《日頭嘅我係個學生，夜晚嘅我就係個降魔師》: 《死靈術士篇》第三章Ep.(13
無錯，就咁聽落去好似好容易咁，但我只係feel到D靈力係我個身入面走黎走去咁，根本就捉唔住。
此刻我終於都明白咩係講就易，做就無能為力。
「海澄，你feel唔feel到點做呀？」我問。
海澄佢非常專注咁去觸摸果種感覺，所以無留意到我同佢講野。見到海澄咁專心，我都費事騷擾佢，我就無再繼續同佢講落去。
雖然我好努力咁嘗試將靈力凝聚嘅感覺，但我同海澄兩個人一齊試多差唔多兩個鐘都仲係未有任何結果。
「海澄，依加時間都好夜啦，不如我地番去先啦，聽日先繼續練好無呀？」我拍一拍海澄問佢。
「好啦，我都覺得攰啦。」海澄終於都肯停落黎。
我同海澄兩個人並肩行出隱世cafe，慢慢咁行番屋企。
好耐都無試過同海澄兩個人一齊咁輕鬆咁行啦。
「海澄，我送你番去呀。」我對住海澄好順口咁就講左出黎，但講完先至覺得唔好意思。
其實我咁大個都未試過單獨同女仔係街上面一齊行，當然我都未試過送女仔番屋企。
但海澄好似覺得無乜野，佢同番我講：「好呀，咁夜我自己一個番去都有D唔放心呀，辛苦你啦。」
「唔辛苦，我地住係附近咋嘛。」我估唔到海澄唔介意我送佢番去。
明明啱啱識海澄嘅時候我都試過同海澄兩個人單獨咁樣行，果陣對住海澄嘅時候我一D事都無，但我依加個心跳得越黎越快，同時又好介意海澄會點樣諗我⋯⋯
唔通我係中意左海澄⋯⋯唔會嘅，一定係我諗多左姐。
我不斷咁同自己講：無野嘅、無野嘅、無野嘅⋯⋯
我一望到海澄就淨係覺得海澄佢好可愛⋯⋯
「阿洛，你做咩呀？」海澄打斷左我內心嘅思慮。
「無呀，我無野呀，我會有咩野姐？哈哈哈，海澄你睇下我幾精神，我點會有事呀？」我嘗試掩飾我心裡面嘅不安，我真係好驚比海澄知道左我心入面所諗嘅野。
「阿洛，我知啦。」聽到海澄咁講我後尾枕忽然有一股涼意，唔通已經比佢發現左？
「Err，唔係你諗咁架⋯⋯我⋯⋯」我不斷諗藉口想同海澄解釋，但我呢一刻真係啞口無言。
海澄慢慢咁伸個頭過黎靠近我，再將隻手放係我額頭上面講：「阿洛你唔舒服呀嘛，你睇下你塊面幾紅呀，摸落去又咁熱wor。」
緊係熱啦大佬，海澄靠到咁近，我個心完全係光速咁跳，成個人都覺得越黎越熱。
我差D就自己爆響口比海澄知道我嘅心意，好彩原來海澄只係覺得我唔舒服。
「係呀，呢幾日發生左好多事，我可能攰得滯所以有D唔舒服。」既然海澄誤會左我係唔舒服，咁我就將計就計用唔舒服黎蒙混過關。
依加嘅我真係feel到好強烈嘅暖流係我身體入面流動，我已經分唔到係對住海澄嘅緊張定係靈力嘅流動。呢一種感覺真係比頭先所感受嘅強烈好幾倍，話唔定我依加可能會釋放到靈力去召喚靈裝。
就係我小鹿亂撞嘅時候，前面突然之間有野衝緊埋黎，但係我反應到嘅時候就已經太遲。佢係一隻拎住武士刀嘅鬼，額頭上面有一道符貼住。只係一𣊬間佢已經衝到黎我同海澄面前，出手極快，突進、再拔刀只係𣊬息之間所發生嘅事。係我反應到嘅時候佢已經準備揮刀。
「走呀！海澄！」除左大聲咁講出呢四個字之外，我已經無其他野可以做到...
係呢一個非常時刻，我不自覺咁樣合埋左雙眼，因為我所面對嘅野實在太過衝擊嘅關係，隔左幾秒之後我先至有番意識。我慢慢咁打開雙眼，我拎住一把劍擋住眼前嘅鬼武士。
劍上面刻住一D我睇唔明嘅符文，唔通呢一把劍就係我嘅靈裝？
「海澄，你走先啦，由我黎對付佢。」我放開海澄隻手，轉身獨自一人面對鬼武士。
「阿洛⋯⋯你得唔得架⋯⋯你唔好死呀⋯⋯」海澄慢慢一步一步咁倒後，依加嘅海澄完全係一個不知所措嘅狀態。
「你走先啦，海澄。我一定唔會死係度架！」我重新擺好架式，準備同鬼武士決一死戰。
正當我想揮劍嘅時候，我聲到心入面有一把聲同我講野：「阿洛，你咁樣唔得架，要夠狠先可以打敗佢。」然後我個身體就自己開始陏，唔受我嘅控制。
「咩事呀，點解會咁架？」我自己同自己講。
「我就係你身體入面嘅修羅，等我幫你對付佢啦。」我踏後一步，避開左鬼武士嘅砍擊。
然後向前一個弓步再向住鬼武士嘅腰部一劍捅落去。
「得左啦！」我好興奮咁叫出黎，但似乎我開心得太早，只係捅中左一下對鬼武士應該做唔到咩傷害。
因為頭先我向住鬼武士捅埋去，所以我同佢之間嘅距離非常之接近。鬼武士趁住呢個機會舉高雙手，將武士刀指向地下，打算一刀插死我。我諗住抆劍同佢拉開距離，但因為打劍插得太深嘅關係，我並無辦法再劍由鬼武士嘅身入面抆番出黎。
「修羅！點算呀？」我係心中默念。
然後我嘅身體又再一次不由自主咁行動。我放開左把劍再向側邊一閃，再一次避開鬼武士嘅攻擊。雖然成功避開左，但係我就無左把劍，把劍依然插住係鬼武士嘅身上。
「唔洗怕，阿洛，睇住啦。」我向住把劍啪左一下手指，把劍就即刻化為火焰，將四周圍嘅一切都焚毀，而鬼武士嘅身體亦都比火焰燒得一乾二淨。
「係咪完左啦⋯⋯」我面對住眼前嘅景像都嚇到呆左咁企左係度。
我已經再聽唔到修羅把聲，修羅⋯⋯我有好多野想知，好多野想問你⋯⋯
「阿洛⋯⋯」我一聽就知係海澄把聲。
「海澄？我叫你走先架⋯⋯點解你⋯⋯」我轉身向住海澄行過去。
「阿洛，你咁勁，我知道你可以保護到我架。」海澄講。
「唔係⋯⋯勁嘅唔係我，係修羅，係佢控制我嘅身體打敗⋯⋯」我忽然之間覺得全身都無曬力，成個人都覺得好攰，差D就直接跌落地下，好彩海澄係我嘅身邊，我挨左係佢嘅身上。
「阿洛！阿洛！你做咩呀？你唔好嚇我呀！」海澄一邊講一邊拍我。
「我⋯⋯我攰啦。」講完之後我就合埋左眼。
我打番開對眼果陣見到好熟悉嘅天花板，我成個人彈起身，我發現原來自己係訓左係屋企張床上面。我諗番起頭先嘅事，因為修羅嘅力量實在太過強，同鬼武士打完之後因為用得太多能量所以身體支持唔住而暈低左。
海澄呢？佢去左邊呀，係唔係海澄送我番屋企架？我睇下隻錶，原來已經到左第二日嘅十點幾，亦姐係話我已經遲到左三粒鐘。屌啦，雖然心入面仲有好多嘅疑問，但係我都要趕番學校。於是我即刻衝出屋企狗衝番學校。
我衝到番去嘅時候啱啱好趕得切上歐陽Sir嘅堂，我見到海澄趴左係枱上面訓教，平時海澄係絕對唔會係上堂果陣訓教，咁睇黎佢真係好攰啦。
落堂之後，歐陽Sir行左埋黎我身邊同我講：「阿洛，你無咩事呀嘛？你同海澄都好似好攰咁wor。係咪琴日發生左D咩事呀？」
我慢慢咁抬起頭望住歐陽sir，之後就我同歐陽sir講番琴日所發生嘅事。
歐陽sir聽完之後神色好凝重咁講：「咁睇黎死靈術士真係諗住對付我地，我地都要盡快鏟除佢⋯⋯如果唔係之後就會好麻煩。」歐陽sir講完之後就好無精神咁行出房室門口。
「歐陽sir！」我彈起身衝出課室追上歐陽sir嘅步伐。
「阿洛？做咩呀？」歐陽sir另轉身問我。
「err⋯⋯無咩野嘅，我想問下偉豪佢點樣呀？果日之後就無再見過佢啦wor。」我問。
「哦，偉豪佢退左學啦，我都唔知佢依加點樣啦⋯⋯」歐陽sir一邊R頭一邊講。
「係呀⋯⋯咁無野啦。」
自從Anson死左之後，阿峰就一直都無曬精神咁。睇黎Anson嘅離去對於阿峰有好大嘅影響。
我行過去阿峰嘅身邊，搭住阿峰嘅膊頭。
「阿洛⋯⋯係咪我地累死Anson架⋯⋯」阿峰平時講野非常之有中氣，但依加嘅阿峰講野就好似無氣咁樣。
「唔好咁啦⋯⋯阿峰。」我都唔知可以講D咩去安慰佢。
講真，Anson嘅死我都有責任，我連自己嘅好朋友就保護唔到...
今日我同阿峰雖然兩個人一齊食飯，但我地一句野都無講過。因為唔需要講出聲，我地都知對方諗緊咩，我地大家都要時間將Anson嘅事沉澱一下。
放學之後我同海澄去左雜物房果度搵埋阿詠同Ivan一齊商量對付死靈術士嘅對策。
「你兩個咁耐架，我地等左好耐啦。」阿詠腳unun咁係度講。
「你地唔好聽佢講呀，其實我地都係啱啱到架咋。你地坐低先啦。」Ivan笑笑口咁同我地講。
「Ivan，咁我地依加有D咩計劃呀？」我同海澄一齊擺好書包。
「我地依加已經識穿左死靈術士嘅陰謀，如果我地唔阻止佢，而佢又成功練到鬼王嘅話，唔單止我地實死無生，佢放鬼王出去嘅會有好多人死⋯⋯」Ivan好沉重咁講。
「咁我地可以點樣阻止佢呀？」海澄問。
「我地已經搵到死靈術士係邊啦。」阿詠拎左幅地圖出黎。
「點解你地會搵到嘅？」明明我地之前一直都搵唔到死靈術士係邊，我唔明點解佢地會搵到。
「咪又係靠我嘅幫手囉，有D妖怪係可以幫我地搵到邊度有邪靈，我地搵到一個地方有好多邪靈聚集，所以我估佢應該係果度召喚百鬼夜行。而且今次有好多邪靈嘅反應，我諗果度應該係佢嘅基地。」Ivan解釋。
「咁仲等咩呀？出發啦！我地去死靈術士嘅基地討伐佢啦！」歐陽sir打開雜物房嘅門對住大家講。
「歐陽sir你同我地一齊去呀？」Ivan完全無諗過會見到歐陽sir。
「無錯，如果淨係得你地幾個嘅話一定唔夠打，話唔定大家都會比個死靈術士殺死。」歐陽Sir回應Ivan。
「歐陽Sir咁好打，咁我地一定贏啦，洗乜怕佢呀？」一知道歐陽Sir會幫我地手我成個人都放心曬。
阿詠聽到我咁講就行去我側邊打左我一拳：「唔好咁老定，果度話曬都係人地基地，有好多野你都估唔到架。我唔想你累死大家。」
阿詠呢一拳都出得幾重，過左一陣之後我都仲覺得個肚赤赤痛。我同番阿詠講：「知啦，我會睇住架啦。」
阿詠無答我，只係拎野轉身就出左去。
「阿洛你無事呀嘛？」海澄行埋我行邊問候我。
「我無事，行啦。」我拉住海澄跟上番大家嘅腳步。
我地一行人只有五個人，歐陽sir,Ivan，阿詠，海澄同埋我。而敵人嘅數量、強弱根本無從得知，所以我地今次嘅行動可以話係非常冒險。
「阿洛呀，知唔知點解阿詠會咁緊張叫你唔好輕敵呀？」Ivan放慢腳步行埋我同海澄身邊。
「之前係咪發生過咩事呀？」海澄問Ivan。
「你講得無錯，之前我地有次行動嘅時候，有一個同伴佢因爲輕視敵人嘅能力而死左。」Ivan一邊點頭一邊講。
「唔怪得阿詠會咁樣啦....」我諗番起頭先所講嘅野。
「所以你地唔好擺係心入面啦，阿詠都係緊張你地唔想你地有咩事姐。」Ivan拍一拍我膊頭。
「喂，你地行快D啦。」歐陽sir另轉身對住我地大叫。
「得啦，我地會追上黎架啦。」我回應番歐陽sir。
「我地差唔多到啦，你地準備好未呀？」Ivan問。
「我地準備好啦！」我同海澄一齊答。
我地黎到一座廢棄工廠，呢度就係死靈術士嘅基地。
未入去都已經感覺到入面有好強嘅邪氣，淨係企係門口就已經成身都好唔舒服。
「好啦，我地入去啦！」歐陽sir一聲令下，我地就開始向死靈術士嘅基地進攻。