《日頭嘅我係個學生，夜晚嘅我就係個降魔師》: 《降魔師篇》第二章 Ep.08
「咁我地陣間要做咩架？」我一邊行一邊問。
偉豪突然之間停低：「好簡單，只要將D鬼殺曬就得。」
「...」我一時之間完全唔知點應佢好。
「好啦，我地行啦。」Ivan搭一搭我膊頭就繼續行。
「啱啱開始做呢D野係會有少少唔慣架啦，之後你慢慢就會無事架啦。」
「好啦，就係呢度...」阿詠一開口果下明明係好興奮，但講左幾個字之後，佢嚇到面到青埋咁講：「不...不如走啦...」
連做開降魔師嘅阿詠都會嚇到咁？我決定要上前睇下後巷入面係咩情況！
但我只係行到轉角口，仲未行到入後巷就已經feel到好強嘅邪氣，巷入面就好似有好多野係度咁...
呢一刻我只係感覺到一樣野：「我繼續向前行嘅話就會死」我已經無勇氣再向前行...
「果然無黎錯地方...」偉豪一馬當先就行左入巷仔入面，然後係袋入面拎左兩個好似拳頭咁大嘅玻璃樽出黎。
係偉豪嘅帶領之下，我地全部人都跟係佢身後面慢慢咁行入後巷。
「呢度...好恐怖...我從來都無見過...」雖然聽落去覺得偉豪好似好冷靜咁，但我地心中都知偉豪其實無頂硬上。
我慢慢咁係偉豪身後面望出去，我只係見到一堆鬼...
無錯，係一堆鬼，從此之外我乜都見唔到。
果堆鬼堆曬係條後巷入面，連巷嘅另一面都見唔到，成條巷就比果堆鬼塞住曬。
咦，點解突然間隻手暖暖地嘅？
「唔洗驚，有大家係度呀嘛。」原來係海澄捉住左我隻手。
「好，同大家一齊解決佢！」我比左個五比海澄。
「呢度有咁多污糟野，就由我黎清除！」偉豪一聲仰天長嘯，然後就將手上嘅兩個玻璃樽向住果堆鬼掉過去。
個玻璃樽掂落堆鬼度就即刻爆開左，水花四濺。D水只係一𣊬間就變曬做黑色。
「係咪成功左㕸？」我一邊問，一邊探頭去望。
「唔好話成功...根本完全係一D用都無...」偉豪嘆氣。
「頭先果D係咪聖水黎架？」海澄問。
「無錯，係開左光嘅聖水，如果係平時嘅話，堆鬼應該已經死曬...」連偉豪開始都覺得淆。
「D鬼陏㕸！」阿詠指住堆鬼大叫。
果堆鬼慢慢咁向上升，慢慢咁伸延開去，最後變左做一個人型身體，係一個由一堆鬼痴埋一齊所組成嘅巨人。
「屌那星呀，仆街㕸今次。」偉豪一見到咁嘅情況，完完係嚇到想調頭走咁嘅款。
鬼巨人一步又一步咁向我地呢邊踏過黎...越黎越近...
「咩事呀！做乜撚野呀？」我大叫，我淨係覺得我地今次死撚緊。
「係百鬼夜行...」Ivan好冷靜咁講。
「阿詠，拎你塊鏡出黎照佢老母！」
阿詠一手就將掛係腰間嘅八咫鏡拎出黎，但佢無即時用塊鏡照果堆鬼，佢另轉頭問我地：「我都睇唔到佢老母係邊！點照呀？」
「屌你㕸，你再唔撚照我屌你老母添呀！」偉豪一手就推左阿詠去前面。
「我照！照你老母！」阿詠將塊鏡對住堆鬼，然後有一道光柱係鏡面射向百鬼夜行。
阿詠嘅八咫鏡有非常大嘅力量，就好似地圖炮一樣，只係過左幾秒，隻百鬼夜行就已經開始解體，D鬼一隻一隻咁係百鬼夜行身上跌落黎。
「就係依加！上呀！」偉豪一聲令下，我地全部人一齊向前衝，拎出自己嘅法器。
我拎把斷劍出黎，係𠝹落自己隻手之前，我停左一下，但最後我都係手起刀落，𠝹落手指上面滴血。
就同之前幾次一樣，劍上面所刻嘅符文發出血紅色嘅光，火焰不斷係劍上面湧出黎。就係呢個時候，大家都呆左咁望住我。
「點解會咁架...你...你係究竟咩人....」偉豪一見到我嘅修羅之火就呆左咁望住我。
「呢D好似叫修羅之火呀嘛？係咪呀？」我一邊揮劍一邊講。
「咁你又知唔知修羅其實係咩...」Ivan問。
「吓...我唔...唔知呀。」我另轉頭同Ivan講。
「其實修羅，係死神之一，而死神....睇住！」Ivan講到一半就突然衝左上前。
我再另轉面就已經見到堆鬼衝緊過緊我地呢邊，Ivan拎支毛筆出黎，係符上面畫左幾筆：「出黎㕸，玉藻前！」就係Ivan講完呢句嘅時候，道符就已經由一張紙，變成一條女，正確黎講，應該係九尾狐妖。
玉藻前隔空操控住兩把大劍，將一隻又一隻向住我地衝過黎嘅鬼豪不留情咁砍殺。
「好，我都要幫手！」講完之後我就拎住把劍衝左上前，用我嘅修羅之火同玉藻前一齊將眼前嘅鬼砍死。
見到我咁勇武，大家都一齊衝上黎將百鬼夜行分裂出黎嘅鬼降伏。就係呢個時候，有三隻鬼一齊係前面向住我撲埋黎。好衰唔衰係個咁緊急嘅關頭，我嘅火竟然差唔多燒盡，我用淨低嘅火光向前面一揮！
一隻，兩隻...只係砍中左兩隻鬼，我嘅火就啱啱好燒盡曬。最後果隻鬼撲左係我身上面，我成個訓左落地，心諗：「無啦，死撚緊啦，今次仆街啦！」
最後果隻我砍唔到嘅鬼係一個老婆婆嘅鬼魂，佢望住我對眼。呢一刻我好想反抗，因為我知道唔係佢死就係我亡，但係我驚到成個人震曬，D手腳就好似生左根係地下咁樣，陏都陏唔到，唔通呢D就係比鬼壓？
「你...」個老婆婆鬼魂對住我開口講。
「你有冇...見過...我個女...呀？」個老婆婆嘅鬼魂好慢咁同我講。
「我...好掛住...好想見到...佢...」原來，個老婆婆嘅鬼魂唔係百鬼夜行入面分裂出黎嘅鬼，佢只係想見下佢屋企人，對我地係無惡意嘅。
了解左之後我都開始放鬆左少少：「我無見過呀，一係你去第二度搵下啦。」
既然個老婆婆鬼魂都唔係百鬼夜行，換句話說，個老婆婆唔係我地要降伏嘅目標。
我都希望個婆婆可以見得番佢嘅屋企人，我就同佢講：「婆婆，快D走....」
「啊～」我句野都仲未講完個阿婆就突然發出一聲慘叫，係我面前嘅係一個拳頭，個拳頭穿過婆婆鬼魂嘅心口黎到我面前。
我望一望個拳頭，再望一望隻手套上面發光嘅魔法陣，呢個拳頭係偉豪嘅拳頭，而係我睇清楚一切嘅時候，個婆婆已經回歸塵土......
「點呀，阿洛無事呀嘛？」偉豪伸手想扶起我。
「點會無事呀！你殺左佢呀！佢都唔係百鬼夜行，都唔係我地嘅目標！佢係無辜架！」我一下拍開偉豪隻手，dup低頭咁講。
「做咩姐，我地降魔師係咁架啦，降魔伏妖係我地嘅責任黎架！無論點都好，鬼就係鬼，一隻都唔可以放過！人同鬼根本無可能共存架On9仔！」偉豪好惡咁同我講。
我望住偉豪，眼濕濕咁講：「個婆婆....個婆婆只係想搵佢屋企人咋...只係想望佢地一眼咋...點解咁都唔放過佢呀...點解...點解唔比佢見屋企人...點解...點解咁都要殺左佢呀....點解呀...」
偉豪聽完之後更加大聲咁講：「唔係我救你，你死撚左啦柒頭！你咪撚On9啦！你咁樣諗遲早累死你呀！我地唔好撚理佢啦，搞埋D手尾就番去交差！」
呢個時候，海澄、阿詠、Ivan都行左過黎我身邊。
海澄係第一個出聲：「唔好咁啦，我地明架，起身先啦阿洛。」海澄彎低身企左係我面前搭住我膊頭，我即刻攬住海澄。我地大家都無出聲，海澄就係度安撫我，希望我可以平復心情。
「依加無事架啦，阿洛，你嘅心意，個婆婆會明白架。」Ivan好溫柔咁同我講，而阿詠就企左係側邊望住我，無出聲。
「喂喂喂，我叫你地過黎執手尾番去呀！無撚事呀你地？Ivan，阿詠，連你兩個都同佢一齊癲？你地係咪痴撚線架？」偉豪依加簡直係非常之不滿。
大家都一齊望住偉豪無出到聲....
「得得得，我錯呀嘛！我唔啱呀嘛！好，我就乜撚野都唔柒做，睇你地之後點死！一個二個比鬼殺撚曬呀！」偉豪一講完之後就即刻轉身走人。
「阿洛，番去啦。」海澄慢慢咁扶起我。
最後大家都陪左我一齊番屋企。
「唔好諗咁多啦，食左佢之後就訓個覺好好休息下先啦。」Ivan遞左一粒朱古力比我。
「有咩事都好，我都會係你身邊架...」海澄望住我講。
「我...我先無擔心你呀，你快D碌入屋呀！」阿詠講嘅時候不斷咁避開我嘅視線。
「唔該曬你地呀，我會好好休息下先架啦。」講完之後我就番左入屋入面。
一入到房，就見到我同阿峰仲有Anson嘅合照，呢排focus太多係捉鬼方面，忽略左我兩個好朋友，仲要比佢地誤會我係重色輕友。
我都係時候要處理一下我地之間嘅關係啦.....