《日頭嘅我係個學生，夜晚嘅我就係個降魔師》: 《死靈術士篇》第一章 Ep.11
「Anson!」我彈起身大叫。
「阿洛，你醒啦？你無事呀嘛？」我聽到海澄把聲。
我再望下四周圍嘅環境，發現我訓左係接委托嘅隱世cafe入面。
「海澄？點解我會係度嘅？Anson呢？Anson佢點呀？」我好肉緊咁捉佢海澄膊頭問佢。
「阿峰話比我地知你係舊校舍果邊比鬼捉住左，我地去到嘅時候就淨係見到你訓左係地下，乜Anson都係果度咩？」海澄向我解釋。
「Anson...Anson佢比副白骨殺死左...」我諗番起頭先嘅場面真係極度自責，淚如泉湧...
「阿洛，你冷靜D先...果度點解會有副白骨嘅？係咩黎架？」海澄嘗試安撫我嘅情緒。
「副白骨話自己係死靈術士，又話我地擾亂左佢嘅計劃。」我不斷咁叫自己冷靜，慢慢諗番起頭先所發生嘅事。
「死靈術士？咁就大獲啦...」突然之間傳黎一把男仔聲，我望一望，原來講野果個係Ivan，而阿詠就企左係Ivan身邊。
「點解大家都係度嘅？」我訓係度問。
「係海澄叫埋我地黎嘅，萬一發生咩事都會安心D。」阿詠講。
「咁點解Ivan你一聽到死靈術士就話咁大獲呀？」我又再問。
「係囉，其實我都唔太清楚係咩黎。」連海澄都無聽過死靈術士。
「其實死靈術士就即係有能力操縱死者，簡單D講，如果Anson真係比佢殺左嘅話，咁Anson就會成為佢嘅士兵，就好似捉住你嘅果兩隻鬼咁。」Ivan解釋。
「咁係咪即係話我仲有機會見番Anson呀？」我嘅身體都開始恢復，我坐左起身。
「嗯......但你唔會想見到佢...」Ivan dup低頭，另埋一邊講。
「點解呀？佢係我嘅好朋友黎架！我想見番佢呀！」一諗到有機會再次見番Anson我就好激動。
「人死左之後，靈魂同肉體會分開，比死靈術士操縱嘅Anson…只係一個無靈魂嘅軀體，同扯線公仔根本無分別...」阿詠見Ivan講唔出口，於是就幫佢講呢番話。
「扯...扯線公仔...咁我有無辦法可以救番佢...」我心入面好清楚，係我累死Anson，我好想可以盡力去救番佢。
「無辦法...一旦比死靈術士操控住，肉身就會永遠咁跟隨施術者，直至肉體被毀滅或者施術者比人殺。」Ivan搖搖頭咁講。
「咁就等我去做啦，Anson嘅死係我一手造成，所以好應該由我黎執手尾。」我起身諗住去搵番個死靈術士。
「你諗住去邊呀，阿洛。」Ivan阻止左我。
「我要去令Anson解脫同埋幫佢報仇！」我推開Ivan隻手。
「可唔可以唔好依加去呀？」海澄捉住左我隻手。
我慢慢另轉身，面對海澄。
「你唔好去啦...如果今次連你都死埋咁點算呀！」海澄眼角泛起淚光咁望住我。
「海澄...」睇黎海澄真係好擔心我，而佢都講得無錯，我地依加應該做好準備先，而唔係無腦就咁一味靠衝。
「好啦，咁依加嘅plan係點樣呀？」Ivan問我地。
「我諗住幫Anson報仇，令佢可以好好安息...我記得啦！個死靈術士仲話我地打亂左佢嘅計劃，我覺得一定唔係D咩好野，我想要查清楚。」我同大家講。
「計劃？佢會有咩計劃呀？」睇黎阿詠都想幫手。
「我都唔知，我唯一知道嘅就係佢有個計劃，而我地就打斷左佢嘅計劃。」講真我同大家一樣真係乜都唔知。
「咁我地一於就著手調查一下死靈術士先，我地去舊校舍果邊搵下，睇下有冇咩線索咁啦。」Ivan提議。
「好，一於咁話。」我第一個讚成Ivan。
「我地都無問題。」阿詠，海澄都決定跟隨Ivan。
「咁我地不如同歐陽sir講呀？話唔定佢會幫到我地架。」我突然間靈機一觸。
「嗯，阿洛你都講得啱，咁阿詠你幫我去通知歐陽sir，阿洛同海澄就跟我去舊校舍啦。」Ivan發號施令。
於是我地一行人就係Ivan嘅帶領之下開始調查死靈術士事件。
我地番到去Anson遇害嘅地方，Ivan就問我：「阿洛你地果陣時除左個死靈術士同埋佢兩個手下之外仲有冇見到其他野呀？」
「無呀，我見到嘅野都話曬比你地知啦。」我好努力咁記番起當時嘅情況，但都係無咩發現。
「我諗個死靈術士嘅據點本來係舊校舍，而比你地發現左之後佢一定會轉據點，我地睇下附近有咩線索先啦。」Ivan係符上面畫左幾筆，再將幾道符拋落地下，D符就變成一隻一隻嘅小樹精。
「靠你地幫手周圍睇下啦。」Ivan對住班小樹精講。
「知道！知道！」班小樹精分散走開去唔同嘅樓層搵線索。
「頭先果D係咩黎架？」海澄問Ivan。
「哦，頭先果D係小樹精黎架，佢地好聽話，細細粒行動迅速，搵佢地做探子就最適合啦。」Ivan將符同筆收番好。
「咁我地都周圍睇下先，十五分鐘之後係番呢度等啦。」我同海澄一齊行，而Ivan就自己去左另一邊。
「阿洛...Anson嘅事你唔好咁自責啦...」海澄行到一半捉住我衫袖停低同我講。
「海澄，如果我實力再強D就唔會咁，如果我無猶豫，直接殺左隻鬼，咁Anson就唔會死。」我雖然仲未接受到Anson嘅死，但我嘅心境就非常之平靜。
「偉豪講得啱，鬼係唔應該放過。如果我好似偉豪咁，Anson可能就唔洗死。」呢一刻我突然諗起果陣時偉豪同我講嘅野。
「阿洛，所有野都話唔埋架，鬼嘅好壞唔係絕對架。」海澄講。
「算啦，已經唔重要啦，依加最重要係搵番個死靈術士同埋破壞佢嘅計劃。」我同海澄繼續向前行。
「咁阿洛你知唔知佢嘅計劃係乜野呀？」海澄問。
「我都唔知...不過我肯定唔會係好野。」對於佢嘅計劃我的確係一無所知。
「阿洛！呢個課室入面好似有D野呀！」海澄拉住我，指住個課室入面同我講。
我好小心咁打開課室嘅門，慢慢伸個頭入去睇。
地下上面有好多嘅廢紙，而紙上面都寫滿左密麻麻嘅字。當然，我同海澄都睇唔明，因為呢D根本就唔係人類嘅文字。
「屌，搵到都無用啦，根本都無可能睇得明。」我將手上嘅筆記紙揸埋一舊隨手掉左。
「喂呀，阿洛你唔好咁樣啦。咦！呢張係咩黎架？」海澄想行過去執番個紙球，但好似有新嘅發現。
「等我睇過，呢張咪係呢一區嘅地圖囉。」呢一張地圖同我地平時用開嘅好唔同，所有嘅街道、大廈都係清楚標明，就只有橫橫直直嘅線條同四方形。
「咁呢張地圖有咩意思呀？佢上面嘅記號又係咩黎架？」海澄指住地圖上面其中一條街問。
「呢個咪係橫街隔離嘅後巷囉。」我指出地圖上面有記號嘅地方。
「等等先，呢度咪我地捉百鬼夜行果度？」我靈機一觸諗番起。
「係wor，咁唔通隻百鬼夜行就係個死靈術士整嘅？佢一定係想係呢區搞破壞！ 」海澄望住我講。
「我都唔敢肯定，但呢個一定係重要線索之一，我地要拎番去比Ivan睇。」我同海澄帶埋份地圖番去預定地點果度同Ivan會合。
「點呀，你地有咩發現呀。」Ivan一見到我地就即刻問。
「我地搵到份地圖，上指標記嘅位置就係我地上次發現百鬼夜行嘅後巷。」我指住個記號比Ivan睇。
「我都搵到另一份地圖，地圖嘅記號係後山山腳嘅廢棄空地，我地可以過去睇下有冇其他線索。」Ivan拎住另一份地圖同我地講。
呢個時候小樹精都番黎啦，而其中一隻樹精拎住左一個玻璃樽。
Ivan接住個玻璃樽講：「辛苦曬你地啦。」之後班小樹精就變成一點點光就好似螢火蟲咁樣散開。
「呢個樽，唔通係...」Ivan對住個玻璃樽就好似發現新大陸一樣。
「個樽有咩特別呀？」海澄係唔同角度咁樣睇個樽。
「你拎上手就知架啦。」Ivan將個樽交比海澄。
「呀！」海澄接到個樽之後過左幾秒就尖叫，再將個樽拋開。
我身飛埋去一手接住左個樽：「哇，海澄你差D整爛個樽......」我句野都未講完，就已經有一種極度唔舒服嘅感覺，就好似有無數嘅鬼魂同一時間依附左係我身上咁樣，我好明白點解海澄會一手就掉開個樽。
「呢個樽，容納左差唔多一百隻鬼魂係入面。」Ivan講。
「咁姐係話，百鬼夜行嘅事肯定同死靈術士有關！」海澄講。
Ivan拎番個玻璃樽再講：「無錯，我地等埋阿詠同歐陽sir就一齊出發去地圖上面有記號嘅地方啦。」