血滴落劍上面，熊熊烈火不斷湧出。
 
「Anson,安息啦。」我用火焰將Anson嘅身體燒成灰燼。
 
「你殺左我都無用，主人已經走甩左啦。」Anson嘅身體係變成灰之後用最後嘅時間講。
 
「竟然係聲東擊西，引開我地？可惡呀，今次都捉住唔到。原來個死靈術士睇穿曬我地嘅行動。」我好唔服氣咁講。
 
「唔緊要啦，咪下次再捉過佢囉，最重要係你兩個都無事。」歐陽sir扶起海澄。
 
「係...我下次一定會捉住佢架！」我向歐陽sir保證。
 
「呢D下次再講啦，我地番去先啦，阿洛你都休息下啦，你身心都好攰架啦，再係咁落去你會頭過唔住架。」歐陽sir帶住我同海澄番去隱世cafe休息。
 
「咁Ivan同阿詠呢？佢兩個去左邊呀？」我依加先醒起佢兩個應該去左另一邊搵死靈術士。
 
「佢兩個我比左其他野佢地做呀，係唔洗擔心佢地啦，放心休息啦阿洛。」歐陽sir安置左我同海澄係隱世cafe入面休息之後就離開左。
 
「海澄...有冇方法可以加強我嘅靈力呀？我都想可以好似歐陽sir咁勁呀。」我問海澄。
 
「依加嘅你啱啱先得到靈力咋，好似歐陽sir咁勁起碼學番三五七年先啦。」海澄挨住我膊頭講。
 
「咁我點先可以變強呀？你教我呀。」我真係好渴望可以變得更強，有能力去保護對自己重要嘅人。
 
「呢樣我真係答你唔到wor…不如你問歐陽sir佢地呀，其實我都唔係識咁多，同左佢地一齊行動之後我先知道原來呢個世界係咁大。」海澄講。
 
「咁海澄你知唔知咩係死神呀，之後我聽Ivan講我係死神，姐係咩意思呀？」我突然間諗番起Ivan講嘅野。
 
「其實死神係講緊修羅，而唔係你。」海澄望住我講。
 
「咁佢地又話我係死神嘅？」我理解唔到佢地講嘅野。
 
「咁係因為修羅嘅靈魂就係你身體入面。」海澄向我解釋。
 
「修羅係我身體入面？咁姐係點呀？」我再問海澄。
 
「到遲D你就明架啦，唔講住啦，我攰啦，想訓一陣。」海澄講完之後就挨住係我嘅膊頭度訓著左。
 
「乜你兩個訓到成隻死豬咁架，我地就係出面咁辛苦！」我同海澄都比人嘈醒左。
 
「你地番黎啦？頭先你地去左邊呀？」海澄問大家。
 
「我地去左追死靈術士，我地查到佢嘅計劃係咩啦。」Ivan講。
 
「唉你地慢慢講啦，我番去訓先啦，拜拜。」歐陽sir講完就開門走左，好似比人抽乾曬能量咁樣。
 
「咁死靈術士嘅計劃係咩呀？佢究竟想點呀？」我好激動咁問，因為我好想知道點解佢要殺死Anson。
 
「佢想整鬼王。」阿詠插嘴。
 
「鬼王？咩係鬼王呀？」我同海澄都唔明白。
 
「你地有冇聽過練蠱呀？姐係將一堆毒蟲放埋一齊，死淨果隻就係最勁嘅蟲。」Ivan問。
 
「我知呀，係巫術所用嘅蠱毒。」海澄答。
 
「無錯，鬼王都係差唔多道理，死靈術士將一堆邪靈放埋一齊，想練出最強嘅邪靈。而我地所見到嘅百鬼夜行，就係死靈術士練鬼王嘅步驟。」Ivan繼續解釋。
 
「咁...咁點解佢要殺Anson呀？」我又再一次諗番起Anson比死靈術士殺死嘅場面。
 
「我地唔知...可能係覺得我地阻礙左佢...」Ivan估。
 
「我唔會放過佢架...佢殺死我嘅好朋友，我要親手了結番佢！」我越講越激動，一諗起Anson嘅死我就想即刻衝出去報仇。
 
「阿洛你冷靜D先啦。」海澄捉住我隻手再講：「你咁樣出去都無用架，你搵到佢咩？比你搵到佢你又夠佢打咩？」
 
我dup低頭無出到聲，因為我自己都心知答案係點樣。
 
「Ivan,我要變強，你可唔可以教我呀？」我抬起頭望住Ivan。
 
「好，我可以教你，但你要應承我，一定要同我地一齊行動，得唔得。」Ivan表示願意教我。
 
「我都可以幫手嘅，如果有地方我幫得上嘅話。」阿詠都願意幫我變強。
 
「阿洛，你要加油呀，要變得更強先可以幫Anson報仇架。」海澄都鼓勵我。
 
「好啦，我明白啦，我唔會令你地失望架！」我好有信心，為左Anson，我一定會成長。
於是我，Ivan，阿詠，同海澄四個人就展開特訓。
 
「阿洛，首先你要了解多D自己嘅靈力先。」Ivan開始同我講解。
 
「我嘅靈力？咪修羅之火囉，滴血落劍就有火噴出黎啦。」我拎住把劍同Ivan講。
 
「你嘅劍只係一個媒介，你嘅血入面有靈力，斷劍只係將你血入面嘅靈力釋放出黎。」Ivan指住我把劍講。
 
「咁咪係囉，我就係用佢黎砍妖除魔架嘛。」我回應。
 
「阿洛，你咁諗就錯啦，你嘅劍只係限制左你嘅能力。」Ivan開始分析我嘅靈力。
「當劍上面D血嘅靈力用盡之時，劍上嘅修羅之火都會隨之而熄滅。」
 
「係呀係呀，成日用用下D火都會自己熄左架，我又要滴多次血先用得番架。」我非常認同Ivan所講嘅野。
 
「無錯，如果係危急關頭嘅時候，你就會因為咁而死。」Ivan好認真咁講。
 
「咁我唔用把劍，我可以點用我嘅靈力呀？」我問。
 
「無錯，呢樣就係你要學嘅野，唔使用劍都可以釋放靈力。」阿詠都開始講解。
 
「吓？唔係要有法器先用到靈力架咩？」聽到佢地咁講我先知唔知法器都可以用到靈力。
 
「係呀，你有冇睇過歐陽sir把鐮刀呀？就係用靈力整出黎架啦。」阿詠答我。
 
「唔怪之得啦，我仲係度諗緊歐陽sir係邊度拎把鐮刀出黎呀。」海澄答嘴。
 
「一般人都會覺得法器係用黎釋放靈力嘅道具，但實情係啱啱調番轉，真正嘅法器係釋放靈力而形成嘅武器。」Ivan將靈力集中係手上面，然後靈力凝聚成為一支筆。
「就好似咁樣，呢樣就係我嘅法器啦。」
 
「咁我阿爺又比把斷劍比我嘅？」我再次舉起斷劍。
 
「你呀爺係想用呢把劍令你可以好好咁諗清楚。」海澄講。
 
「吓？姐係點呀？」我聽唔明海澄所講嘅野。
 
「你每一次用把劍嘅時候，都要用自己嘅血。佢一定係希望你諗清楚先出手。」海澄同我解釋番。
 
「唔止咁，把劍有好強嘅力量，一定唔止咁簡單。」Ivan講。
 
「把劍之後先算啦，依加要令阿洛你唔洗用劍先係最重要。」阿詠係我手上面拎走左把劍。
 
「好啦，我地開始啦，阿洛、海澄。」Ivan指示我地。
「首先你要感受一下自己身體入面嘅靈力流動。」
 
「吓？咁抽象，姐係點呀？」我聽唔明Ivan所講嘅野。
 
「阿洛呀，你當係感受一下自己嘅血係身體入面流動啦。」海澄解釋。
 
「咁我試下先啦。」我擺定個架式，開始「感受」靈力。
 
過左幾分鐘之後，我開始feel到身體入面好似真係有一股能量係度流動。我諗呢D就係Ivan所講嘅「感受靈力」。
 
「Ivan,我feel到啦，下一步要點樣呀？」我hold住個架式問Ivan。
 
「跟住你就試下將靈力凝聚係手上面，如果你成功嘅話，咁就可以釋放你真正嘅法器啦。但係呢一步唔會好似頭先咁易架，你地慢慢試下啦。」Ivan指導我地。
 
「我地晏D番黎搵你地啦，睇黎你地都有排試架啦。」阿詠一邊笑我地一邊講。